Kapitulo 51
Ti Panangpapatay Bayat ti Panagkasangay
KALPASAN panangbilinna kadagiti apostolna, imbaon ida ni Jesus nga agkakaparis kadagiti teritoria. Nalabit da agkabsat a Pedro ken ni Andres ti nagkuyog, kas met ken ni Santiago ken ni Juan, ni Felipe ken ni Bartolome, ni Tomas ken Mateo, ni Santiago ken Tadeo, ni Simon ken ni Judas Escariote. Dagiti innem a paris dagiti managebanghelio iwaragawagda ti naimbag a damag ti Pagarian ken agaramidda kadagiti namilagruan a panangag-agas sadinoman a papananda.
Kabayatanna, ni Juan a Mammautisar adda pay laeng idiay pagbaludan. Isu ti adda idiayen iti ngangngani dua a tawen itan. Mabalin a malagipyo pay nga inwaragawag ni Juan iti publiko a di umiso para ken ni Herodes Antipas nga alaen ni Herodias, nga asawa ni kabsatna a Felipe, kas asawana. Yantangay ibagbaga ni Herodes Antipas a sursurotenna ti Linteg ni Moises, maiyanatup ti panangibutaktak ni Juan iti daytoy pannakikamalala a panagkallaysa. Gapuna impaipisok ni Herodes ni Juan idiay pagbaludan, nalabit gapu iti panangidagadag ni Herodias.
Nabigbig ni Herodes Antipas a ni Juan ket maysa a tao a nalinteg ken pagragsakanna pay ti panagdengdengngegna kenkuana. Gapuna, isut’ mariribukan no aniat’ aramidenna kenkuana. Ni Herodias, iti kasumbangirna, kagurana ni Juan ket sapsapulenna ti panangpapatayna kenkuana. Kamaudiananna, dimtengen ti gundaway nga ur-urayenna.
Kasakbayan la unay ti Paskua iti 32 K.P., inyurnos ni Herodes ti dakkel a pannakarambak ti panagkasangayna. Naur-urnong a maipaay iti padaya ket isuamin dagiti nangangato ti ranggona nga opisiales ken papangulo iti buybuyot ni Herodes, agraman dagiti natatan-ok nga umili iti Galilea. Idi rumabiin, ni Salome, ti balasang nga anak ni Herodias babaen iti immuna nga asawana a ni Felipe, naibaon nga agsala a maipaay kadagiti sangaili. Dagiti lallaki nga agbuybuya maragsakanda iti panagsalana.
Maayatan unay ni Herodes ken ni Salome. “Dawatem kaniak dagup ti kayatmo, ket itdekto kenka,” kunana. Insapatana pay: “Isuamin a dawatemto kaniak, itdekto kenka, uray pay ti gudua ti pagarian.”
Sakbay a simmungbat, napan nga immuman ni Salome ken ni inana. “Ania ti dawatekto?” insaludsodna.
Adda met laengen ti gundaway! “Ti ulo ni Juan a mammautisar,” insungbat ni Herodias nga awan panagalikakana.
Sidadaras a nagsubli ni Salome ken ni Herodes ket indawatna: “Kayatko nga ita met laeng itedmo kaniak iti pinggan ti ulo ni Juan a Bautista.”
Ni Herodes ket nagliday unay. Ngem gapu ta nangngegan dagiti sangailina ti sapatana, mabain a di manganamong iti dayta, nupay kaipapanan dayta ti panangpapatay ti tao nga awan ti basolna. Dagus a naibaon ti maysa a mammapatay idiay pagbaludan nga addaan kadagiti nakabutbuteng nga instruksionna. Di nagbayag isu ti nagsubli nga addaan iti ulo ni Juan iti maysa a pinggan, ket intedna dayta ken ni Salome. Ket ni Salome, intedna met dayta ken ni inana. Idi nangngegan dagiti adalan ni Juan ti adda a napasamak, immayda ket innalada ti bangkayna ket intanemda dayta, ket kalpasanna impakaammoda dayta a banag ken ni Jesus.
Iti kamaudiananna, idi nangngegan ni Herodes ti panangag-agas ni Jesus kadagiti tattao ken panangparparuarna kadagiti demonio, isut’ nagbuteng, mabutbuteng di la ket ta ni Jesus iti kinapudnona isu ni Juan a napagungar manipud ken patay. Kalpasan dayta, tinarigagayanna unay a makita ni Jesus, saan a tapno denggen ti panangaskasabana, no di ket tapno mapatalgedan no dagiti panagbutbutengna ket umiso met laeng. Mateo 10:1-5; 11:1; 14:1-12; Marcos 6:14-29; Lucas 9:7-9.
▪ Apay nga adda idiay pagbaludan ni Juan, ken apay nga isut’ saan a kayat a papapatay ni Herodes?
▪ Kasano nga iti kamaudianan nabalinan ni Herodias a pinapatay ni Juan?
▪ Kalpasan ti ipapatay ni Juan, apay a tinarigagayan ni Herodes a makita ni Jesus?