Kapitulo 104
Nangngeg ti Timek ti Dios iti Maikatlo a Daras
BAYAT nga adda idiay templo, pagpapaut-otan ni Jesus ti ipapatay a dandanin sanguenna. Ti kangrunaan a pakaseknanna ket no kasano a maapektaran ti dayaw ti Amana, gapuna ikararagna: “Ama, itan-okmo ti naganmo.”
Iti dayta, immay ngarud ti napigsa a timek manipud langit, a kunkunana: “Intan-okkon ket itan-okkonto manen.”
Ti umariwekwek nga agtaktakder iti aglawlaw nakellaatda. “Maysa nga anghel nakisao kenkuana,” kuna ti dadduma kadakuada. Dadduma kunada a naggurrood. Ngem, kinaagpaysuanna, ni Jehova a Dios ti nagsao! Daytoy, nupay kasta, ket saan nga isut’ umuna a daras a pannakangngeg ti timek ti Dios maipapan ken Jesus.
Iti bautismo ni Jesus, tallo ket kagudua a tawen a nasapsapa, nangngeg ni Juan a Mammautisar a kuna ti Dios ken Jesus: “Daytoy ti Anakko, a dungdungnguek, isu nga inanamongak.” Sa, kalpasan ti napalabas a Paskua, idi a nagbaliw ti langa ni Jesus iti imatangda, da Santiago, Juan, ken Pedro nangngegda a kuna ti Dios: “Daytoy isu ti Anakko, a dungdungnguek, isu a pakaay-ayuak; isu ti denggenyo.” Ket ita, iti maikatlo a daras, idi Nisan 10, uppat nga aldaw sakbay ti ipapatay ni Jesus, ti timek ti Dios nangngeg manen dagiti tattao. Ngem iti daytoy nagsao ni Jehova tapno mangngeg dagiti umariwekwek!
Inlawlawag ni Jesus: “Saan nga immay daytoy a timek gapu kaniak, no di ket gapu kadakayo.” Daytat’ nangted pammaneknek a ni Jesus ket pudno nga Anak ti Dios, ti naikari a Mesias. “Ita adda ti pannakaukom daytoy a lubong,” intuloy ni Jesus, “ita ti agturay daytoy a lubong maibellengto iti ruar.” Ti matalek a kurso ti panagbiag ni Jesus, iti epektona, pinatalgedanna a ni Satanas a Diablo, ti agturay ti lubong, ket maikari a “maibellengto iti ruar,” mapapatay.
Iti panangibagana maipapan ti ibunga ti umad-adanin nga ipapatayna, kuna ni Jesus: “Ket siak, no maipangatoak manipud iti daga, guyugoyekto kaniak amin a kita ti tao.” Ti ipapatayna saan pulos a pakaatiwan, ta babaen iti dayta, allukoyennanto ti dadduma kenkuana tapno mabalindanto met a tagiragsaken ti biag nga agnanayon.
Ngem nagprotesta ti umariwekwek: “Nangngegmi iti Linteg a ti Kristo mataginayonto nga agnanayon; ket kasano ti panagkunam a masapul a ti Anak ti tao maipangato? Siasino daytoy Anak ti tao?”
Agpapan pay amin dagiti pammaneknek, agraman ti pannakangngegdat’ mismo a timek ti Dios, kaaduan ti di mamati a ni Jesus isut’ pudno nga Anak ti tao, ti naikari a Mesias. Kaskasdi, kas ti inaramidna innem a bulan a nasapsapa iti Piesta ti Abong-abong, nagsao manen ni Jesus maipapan ti bagina kas “ti lawag” ken pinaregtana dagiti agdengdengngeg kenkuana: “Ita ta adda pay laeng ti silaw kadakayo, mamatikayo iti silaw, tapno agbalinkayo nga annak ti lawag.” Kalpasan ti panangikunana kadagitoy a bambanag, pimmanaw ni Jesus ket naglemmeng, nalabit gapu ta agpegpeggad ti biagna.
Ti kinakurang pammati dagiti Judio ken Jesus tinungpalna ti sasao ni Isaias a ‘pinagbulsekna dagiti matada ket pinatangkenna ti pusoda di la ket ta agbabawida ket maagasanda.’ Nakita ni Isaias iti sirmata dagiti nailangitan a pangukoman ni Jehova, agraman ni Jesus iti dayagna sakbay ti panagbalinna a tao a kadua ni Jehova. Kaskasdi, dagiti Judio, kas kaitungpalan ti insurat ni Isaias, sitatangken a linaksidda ti pammaneknek a Daytoy isut’ naikari a Manangispalda.
Iti kasumbangirna, adu uray kadagiti agtuturay (kaawatan kamkameng ti nangato a pangukoman dagiti Judio, ti Sanhedrin) ti aktual a namati ken Jesus. Ni Nicodemo ken ni Jose ti Arimatea ti dua kadagitoy nga agtuturay. Ngem dagiti agtuturay, uray laeng iti agdama, napaayda a nangiwaragawag ti pammatida, gaput’ butengda a maikkat manipud saadda iti sinagoga. Anian a nagdakkel ti nakaikapisan dagita!
Intuloy a kinuna ni Jesus: “Ti mamati kaniak, saan a siak laeng ti patienna no di kasta met ti nangibaon kaniak; ket ti makakita kaniak makitana ti nangibaon kaniak. . . . Ket no ti siasinoman a tao dumngeg kadagiti saok ket dina tungpalen ida, saan a siak ti mangukom kenkuana; ta saanak nga immay tapno mangukom iti lubong, no di ket tapno mangisalakan iti lubong. . . . Ti sao nga insaok isu ti mangukomto kenkuana iti kamaudianan nga aldaw.”
Ti ayat ni Jehova iti lubong ti sangatauan ti nangtignay kenkuana a mangibaon ken Jesus tapno dagidiay mamati kenkuana ket maisalakanda. Ti pannakaisalakan dagiti tattao ti maikeddeng no agtulnogda kadagiti bambanag nga imbilin ti Dios a sawen ni Jesus. Ti panangukom maaramidto “iti kamaudianan nga aldaw,” bayat ti Sangaribo a Tawen a Panagturay ni Kristo.
Nagpatingga ni Jesus a kunkunana: “Ta saanak a nagsao a sisiak, no di ni Ama a nangibaon kaniak, isu imbilinna kaniak no ania ti ibagak ken sawek. Ket ammok a ti bilinna isu ti biag nga agnanayon. Dagiti ngarud sawek, kas iti panangibaga kaniak ni Ama, kasta ti panagsaok.” Juan 12:28-50; 19:38, 39; Mateo 3:17; 17:5; Isaias 6:1, 8-10.
▪ Iti ania a tallo nga okasion a nangngegan ti timek ti Dios maipapan ken Jesus?
▪ Kasano a nakita ni mammadto Isaias ti dayag ni Jesus?
▪ Asinoda dagiti agtuturay a namati ken Jesus, ngem apay nga isut’ saanda nga impakaammo a silalatak?
▪ Ania ti “kamaudianan nga aldaw,” ket iti ania a pakaibatayan a maukomto dagiti tattao?