Ni Jacob Dakkel Pamiliana

KITAEM daytoy dakkel a pamilia. Dagitoy dagiti 12 nga annak a lallaki ni Jacob. Ken isut’ addaan pay ti annak a babbai. Ammuentayo ti nagnaganda.

Ni Lea impasngayna ni Ruben, ni Simeon, Levi ken Juda. Ni Raquel ti saan nga agan-anak gapuna intedna ni adipenna a Bilha ken Jacob. Dua ti annak ni Bilha, ni Dan ken Neftali. Ket inted met ni Lea ti adipenna a Zilpa ken Jacob. Impasngay ni Zilpa ni Gad ken Aser. Kalpasanna naaddaan manen ni Lea ti dua nga annak a lallaki, ni Issacar ken ni Zabulon.

Iti kamaudiananna naganak met laengen ni Raquel. Isut’ pinanagananna ti Jose. Isu ti nagbalin nga importante unay iti kamaudiananna. Dagitoy dagiti 11 nga annak a lallaki a naiyanak ken Jacob idi makipaggigian ken Laban, nga ama ni Raquel.

Idi nadanonen ti tiempo, inurnong ni Jacob ti dakkel a pamiliana ken amin a karkarnero ken bakbakana, ket rinugianda ti atiddog a biahe nga agturong Canaan.

Idi nakasublidan idiay Canaan, nagpasngay manen ni Raquel ti maysa nga anak a lalaki. Narigatan ni Raquel, ket natay iti panaganakna. Ngem ti bassit nga ubing ti naimbag. Pinanaganan ni Jacob ti Benjamin.

Kayattay a laglagipen ti nagnagan dagiti 12 nga annak ni Jacob ta ti intero a nasion ti Israel naggapu kadakuada. Kinapudnona, dagiti 12 a tribo ti Israel ti naipanagan kadagiti 10 nga annak ni Jacob ken kadagiti dua nga annak ni Jose. Ni Isaac, nga ama ni Jacob, ti nalabit maragsakan iti adu nga apokona. Ngem kitaentayo no aniat’ napasamak iti apokona a babai, ni Dina.