KRISIS ITI LUBONG

3 | Protektaram ti Relasionmo Kadagiti Ipatpategmo

NO APAY NGA IMPORTANTE

Bayat a kumarkaro ti krisis iti lubong, saan a mapupuotan ti adu a maap-apektaranen ti relasionda kadagiti ay-ayatenda.

Adda dagiti tattao nga iyad-adayoda ti bagida kadagiti gagayyemda.
Adda dagiti assawa a kumarkaron ti suronda iti asawada.
Adda dagiti nagannak a maaw-awanen wenno saandan a maik-ikkan iti atension dagiti problema dagiti annakda.

Ti Masapul a Maammuam

Dakkel ti maitulong dagiti gagayyemmo iti salun-at ken emosionmo, lalo kadagiti narigat a situasion.
Ti pannaka-stress gapu iti krisis iti lubong ket mabalin a mangpataud kadagiti bigla a problema iti pamiliam.
Gapu kadagiti nakabutbuteng a damdamag, mabalin a nakarkaro pay ti epekto dagita kadagiti annakyo ngem iti ipagarupyo.

Ti Maaramidam Itan

Kuna ti Biblia: “Ti pudno a gayyem agayat iti amin a tiempo ken maysa a kabsat a mapangnamnamaan no adda rigat.”—Proverbio 17:17.

Mangpanunotka iti gayyem a makatulong kenka ken makaibaga iti kasapulam a balakad. No ammom nga adda mangipatpateg kenka, napigpigsa ti pakinakemmo a sumango kadagiti problema iti inaldaw.

KASANOM A SANGUEN?—Makatulong a Tip

Iti panawen ti krisis, aramidem dagitoy tapno maprotektaram ti relasionmo iti dadduma

PATIBKERENYO TI RELASIONYO NGA AGASSAWA

Patibkerenyo ti relasionyo nga agassawa

Kuna ti Biblia: “Nasaysayaat ti dua ngem ti maysa. . . . Ta no matuang ti maysa, mabalin a bangonen ti kaduana.” (Eclesiastes 4:9, 10) Ti agassawa ket kas koma iti piloto ken ti kaduana a piloto a maymaysa ti planoda iti panagpatayab, saan ketdi a kas iti dua a fighter jet nga agdinnungpar.

Liklikanyo nga ipapas ti stress-yo iti maysa ken maysa. Aginnanus ken agpinnalabaskayo iti pagkurkuranganyo.
Uray maminsan laeng kada lawas, pagsaritaanyo ti aniaman a problema a masapul a masolbar. Solusionanyo ti problema imbes nga agpinnabasolkayo.
Iyeskediulyo ti agkadua a mangaramid kadagiti banag a pagay-ayatyo.
Paginnestoriaanyo dagiti nararagsak nga aldaw ti biagyo. Baka mabalinyo a buyaen manen dagiti piktiuryo idi kasaryo wenno kadagiti dadduma pay a saanyo a malipatan a momento.

“Mabalin a saan nga agpada ti opinion ti agassawa iti amin a banag, ngem saanna a kayat a sawen a saandan a makapagtinnulong kas maymaysa a team. Mabalinda nga agkadua nga agaramid kadagiti desision ken agtinnulongda tapno agballigi ti desisionda.”—David.

DIMO BAYBAY-AN TI RELASIONMO KADAGITI GAGAYYEMMO

Dimo baybay-an ti relasionmo kadagiti gagayyemmo

Saanka la a basta umaw-awat iti tulong manipud kadagiti gagayyemmo, mangpanunotka met iti mabalinmo nga aramiden tapno matulongam ida. No tultulongam ti sabsabali, tultulongam metten ti bagim.
Kontakem ti dadduma a gagayyemmo kada aldaw tapno makomustam ida.
Damagem kadagiti gagayyemmo no ania ti ar-aramidenda no maipasangoda kadagiti situasion a kas iti pakaipaspasanguam.

“No maipasangoka kadagiti kasla bagyo a problema, dagiti gagayyemmo ti mabalinmo a pagkamangan. Maibagada kenka ti nasayaat nga aramidem, ken maipalagipda dagiti banag nga ammomon. Pampanunoten dagiti gagayyemmo ti pagsayaatam, ken ammoda a pampanunotem met ti pagsayaatanda.”—Nicole.

AGBALINKA A NASAYAAT A NAGANNAK

Agbalinka a nasayaat a nagannak

Kuna ti Biblia: ‘Alistoka a dumngeg, nainayad nga agsao.’ (Santiago 1:19) Iti damo, mabalin a mabain dagiti annakyo a mangibaga iti pagbutbutngan ken problemada, ngem no an-anusanyo ida a denggen, maibagadanto met laeng ti rikriknada.

Ipariknayo koma kadagiti annakyo nga okey laeng nga ibagada ti riknada kadakayo. Nawaywaya ti dadduma nga annak a mangibaga iti rikriknada no relaks ti bambanag, kas no addakayo iti lugan wenno no magmagnakayo, imbes nga agsasangokayo nga agsasarita.
Siguraduenyo a saan a kanayon a makabuya dagiti annakyo kadagiti nakabutbuteng a damag.
Ibagayo kadagiti annakyo dagiti planoyo nga aramiden tapno maprotektaran a kanayon ti pamiliayo.
Planuenyo dagiti aramidenyo no adda emergency, ken praktisenyo dagita a kadua dagiti annakyo.

“Kasaritayo dagiti annakyo, ken bay-anyo ida a mangibaga iti riknada. Baka iseksekretoda laeng ti marikriknada a buteng, danag, wenno rurod. Ibagayo kadakuada a nariknayo met ti kasta idi, ken ibagayo met no ania dagiti inaramidyo.”—Bethany.