NGUMINNGINA TI GAGATANGEN—ANIA TI ARAMIDEM?

Mangnamnamaka

Napaspaspas kadi a ngumato ti presio dagiti gagatangen iti pagilianyo ngem iti masapsapulam? Madandanaganka kadi a baka saanmonton a mabiag ti bagim ken ti pamiliam? No kasta ti marikriknam, baka maaw-awanankan iti namnama nga adda nasayaat a masakbayam. Ngem dakkel ti maitulong kenka ti namnama uray kadagiti kasta a narigat a situasion.

NO APAY A NAPATEG

Dagiti tattao a mangnamnama saanda laeng nga ar-arapaapen nga adda nasayaat a mapasamak. Ti namnama ti agbalin nga inspirasionda tapno agtignayda ken aramidenda ti amin a kabaelanda tapno sumayaat ti situasionda. Kas pagarigan, ipakita dagiti panagadal a dagiti tattao a mangnamnama ket . . .

mas makapagibtur
nalaklaka a makibagay
mas makaaramid kadagiti nasayaat a desision isu a nasalsalun-at ken nasaysayaat ti panagbiagda

TI MABALINMO NGA ARAMIDEN

Umuna, panunotem no kasano a makatulong ti Biblia kenka ita. Mabasam iti Biblia dagiti praktikal a singasing a makatulong kenka no ngumina ti gagatangen. Imbes a mariknam nga awanen ti maaramidam, makatulong dagitoy a singasing tapno makitam nga adda dagiti mabalinmo nga aramiden ita, ken adda dagiti mabalinmo nga aramiden iti masanguanan no kumaro ti situasion.

“Saluadannakanto ti saririt ken pannakaawatmo.”—Proverbio 2:11, Naimbag a Damag Biblia.

Maikadua, panunotem ti ibagbaga ti Biblia maipapan iti masanguanan. No makitam a nasayaat dagiti balakad ti Biblia, baka kayatmonto pay a maammuan ti ibagbagana maipapan iti masanguanan. Kas pagarigan, maammuamto a kayat ti Dios a maaddaanka iti “nasayaat a masakbayan ken namnama.” (Jeremias 29:11) Maammuamto pay ti usarenna tapno pumayso dayta a karina, ti Pagarian ti Dios.

ANIA TI PAGARIAN TI DIOS, KEN ANIANTO TI ARAMIDENNA?

Ti Pagarian ti Dios ket maysa a gobierno idiay langit nga agturayto iti intero a daga. (Daniel 2:44; Mateo 6:10) Pagpatinggaennanto ti panagrigrigat ken kinapanglaw. Agarinto ti talna ken addanto ti amin a kasapulan dagiti tattao tapno agbiagda a naragsak. Ipakita dayta dagitoy a teksto.

“Naragsak ken narang-aykanto.”—Salmo 128:2.

“[Dagiti iturayan ti Pagarian] didanto agbannog iti awan serserbina.”—Isaias 65:23.

“Naruayto dagiti bukbukel ditoy daga.”—Salmo 72:16.

Minilionen a tattao ti agtaltalek kadagita a kari ken kombinsidoda a ‘saan nga agulbod’ ti Dios. (Tito 1:2) Isu a baka kayatmo met a padasen a basaen ti Biblia. Makatulong ti namnama nga ibagbagana tapno kayam a sanguen ti kinarigat ti biag ken makapagtalekka nga adda nasaysayaat a masakbayam.