Kapitulo 32
Aniat’ Nainkalintegan iti Aldaw ti Panaginana?
ITI sabali manen nga Aldaw ti Panaginana simmarungkar ni Jesus iti maysa a sinagoga nga asideg iti Baybay ti Galilea. Adda idi ti maysa a tao a nagango ti kanawan nga imana. Sipsiputan a naimbag dagiti eskriba ken Fariseo no isut’ agasan ni Jesus. Kamaudiananna insaludsodda: “Maipalubos aya ti mangagas iti aldaw ti panaginana?”
Patien dagiti narelihiusuan a papangulo a Judio a ti panangagas maipalubos laeng iti Aldaw ti Panaginana no ti biag ket agpegpeggad. Isursuroda, kas pangarigan, nga iti Aldaw ti Panaginana saan a maipalubos ti panangisubli ti nablo a tulang wenno mangpatapat iti nailigos a saka. Gapuna dagiti eskriba ken Fariseo salsaludsodanda ni Jesus iti panagreggetda a maaddaan ti pangakusaran kenkuana.
Ngem, ammo ni Jesus ti pampanunotda. Maigiddato iti dayta, ammona a naaddaandat’ aglablabes, di nainkasuratan a panangmatmat no aniat’ mangbukel iti panagsalungasing kadagiti pagalagadan iti Aldaw ti Panaginana a panangiparit iti trabaho. Gapuna insagana ni Jesus ti maysa a dramatiko a panagsango babaen ti panangibagana iti tao a nagango ti imana: “Agtakderka iti tengnga.”
Ita, idi sinangona dagiti eskriba ken Fariseo, kuna ni Jesus: “Asino ngata ti tao nga adda kadakayo nga adda maysa a karnerona, ket no daytoy matnag koma iti maysa nga abut iti aldaw ti panaginana, saanna nga iggaman ken aonen?” Gapu ta ti maysa a karnero irepresentarna ti maysa a nagpuonan a pinansial, dida baybay-an dayta iti abut agingga iti sumaganad nga aldaw, nalabit tapno agsakit ket mapukawanda. Malaksid pay, kuna ti Kasuratan: “Ti nalinteg a tao ipatpategna ti biag ti animalna.”
Babaen ti panamagdiligna, intuloy ni Jesus: “Ket, saan aya a napatpateg ti maysa a tao ngem ti maysa a karnero! Gapuna maipalubos kadagiti aldaw ti panaginana ti agaramid ti naimbag.” Dagiti relihiuso a papangulo dida masungbatan ti kasta a lohikal, naayat a panagrason, ket nagulimekda.
Ni Jesus minatmatanna ida a sirururod, ket nagladingit iti kinatangken dagiti puspusoda. Kalpasanna kinunana iti tao: “Unnatem ta imam.” Ket inunnatna ket ti imana nagimbag.
Imbes a maragsakanda koma ta naisubli a naan-anay ti ima daydi a tao, rimmuar ketdi dagiti Fariseo ket dagdagus a nagnunumoda a kadua dagiti paspasurot ti partido ni Herodes tapno papatayenda ni Jesus. Daytoy a napolitikaan a partido kaawatan iramanna dagiti miembro ti narelihiusuan a Saduceo. Iti gagangay, daytoy a napolitikaan a partido ken dagiti Fariseo silalatak nga agbibinnusorda iti maysa ken maysa, ngem ita isudat’ sangsangkamaysa a bumusor ken ni Jesus. Mateo 12:9-14; Marcos 3:1-6; Lucas 6:6-11; Proverbio 12:10; Exodo 20:8-10.
▪ Aniat’ buya a maipaay iti dramatiko nga isasango ni Jesus kadagiti relihiuso a papangulo?
▪ Aniat’ pammati dagiti Judio maipapan iti panangagas iti Aldaw ti Panaginana?
▪ Ania nga ilustrasion ti usaren ni Jesus a pangsungbat iti di umiso a panangmatmatda?