Umuna a Lalaki ken Babai

ANIA ti naiduma iti daytoy a ladawan? Wen, adda tattaona. Isuda ti immuna a lalaki ken babai. Asino ti nangaramid kadakuada? Ti Dios. Ammom kadi ti naganna? Isu ni Jehova. Ken ti lalaki ken ti babai napanagananda Adan ken Eva.

Kastoy ti panangaramid ni Jehova a Dios ken ni Adan. Nangala ti tapuk manipud iti daga ket iti dayta nangaramid ti perpekto a bagi, ti bagi ti lalaki. Kalpasanna pinuyotanna ti agong ti lalaki, ken nagbiag ni Adan.

Ni Jehova imbagana ken Adan a nagananna amin dagiti nagduduma nga an-animal. Mabalin a binambantayan ni Adan ida ti nabayag, tapno maitedna ti nasayaat a nagnagan kadakuada. Kalpasanna adda makita ni Adan a sabali. Ammom kadi daytoy?

Dagiti amin nga animal adda kakaduada. Adda ama nga elepante ken ina nga elepante, ken addada ama a leon ken ina a leon. Ngem awan kadua ni Adan. Gapuna pinaturog ni Jehova ni Adan ti nauneg. Sa innala ni Jehova ti tulang a paragpag iti sikigan ni Adan, ket pinagbalinna a maysa a babai para ken ni Adan. Isu ti nagbalin nga asawana.

Anian a nagragsak itan da Adan ken Eva. Itan maaddaandan ti annak ken agbiagda a siraragsak.

Kayat ni Jehova nga agbiag nga agnanayon da Adan ken Eva. Kayatna a pagbalinenda ti intero a daga kas kapintas ti hardin ti Eden. Kayatyo kadi met a makiraman a pagbalinen ti daga a napintas a hardin? Ngem saan a nagbayag ti ragsak da Adan ken Eva. Ammuentayo no apay.