Ti panagbalin a nagaget ket kas iti panagehersisio; mabenepisiaranka ita ken iti masanguanan
PARA ITI AGTUTUBO
11 Kinagaget
TI KAIPAPANANNA
Dagiti nagaget a tao saanda a liklikan ti agtrabaho. Imbes ketdi, kayatda nga igaed ti agtrabaho tapno maadda dagiti kasapulanda ken makatulongda iti dadduma—uray no nanumo laeng ti trabahoda.
NO APAY A NAPATEG
Kayatmo man wenno saan, napno ti biagtayo kadagiti responsabilidad. Adu ti saan a nagaget nga agtrabaho, ngem pagsayaatam no nagagetka.—Eclesiastes 3:13.
“Nasursurok a no nagagetka, maipagpannakkelmo ti bagim ken makariknaka iti pannakapnek. Gapu iti dayta a rikna, nasursurok nga ayaten ti trabahok. Maaddaanka met iti nasayaat a reputasion no nasayaat ti kababalinmo iti trabaho.”—Reyon.
PRINSIPIO TI BIBLIA: “Makagunggona ti tunggal kita ti napinget a panagtrabaho.”—Proverbio 14:23.
TI MABALINMO NGA ARAMIDEN
Patanorem ti positibo a panangmatmat iti trabaho babaen ti panangsurot kadagiti sumaganad.
Sursuruem a pasayaaten dagiti ar-aramidem. Aniaman ti ar-aramidem—agtagtagibalay, agar-aramid iti asaynment, wenno agtrabtrabahoka—aramidem ti kasayaatan. No nalaingkan iti ar-aramidem, kitaem no kasanom pay a mapasayaat dayta—mabalin a parpartakam wenno saysayaatem pay. No nalalaingka, ad-adda a matagiragsakmo ti trabahom.
PRINSIPIO TI BIBLIA: “Nakakitaka kadin iti eksperto a trabahador? Agtakderto iti sanguanan dagiti ari; saanto nga agtakder iti sanguanan ti ordinario a tattao.”—Proverbio 22:29.
Panunotem dagiti mabenepisiaran. Kaaduanna a mabenepisiaran ti dadduma no saysayaatem nga aramiden dagiti responsabilidadmo. Kas pagarigan, no nagagetka nga agtagibalay, mapalag-anan ti dadduma a kapamiliam.
PRINSIPIO TI BIBLIA: “Naragragsak ti mangted ngem ti umawat.”—Aramid 20:35.
Agsakripisioka. Imbes nga aramidem laeng ti naited a trabahom, ikagumaam nga aramiden ti ad-adu pay. No aramidem dayta, sika ti mangkonkontrol iti biagmo—saan a gapu ta napilitanka, no di ket gapu ta kayatmo dayta.—Mateo 5:41.
PRINSIPIO TI BIBLIA: “Saanka a mapilpilit nga agaramid iti naimbag no di ket situtulokka koma.”—Filemon 14.
Agbalinka a balanse. Dagiti nagaget a tao ket saan a nasadut, ngem saanda met a trabaho a trabaho. Balanseda, naragsakda nga agtrabaho ken aginanada met.
PRINSIPIO TI BIBLIA: “Nasaysayaat ti sangarakem nga inana ngem ti dua a rakem a napasnek a panagtrabaho ken panangkamat iti angin.”—Eclesiastes 4:6.