Sinuot ti Dios ni Abraham

MAKITAM kadi ti ar-aramiden ni Abraham ditoy? Adda immukona, ket kasla papatayenna ti anakna. Apay nga aramidenna dayta? Umuna, kitaentayo no kasano a naaddaan da Abraham ken Sara ti anak.

Laglagipenyo, nga inkari ti Dios kadakuada a maaddaandanto ti anak a lalaki. Ngem kasla imposible dayta, ta lakay ken baketen da Abraham ken Sara. Nupay, namati ni Abraham iti kari ti Dios. Ita aniat’ napasamak?

Idi agtawen ti 100 ni Abraham, ken 90 ti tawen met ni Sara, tinungpal ti Dios ti karina. Naaddaanda ti ubing a lalaki a napanaganan Isaac!

Ngem idi dimmakkelen ni Isaac, sinuot ni Jehova ti pammati ni Abraham. Kunana: ‘Alaem ni Isaac nga anakmo ket inka idiay bantay nga ipakitak kenka. Patayemto idiay ti anakmo ket idatonmonto.’ Ngem laglagipem, nga inkari ti Dios a dagiti annak ni Abraham aggiandanto idiay daga ti Canaan. Kasano ngay a mapasamak dayta no matayen ni Isaac? Saan a maawatan ni Abraham, ngem kaskasdi nagtulnog iti Dios.

Idi makagtengen idiay bantay, rineppet ni Abraham ni Isaac ket imparabawna idiay altar a binangonna. Ngem iti daydiay kanito a papatayenna koman ni Isaac, immawag ti anghel ti Dios: ‘Abraham, dika saktan ti ubing. Itan ammokon nga adda pammatim kaniak, ta dika inkedked ti kakaisuna nga anakmo kaniak.’

Anian a nagdakkel ti pammati ni Abraham iti Dios! Patienna pay a ni Jehova mabalinna a pagungaren ni Isaac manipud ken patay. Ngem di kayat ti Dios a papatayen a talaga ni Abraham ni Isaac. Gapuna namataud ti Dios ti maysa a karnero a naisalat kadagiti mulmula idiay asideg, ket imbagana ken Abraham nga idaton dayta imbes a ti anakna.