Kapitulo 15

Irarang-ay ti Urnos ti Organisasion

TI PANAGANDAR ti organisasion dagiti Saksi ni Jehova adut’ nagbalbaliwanna nanipud inrugi da Charles Taze Russell ken ti kakaduana nga inadal ti Biblia a sangsangkamaysa idi 1870. Idi mammanoda pay dagiti immuna nga Estudiante ti Biblia, narigat a makuna nga addaandat’ sasawen dagiti taga ruar a kas organisasion. Ngem, ita, no mapaliiw dagiti tattao dagiti kongregasion dagiti Saksi ni Jehova, dagiti kumbensionda, ken ti panangikaskasabadat’ naimbag a damag iti nasurok a 200 a daga, masdaawda iti naannayas a panagandar ti organisasion. Kasano a timmanor dayta?

Saan laeng a ti panangtarus iti doktrina ti Biblia ti naginteresan unay idi dagiti Estudiante ti Biblia no di pay ket ti wagas a panangannong iti serbisioda iti Dios, kas impasimudaag ti Kasuratan. Nabigbigda nga awan natituluan a klero nga inyurnos ti Biblia, ken pasurot nga inda sersermonan. Determinado idi ni Kabsat Russell nga awan tumaud kadakuada a klase klero.a Kadagiti panid ti Watch Tower, kanayon a naipalagip kadagiti managbasa a ni Jesus imbagana kadagiti pasurotna: “Maymaysa ti Lideryo, ti Kristo,” ngem, “Dakayo amin agkakabsatkayo.”​—Mat. 23:8, 10.

Nagkauna nga Asosasion Dagiti Estudiante ti Biblia

Dagiti managbasa ti Watch Tower ken dagiti nainaig a publikasion di nagbayag naamirisda a tapno maay-ayo ti Dios, masapul a suminada iti iglesia a di matalek iti Dios gaput’ panangiyun-unada kadagiti kredo ken tradision ti tao imbes nga iti naisurat a Sao. (2 Cor. 6:14-18) Ngem kalpasan ti isisinada kadagiti iglesia ti Kakristianuan, napananda ngay?

Sigun iti artikulo a napauluan “Ti Ekklesia,”b inlawlawag ni Kabsat Russell a ti pudno nga iglesia, ti Nakristianuan a kongregasion, saan nga organisasion a buklen dagiti miembro a mangsupsuportar kadagiti aramid-tao a kredo sa dagiti naganda naisurat iti listaan ti iglesia. Imbes ketdi, inlawlawagna, a buklen dagiti tattao a “nangkonsagrar” (wenno, nangidedikar) ti tiempo, talento, ken biagda iti Dios, ket sangsanguenda ti namnama a makiraman iti nailangitan a Pagarian ken Kristo. Dagitoy, kinunana, isuda dagiti Kristiano a naikaykaysa kadagiti singgalut ti Nakristianuan nga ayat ken komon a paginteresan, nga agtignayda sigun iti panangiturong ti espiritu ti Dios, ken agpaiturayda iti kinaulo ni Kristo. Saan idi nga interesado ni Kabsat Russell a mangbuangay iti sabali pay nga urnos, ket napalalo ti ibubusorna iti itataud ti aniaman a sektarianismo kadagidiay agkunkuna a Kristianoda.

Iti daydi met laeng, naawatanna unay a kasapulan dagiti adipen ti Apo ti panaggigimongda, kas maitunos iti balakad ti Hebreo 10:23-25. Nagbiahe tapno personal a sarungkaran ken pabilgenna dagiti managbasa ti Watch Tower ken tapno pagtitiponenna dagidiay agkakanakem iti dayta a lugar. Idi rugrugi ti 1881 indawatna a dagidiay regular ti panaggigimongda ipakaammoda koma iti opisina ti Watch Tower no sadinot’ paggigimonganda. Naamirisna a nasken nga adda koma komunikasion ti maysa ken maysa.

Nupay kasta, inggunamgunam ni Kabsat Russell a dida impadas nga ipasdek ti “naindagaan nga organisasion.” Imbes ketdi, kinunana, “dayta laeng nailangitan nga organisasion ti pakimiembruantayo​—‘a dagiti naganda naisurat sadi langit.’ (Heb. 12:23; Luc. 10:20.)” Ngem gaput’ nadamsak a historia ti Kakristianuan, no madakamat ti “organisasion ti iglesia” masansan a maipalagip ti sektarianismo, kinadominante dagiti klero, ken pannakimiembro a naibatay iti panamati kadagiti kredo a pinartuat ti relihiuso a konsilio. Isu nga, idi dinakamatdat’ timpuyogda, kinuna ni Kabsat Russell a nasaysayaat ti termino nga “asosasion.”

Pagaammona met a dagidi apostol ni Kristo pinormada dagiti kongregasion sa nangdutokdat’ papanglakayen kadagita. Ngem namati a ni Kristo ket adda manen, nupay di makita, ket isu personal nga iturturongna ti ultimo a pannakaani dagidiay makipagtawidto kenkuana. Gapu kadagita a sirkumstansia, namati idi damo ni Kabsat Russell a kabayatan ti tiempo ti panagani saan a kasapulan daydi urnos maipapan kadagiti panglakayen a naannurot kadagiti kongregasion Kristiano idi umuna a siglo.

Nupay kasta, idi umadun dagiti Estudiante ti Biblia, nabigbig ni Kabsat Russell nga iturturong ti Apo kadagiti kasasaad a naigiddiat iti sineggaan ni Kabsat Russell. Masapul idi a mabaliwan ti panangmatmatda. Ngem aniat’ nakaibasaranna?

Ipaay Dagiti Nagkauna a Kasapulan ti Dumakdakkel nga Asosasion

Ti Watch Tower idi Nobiembre 15, 1895, gistay naipamaysa iti tema a “Sidadayaw ken Siuurnos.” Sipaprangkesa a binigbig dita ni Kabsat Russell: “Nagadut’ naibalakad dagiti apostol iti daydi nagkauna nga Iglesia maipapan iti urnos no kadagiti asamblea dagiti sasanto; ket agbatad a naliwayantayo daytoy nainsiriban a balakad, nga impapantayo a medio di unay nasken, gapu ta ti Iglesia asideg unayen a malpas ti annongna ken gapu ta ti panagani ket tiempo ti panamaglalasin.” Aniat’ nangtignay kadakuada a nangpabaro iti panangmatmatda iti dayta a balakad?

Uppat a sirkumstansia ti inlista dayta nga artikulo: (1) Nabatad a ti naespirituan nga irarang-ay dagiti indibidual nagduduma iti maysa ken maysa. Adda dagiti sulisog, suot, rigat, ken peggad a saan nga amin ket agpapada a sisasagana a mangsaranget kadagita. Gapuna, kasapulan dagiti masirib ken naannad a manangaywan, lallaki nga addaan kapadasan ken abilidad, a maseknanda unay a mangaywan iti naespirituan a pagimbagan dagiti isuamin ken kabaelanda nga isuro ida iti kinapudno. (2) Naamiris a ti arban masapul a maikaluya kadagiti ‘lobo a nagkawes kas karnero.’ (Mat. 7:15, KJ) Masapul a bumilegda babaen iti panangtulong kadakuada a gumun-od iti naan-anay a pannakaammo iti kinapudno. (3) Sigun iti kapadasan, no awan urnos para kadagiti nadutokan a panglakayen a mangsalaknib iti arban, adda dagidiay mangibaklay iti dayta a saad ket matmatandanton a kukuada ti arban. (4) No awan ti masnup nga urnos, dagiti indibidual a nasungdo iti kinapudno mabalin nga ibilangda a di kasapulan ti serbisioda gapu iti impluensia dagiti sumagmamano a di immanamong kadakuada.

Gapu kadagitoy, kinuna ti Watch Tower: “Dikam agkitakit a mangirekomenda kadagiti Iglesiac iti amin a lugar, aduda man wenno bassitda, ti Apostoliko a balakad, nga, iti tunggal kompania, mapili koma kadakuada dagiti panglakayen a ‘mangpakan’ ken ‘mangaywan’ iti arban.” (Ara. 14:21-23; 20:17, 28) Inannurot dagiti lokal a kongregasion daytoy nainkalintegan a balakad ti Kasuratan. Daydit’ importante nga addang tapno maipasdek ti porma ti kongregasion a maitunos iti naangay kadagidi aldaw dagiti apostol.

Sigun iti pannakatarusda idi, nupay kasta, napili dagiti panglakayen, ken dagiti diakono a tumulong kadakuada, babaen iti butos ti kongregasion. Kada tawen, wenno nasansansan pay no nesesita, inamirisda dagiti kualipikasion dagidiay nga agserbi, sadanto butosan ida. Talaga a demokratiko a wagas daydi, wagas a tiniped dagiti rienda a nairanta a mangsalaknib. Amin a kameng ti kongregasion naidagadag a repasuenda a siaannad dagiti kualipikasion a nailanad iti Biblia ket yebkasda babaen iti butos, saan a ti opinionda, no di ket daydiay patienda a pagayatan ti Apo. Yantangay dagidiay laeng “naan-anay a nakonsagraran” ti mabalin a bumutos, ti nagpupunipon a butosda, no igiya ti Sao ken espiritu ti Apo, minatmatanda nga isut’ ebkas ti pagayatan ti Apo iti dayta a banag. Nupay nalabit saan a naan-anay a nasiputan ni Kabsat Russell, daytoy a rekomendasionna ket mabalin a naimpluensiaan saan laeng a gaput’ determinasionna a di maitulad iti naitan-ok a klase klero no di pay ket iti mismo a sursurona idi agtutubo pay laeng idiay Congregational Church.

Idi a detaliado a sinalaysay manen ti tomo ti Millennial Dawn a napauluan The New Creation (naipablaak idi 1904) ti akem dagiti panglakayen ken ti wagas a pannakapilida, naitampok ti Aramid 14:23. Dagiti konkordansia nga inurnos da James Strong ken Robert Young naisitar kas autoridad tapno ti termino a “dinutokanda ida a panglakayen” (KJ) ket maipatarus koma a “binutosanda ida a panglakayen babaen iti panangitayag kadagiti ima.”d Dadduma pay a patarus ti Biblia kunaenda a dagiti panglakayen ‘nadutokanda babaen iti butos.’ (Ti Literal Translation of the Holy Bible ni Young; Ti Emphasized Bible ni Rotherham) Ngem siasinoda koma ti mangbutos?

Idi impakatdat’ panangmatmat a ti intero a kongregasion koma ti agbutos saan a naynay a nagresulta daytat’ kas ninamnamada. Dagidiay agbutos isuda koma dagitay “naan-anay a nakonsagrar,” ket dadduma kadagidiay nabutosan talaga a naragpatda dagiti Nainkasuratan a kualipikasion ket sipapakumbaba a nagserbida kadagiti kakabsatda. Ngem masansan a ti panagbubutos ad-adda nga imparangarangna ti personal a kaykayatda imbes a ti Sao ken espiritu ti Dios. Isu nga, idiay Halle, Alemania, idi a dagidiay agkalkalikagum nga agpanglakayen ket dida naala ti saad a kayatda, dakkel a riri ti pinataudda. Idiay Barmen, Alemania, naibilang kadagiti kandidato idi 1927 isu dagiti lallaki a mangbusbusor iti trabaho ti Sosiedad, ket napalalot’ panagririaw bayat ti panagitayagdat’ imada no tiempo ti butos. Isu a napilitan a sekreto a balota ti nausar.

Idi pay 1916, adu a tawen kasakbayan dagitoy, insurat ni Kabsat Russell, a napalalot’ pannakaseknanna: “Nakaam-amak ti mapaspasamak kadagiti dadduma a Klase no maangay ti eleksion. Dagiti adipen ti Iglesia agbalbalinda nga agtuturay, diktador​—a no dadduma kayatda ti agsaad a tserman ti gimong tapno masigurado nga isuda ken dagidiay gagayyemda ti mabutosan a Panglakayen ken Diakono. . . . Siuulimek pay nga igakat dagiti dadduma nga aprobetsarenda ti Klase babaen iti panangangaydat’ eleksion no daytay tiempo a paborable kadakuada ken kadagiti gagayyemda. Dagidiay met dadduma punuendat’ gimong kadagiti gagayyemda, nga iserrekda uray bale estranghero, nga awan met panggepda a tumabuno a regular iti Klase, no di ket umayda laeng a kas gagayyem a mangbutos kadagiti gayyemda.”

Masapul kadi a sursuruenda laeng ti nalinlinis a demokratiko a panagbubutos, wenno adda nailanad iti Sao ti Dios a dida pay la natarusan?

Organisado a Mangikasaba ti Naimbag a Damag

Idi pay la rugrugi, nabigbigen ni Kabsat Russell a ti maysa a kaskenan a rebbengen ti tunggal miembro ti Nakristianuan a kongregasion isut’ trabaho a panagebanghelio. (1 Ped. 2:9) Inlawlawag ti Watch Tower a saan laeng a ni Jesus no di kadagiti amin a napulotan iti espiritu a pasurotna ti nagaplikaran dagiti propetiko a sao ti Isaias 61:1, a kastoy: “Ni Jehova pinulotannak a mangibaga ti naimbag a damag,” wenno, sigun iti patarus ti King James Version iti teksto nga inadaw ni Jesus, “Pinulotannak a mangikasaba ti ebanghelio.”​—Luc. 4:18.

Idi pay la 1881, linaonen ti Watch Tower ti artikulo a “Kasapulan ti 1,000 a Mangaskasaba.” Kiddaw daytoy iti kada miembro ti kongregasion tapno mangusar iti kabaelanna a tiempo (kaguduat’ oras, maysa nga oras, wenno dua, wenno tallo) a mangisaknap iti kinapudno ti Biblia. Dagiti lallaki ken babbai nga awan pamilia a supsuportaranda a kabaelanda nga ipaay ti kagudua wenno ad-adu pay a tiempoda a maipamaysa iti trabaho ti Apo isudat’ naparegta a mangibaklay ti trabaho kas colporteur nga ebanghelista. Nagdudumat’ kaaduda iti tinawen, ngem idi 1885 addan agarup 300 a makiramraman iti trabaho kas colporteur. Dagiti dadduma nakipasetda met ngem mas limitado laeng ti orasda. Naited dagiti singasing kadagiti colporteur no kasanoda nga annongen ti trabahoda. Ngem nalawa idit’ tay-ak, isu nga idi rugrugi, isudat’ nangpili iti teritoriada ket nagalis-alisda nga ad-adda sigun iti kursonadada. Ket inton agsasarakda kadagiti kumbension, baliwanda dagiti banag a masapul tapno agaallot ti trabahoda.

Iti daydi tawen a nangrugi dagiti colporteur, nagpaimprenta ni Kabsat Russell kadagiti adu a tract (wenno bokleta) a maiwaras a libre. Karkarna kadagitoy isu daydi Food for Thinking Christians, a 1,200,000 ti dagup ti naiwaras iti immuna nga uppat a bulan. Ti trabaho a nainaig iti pannakaurnos ken pannakayimprenta ken pannakaiwaras daytoy isut’ rason a nakapormaan ti Zion’s Watch Tower Tract Society tapno adda mangasikaso kadagiti nasken a detalye. Tapno di masinga ti trabaho no kas pangarigan ta isu ket matay, ken tapno naurnos ti pannakataming dagiti donasion para iti trabaho, nagaplikar ni Kabsat Russell para iti legal a pannakairehistro ti Sosiedad, ket opisial a nairekord daytoy idi Disiembre 15, 1884. Daydin ti nakabuangayan ti kasapulan unay a legal nga ahensia.

Idi tiempo a kasapulanen, naipasdek dagiti sanga nga opisina ti Watch Tower Society kadagiti dadduma a daga. Ti immuna isu idiay Londres, Inglaterra, idi Abril 23, 1900. Ti simmaruno, idiay Elberfeld, Alemania, idi 1902. Dua a tawen kalpasanna, iti sabali a deppaar ti daga, naorganisa ti sanga nga opisina idiay Melbourne, Australia. Idi naisurat daytoy, addan 99 a sanga iti intero a lubong.

Nupay maporporma idin dagiti urnos ti organisasion a kasapulan tapno mapataud dagiti adu a literatura ti Biblia, idi damo makakaammo dagiti kongregasion iti lokal nga urnosda a mangiwaras iti publiko kadagitoy a pagbasaan. Sigun iti surat a napetsaan ti Marso 16, 1900, imbaga ni Kabsat Russell no kasanona a minatmatan dayta. Dayta a surat, a naiturong ken “Alexander M. Graham, ken iti Iglesia ti Boston, Mass.,” kunana: “Kas pagaammoyo amin, inkeddengko a palugodan ti tunggal kompania ti ilit’ Apo a mangtaming kadagiti bukodda a ganuat, sigun iti bukodda a pangngeddeng, nga agitukonak kadagiti singasing, saan a kas pangsinga, no di ket kas pammagbaga laeng.” Saan la a sinaklaw daytoy dagiti gimongda no di pay ket ti wagas ti ministerioda idiay tay-ak. Ngarud, kalpasan nga impaayna kadagiti kakabsat dagiti praktikal a balakad, ingngudona daytoy a komento: “Daytoy ket singasing laeng.”

Adda dagidi aktibidad a kasapulandat’ mas espesipiko a panangidirihir ti Sosiedad. Nainaig iti pannakaipabuya ti “Photo-Drama of Creation,” makaammo idi ti kada kongregasion no kayatda ken kabaelanda ti mangabang iti teatro wenno dadduma a pasilidad tapno maipabuyada dayta iti lugarda. Nupay kasta, nesesita idi a mailugan dagiti alikamen iti kada siudad, ket masapul a maurnos dagiti eskediol; isu a kasapulan nga idirihir a mismo daytoy ti Sosiedad. Naparegta ti kada kongregasion a maaddaan iti Komite ti Drama a mangasikaso kadagiti lokal nga urnos. Ngem adda superintendente nga imbaon ti Sosiedad a mangtaming a siaannad kadagiti detalye tapno masierto a naannayas ti pannagna dagiti amin a banag.

Bayat a naglabas dagiti tawen 1914 ken 1915, sinegseggaan unay dagidiay napulotan iti espiritu a Kristiano a maragpatdan ti nailangitan a namnamada. Naigiddato, naparegtada nga agbalin nga okupado iti serbisio ti Apo. Nupay minatmatanda nga ababan ti nabati a tiempoda iti lasag, bimmatad a tapno maituloyda ti naurnos a panangikasabat’ naimbag a damag, ad-addan a kasapulanda idit’ pannakaidirihir ngem idi sumagmamano a gasutda pay laeng. Di nagbayag kalpasan a ni J. F. Rutherford nagbalin a maikadua a presidente ti Watch Tower Society, napabaro dagiti pamay-an ti pannakaidirihir. Ti Marso 1, 1917, a ruar ti The Watch Tower inyanunsiona a, manipud ita, amin a teritoria a trabahuen dagiti colporteur ken dagiti pastoral a trabahadore kadagiti kongregasion itudingen ti opisina ti Sosiedad. No adda dagiti lokal a trabahador ken colporteur nga agpada a mangtamtaming iti kasta a tay-ak ti serbisio iti uneg ti siudad wenno distrito, ti komite ti distrito a lokal ti pannakadutokna isut’ mangbingbingay iti teritoriada. Daytoy nga urnos timmulong iti karkarna unay a pannakaiwaras ti The Finished Mystery iti unos lat’ sumagmamano a bulan idi 1917-18. Nakatulong met unay daydi iti napartak a pannakaiwaras ti 10,000,000 a kopia ti tract a nabileg ti panangibutaktaknat’ Kakristianuan babaen iti tema a “Ti Pannakatnag ti Babilonia.”

Di nagbayag kalpasan daytoy, naaresto dagiti administratibo nga opisial ti Sosiedad, ket idi Hunio 21, 1918, nasentensiaandat’ 20 a tawen a pannakaibalud. Gistay nagsardeng ti pannakaikasabat’ naimbag a damag. Daydi kadin ti tiempo a makikaykaysadan iti Apo iti nailangitan a dayag?

Sumagmamano a bulan kalpasanna, nagngudon ti gubat. Naluk-atan dagiti opisial ti Sosiedad iti sumuno a tawen. Kaskasdi a silalasagda pay laeng. Saan a kastat’ namnamaenda idi, ngem naamirisda a nalabit adda pay ipatrabaho ti Dios kadakuada ditoy daga.

Kalaslasatda unay dagiti grabe a pannakasuot ti pammatida. Nupay kasta, idi 1919, ti The Watch Tower pinakiredna ida gapu kadagiti makaparegta a Nainkasuratan a panagadal sigun iti tema a “Nagasat dagiti Natured.” Sinaruno daytoy ti artikulo a “Dagiti Gundaway iti Serbisio.” Ngem saan idi a nasirmata dagiti kakabsat dagiti nawadwad a pannakapasayaat ti urnos ti organisasion a maangayto kadagiti sumaruno a dekada.

Umiso nga Ehemplo Para iti Arban

Naamiris ni Kabsat Rutherford a nesesita ti umiso nga ehemplo para iti arban tapno ti trabaho agtultuloy nga agabante iti naurnos ken natunos a wagas, nupay nakaab-ababan ti tiempo. Dineskribir ni Jesus dagiti pasurotna kas karnero, ket dagiti karnero surotenda ti pastorda. Siempre, ni Jesus isut’ Nasayaat a Pastor, ngem usarenna met dagiti lallakay, wenno panglakayen, kas katulongan a mangipastor iti ilina. (1 Ped. 5:1-3) Dagita a panglakayen masapul a lallaki a makiramraman a mismo iti trabaho nga intuding ni Jesus ken mangparparegta kadagiti sabali nga aramidenda ti kasta. Masapul nga ikutanda a sipupudno ti espiritu ti panagebanghelio. Ngem, idi tiempo ti pannakaiwaras ti The Finished Mystery, adda dagiti panglakayen a nagkedked; adda pay dagiti dadduma a silalatak nga inupayda dagiti kakabsat a makiraman.

Idi 1919, adda napateg nga addang a nangkorehir itoy a situasion, idi a nairugi a naipablaak ti magasin a The Golden Age. Nagbanag daytoy a nabileg nga instrumento iti pannakaipablaak ti Pagarian ti Dios kas kakaisuna a manayon a solusion kadagiti problema ti sangatauan. Kada kongregasion a nagtarigagay a makiraman itoy nga aktibidad naawis a mangkiddaw iti Sosiedad iti pannakairehistro dayta kas “organisasion ti serbisio.” Ket adda direktor, wenno direktor ti serbisio a kas pangawag kenkuana idi, a saan a masapul a tinawen a mabutosan, a dinutokan ti Sosiedad.f Bilang lokal a pannakabagi ti Sosiedad, isut’ mangorganisa iti trabaho, mangituding iti teritoria, ken paregtaennat’ pannakiraman ti kongregasion iti panagserbi idiay tay-ak. Iti kasta, malaksid kadagiti panglakayen ken diakono a demokratikot’ pannakabutosda, nagandar ti sabali pay a klase nga urnos ti organisasion, urnos a nangbigbig iti pannakadutok manipud ruar ti lokal a kongregasion ken ad-adda nga inggunamgunamna ti pannakaikasaba ti naimbag a damag ti Pagarian ti Dios.g

Kadagiti simmaruno a tawen, napalalo a regget ti naiturong iti trabaho a pannakaiwaragawag ti Pagarian, a kasla induron ti di magawidan a puersa. Dagiti pasamak idi 1914 ken kalpasan dayta imbatadda a ti naindaklan a padto a nangdeskribiran ni Apo Jesu-Kristo ti panagngudo ti daan a sistema ket madaman a matungtungpal. Gapu itoy a lawag, idi 1920 imbatad ti The Watch Tower a sigun ti naipadto iti Mateo 24:14, daydin ti tiempo a panangiwaragawag ti naimbag a damag maipapan iti “panungpalan ti daan nga urnos dagiti banag ken ti pannakaipasdek ti pagarian ti Mesias.”h (Mat. 24:3-14) Kalpasan a tinabunuan dagiti Estudiante ti Biblia ti kumbension idiay Cedar Point, Ohio, idi 1922, nagawid dagiti delegado a sititinggaw kadagiti lapayagda ti replan nga: “Ipablaakyo, ipablaakyo, ipablaakyo, ti Ari ken ti pagarianna.” Ti akem dagiti pudno a Kristiano lallalo pay a bimmatad idi 1931 idi inanamonganda ti nagan a Saksi ni Jehova.

Nabatad a tinudingan ni Jehova dagiti adipenna iti trabaho a mabalin a pakiramananda amin. Narayray idi ti reaksionda. Adu dagiti napalalot’ panangbalbaliwda iti kabibiagda tapno maipamaysada ti amin a tiempoda itoy a trabaho. Uray met dagidi mangipapaay laeng iti paset ti tiempoda, nagadu kadakuadat’ nangbusbos iti agmalmalem iti tay-ak no ngudot’ lawas. Kas reaksionda iti pammaregta a linaon Ti Pagwanawanan ken ti Informant idi 1938 ken 1939, adu a Saksi ni Jehova idi a tiempo ti sipapasnek a nangbusbos ti 60 nga oras a panagserbi idiay tay-ak iti kada bulan.

Naibilang kadagidi naregta a Saksi isu dagiti nagadu a napakumbaba, debosionado nga adipen ni Jehova nga agserserbi kas panglakayen kadagiti kongregasion. Nupay kasta, kadagiti dadduma a lugar, idi 1920’s ken idi rugrugi ti 1930’s, adu met dagiti di immabuloy iti ideya nga isuamin ket makiraman koma iti panagserbi idiay tay-ak. Dagidi demokratikot’ pannakabutosda a panglakayen masansan nga isudat’ nangkritikar iti kinunat’ The Watch Tower a responsabilidad a kasabaan dagiti addat’ ruar ti kongregasion. Ti panagkitakit nga umimdeng iti sawen ti espiritu ti Dios kadagiti kongregasion, baeten iti Nasantuan a Kasuratan, no iti daytoy a banag isut’ nangtuben ti panagayus ti espiritu ti Dios kadagita a grupo.​—Apoc. 2:5, 7.

Adda dagiti addang idi 1932 a nangkorihir itoy a situasion. Ti ad-adda a nakaseknanda, saan a ti panagpasugnod dagidiay prominente a panglakayen wenno ti yiikay dagiti dadduma a miembro ti kongregasion. No di ket, ti tarigagayan dagiti kakabsat isut’ panangay-ayoda ken Jehova ken panangaramiddat’ pagayatanna. Maipuon iti dayta, ti Agosto 15 ken Setiembre 1 a ruar Ti Pagwanawanan (iti Ingles) dayta a tawen ingunamgunamda ti tema nga “Organisasion ni Jehova.”

Inlatak dagita nga artikulo a dagiti isuamin a pudpudno a kameng ti organisasion ni Jehova ar-aramidenda ti trabaho nga imbagat’ Saona a mairingpas iti daytoy a panawen. Indagadag dagita nga artikulo a ti Nakristianuan a kinapanglakayen saan a maysa a saad a pakaipuestuan ti maysa babaen iti pannakabutos no di ket kasasaad dayta a maragpat babaen iti naespirituan nga irarang-ay. Naigunamgunam unay ti inkararag ni Jesus a dagiti pasurotna “maymaysada koma”​—a naikaykaysa iti Dios ken ni Kristo, ket iti kasta agtutunosda amin a mangaramid iti pagayatan ti Dios. (Juan 17:21) Ket aniantot’ pagresultaanna? Insungbat ti maikadua nga artikulo a “tunggal natda agbalin a saksi iti dayta nagan ken pagarian ni Jehova a Dios.” Ti panangaywan saan a maipaakem iti asinoman a mangbaybay-a wenno agkitakit a mangaramid ti kabaelanna a makiraman iti panangasaba iti publiko.

Idiay pagnguduan ti maadal kadagitoy nga artikulo, naawis dagiti kongregasion a manganamong iti resolusion a mangipasimudaag a makikaykaysada iti daytoy. Iti kasta naipuera ti tinawen nga ar-aramiden ti kongregasion a panangbutos kadagiti lallaki nga agbalin a panglakayen ken diakono. Idiay Belfast, Irelandia Norte, a kas met kadagiti dadduma a lugar, dadduma kadagidi dati a “nabutosan a panglakayen” immikkatda; dagidi kakaduada a kimmanunong kadakuada pimmanawda met. Nagresulta daytoy iti irarasay ti bilang dagiti miembro ngem kimmired ti intero nga organisasion. Dagidi nagbati isuda dagidiay situtulok a mangibaklay iti Nakristianuan a rebbengen a panangaskasaba. Imbes a binutosanda dagiti panglakayen, dagiti kongregasion​—a demokratiko a wagas pay lat’ us-usarenda​—nangpilida iti komite ti serbisioi a buklen dagiti lallaki a nataengan iti naespirituan a siaaktibo a nakipaset iti panangasaba iti publiko. Nangbutos pay dagiti miembro ti kongregasion ti tserman a mangidaulo kadagiti gimong ken kasta met iti sekretario ken tesurero. Amin dagitoy ket lallaki nga aktibo a saksi ni Jehova.

Ita ta dagiti mangay-aywan ti kongregasion ket lallaki nga interesado saan nga iti personal a saad no di ket iti pannakairingpas ti trabaho ti Dios​—panangpaneknek iti nagan ken Pagarianna​—ken nasayaat nga ehemplo ti impakitada babaen iti mismo a pannakiramanda iti dayta, naannayasen ti panagandar ti trabaho. Nupay dida nga ammo idi, nagadu pay ti masapul nga aramiden, nasaksaknap pay a panangaskasaba ngem ti naaramidandan, dakkel a panangummong a dida napakpakadaan. (Isa. 55:5) Nakabatbatad nga isagsagana ni Jehova ida para iti daytoy.

Adda sumagmamanon a makitimtimpuyog idi kadakuada a mangnamnama nga agbiag nga agnanayon ditoy daga.j Nupay kasta, impadtot’ Biblia ti pannakaurnong ti dakkel nga umariwekwek (wenno, dakkel a bunggoy) nga isudantot’ lumasat iti um-umay a dakkel a rigat. (Apoc. 7:9-14) Idi 1935 nailatak ti kinasiasino daytoy dakkel nga umariwekwek. Nabalbaliwan ti pannakapili dagiti manangaywan idi 1930’s tapno ad-adda a nakasagana ti organisasion a mangtaming iti trabaho a panagurnong, panangisuro, ken panangsanay kadakuada.

Para kadagiti kaaduan a Saksi ni Jehova, daytoy napalawa a trabaho nakaay-ayat ti itatanorna. Bimmaro ti kayulogan ti ministerioda iti tay-ak. Nupay kasta, adda dagidiay di magagaran a mangasaba. Nagkedkedda, ket impambarda a santo la maurnong ti dakkel nga umariwekwek inton malpas ti Armagedon. Ngem ad-adu ti nakatarus a daytoy ket kanayonan nga oportunidad a pangipakitaandat’ kinasungdoda ken Jehova ken ti panagayatda iti padada a tao.

Kasano a naiyataday ti dakkel a bunggoy iti dayta porma ti organisasion? Naipakita kadakuada ti akem nga intuding ti Sao ti Dios nga iringpas dagiti napulotan iti espiritu a “bassit nga ipastoran,” ket siraragsakda a nagtrabaho a maitunos iti dayta nga urnos. (Luc. 12:32-44) Naadalda pay a, kas kadagiti napulotan iti espiritu, responsabilidadda nga iburay ti naimbag a damag kadagiti sabali. (Apoc. 22:17) Yantangay kayatdat’ agbalin a naindagaan nga iturayan ti Pagarian ti Dios, masapul nga umun-una dayta a Pagarian iti panagbiagda, ket masapul a sireregtada a mangipakaammo iti dayta kadagiti sabali. Tapno mayatadayda iti deskripsion ti Biblia kadagidiay makalasat iti dakkel a rigat agingga idiay baro a lubong ti Dios, masapul a tattao dagitoy nga “agpukpukkawda iti napigsa a timek, a kunkunada: ‘Ti pannakaisalakan utangtayo iti Diostayo, a situtugaw iti trono, ken iti Kordero.’” (Apoc. 7:10, 14) Idi 1937, bayat nga umad-adun ti bilangda ken agbataden ti regtada para iti Apo, naawisda met a tumulong a mangibaklay iti rebbengen a mangaywan ti kongregasion.

Nupay kasta, naipalagip kadakuada a ti organisasion ket kukua ni Jehova, saan ket a tao. Awan ti naglasinan dagiti natda a napulotan iti espiritu ken kadagiti kameng ti dakkel a bunggoy dagiti sabali a karnero. Masapul nga agtutunosda kas agkakabsat iti serbisio ni Jehova. Kas kinunan Jesus, “Adda pay dagiti sabali a karnerok, a saanda a naitipon itoy a pagtaraknan; dagidiay masapul nga iyegko, ket denggendanto ti timekko, ket agbalindanto a maymaysa nga arban, maymaysa a pastor.” (Juan 10:16) Agbatbatad idin ti kaitungpalan daytoy.

Naangay idin dagiti karkarna a panagbalbaliw iti uneg ti organisasion iti bale apagbiit a tiempo. Ngem addada pay kadi dagiti masapul a mabaliwan tapno dagiti ganuat dagiti kongregasion ket naan-anay a maitunosda kadagiti wagas ni Jehova kas nailanad iti naipaltiing a Saona?

Teokratiko nga Organisasion

Ti “teokrasia” kayuloganna “turay ti Dios.” Dayta kadi ti kitat’ turay nga agan-andar kadagiti kongregasion? Saanda kadi laeng a nagdaydayaw ken Jehova no di ket nagpaidalanda met kenkuana no kadagiti ganuat ti kongregasion? Naan-anay kadi a nakitunosda iti makunana kadagitoy a banag sigun iti naipaltiing a Saona? Ti artikulo nga “Organisasion” a dua a kapaset a nagparang iti Pagwanawanan ti Hunio 1 ken 15, 1938 (iti Ingles), kinunana a sibabatad: “Ti organisasion ni Jehova saan a pulos a demokratiko. Ni Jehova isut’ supremo, ket ti gobiernona wenno organisasionna namimpinsan a teokratiko.” Kaskasdi, kadagiti lokal a kongregasion dagiti Saksi ni Jehova idi a tiempo, demokratiko pay lat’ wagas a maan-annurot no iti pannakapili dagiti kaaduan a naisaad a mangaywan kadagiti gimong ken ti serbisio iti tay-ak. Maikanatad idi dagiti kanayonan pay a panagbalbaliw.

Ngem saan kadi nga impasimudaag ti Aramid 14:23 a dagiti panglakayen dagiti kongregasion ket maisaadda babaen iti ‘panangiyunnat ti ima,’ a kas maaramid no panagbutos? Ti immuna kadagiti artikulo ti Pagwanawanan a napauluan “Organisasion” binigbigna a kamalit’ dati a pannakatarusda itoy a teksto. Saan a ‘panangiyunnat ti ima’ dagiti amin a miembro ti kongregasion a naaramid ti pannakatuding kadagiti Kristiano idi umuna a siglo. Imbes ketdi, naipakita a, dagiti apostol ken dagidiay inautorisaranda isudat’ ‘nangiyunnat ti imada.’ Naaramid daytoy saan a babaen iti butos ti kongregasion no di ket iti panangipatay kadagiti imada kadagidiay kualipikado nga indibidual. Daytoy ti mangisimbolo iti pannakapasingked, pannakaanamong, wenno pannakadutok.k Dagidi nagkauna a kongregasion Kristiano no dadduma adda dagiti kualipikado a lallaki nga inrekomendarda, ngem ti ultimo a panangpili wenno pananganamong nagpannuray kadagiti apostol, a direktamente a tinudingan ni Kristo, wenno kadagidiay inautorisaran dagiti apostol. (Ara. 6:1-6) Inlawlawag Ti Pagwanawanan a kadagiti laeng suratna kadagiti responsable a manangaywan (a da Timoteo ken Tito) a ni apostol Pablo, iti sidong ti panangiturong ti nasantuan nga espiritu, nangted kadagiti instruksion a mangdutokda kadagiti manangaywan. (1 Tim. 3:1-13; 5:22; Tito 1:5) Awan kadagiti naipaltiing a surat a naiturong kadagiti kongregasion ti naglaon kadagiti kasta nga instruksion.

Kasano, ngarud, ti pannakaaramid ti agdama a pannakadutok dagiti agserbi iti kongregasion? Ti pananganag ti Pagwanawanan iti nateokratikuan nga organisasion impakitana manipud Kasuratan a ni Jehova dinutokanna ni Jesu-Kristo nga “ulo ti . . . kongregasion”; nga inton agsubli ni Kristo kas Maestro, ipuderna iti “matalek ken naannad nga adipen” “kadagiti amin a sanikuana”; a daytoy matalek ken naannad nga adipen buklen dagiti amin nga adda ditoy daga a napulotan iti nasantuan nga espiritu a makipagtawid ken Kristo ken nagkaykaysada nga agserbi iti sidong ti panangidirihirna; ket ni Kristo usarenna dayta a klase adipen kas instrumentona a mangipaay ti nesesita a pannakaaywan dagiti kongregasion. (Col. 1:18; Mat. 24:45-47; 28:18) Rebbengen ti klase adipen nga iyaplikar a sikakararag dagiti instruksion a sibabatad a nadakamat iti naipaltiing a Sao ti Dios, nga usarenda dayta a mangikeddeng no asinoda ti kualipikado kadagiti saad ti serbisio.

Yantangay ti makitkita nga instrumento nga usaren ni Kristo isu daytoy matalek ken naannad nga adipen (ket sigun kadagiti pasamak iti moderno nga aldaw a historia ipakitana a daytoy nga “adipen” us-usarenna ti Watch Tower Society kas legal nga ahensiana), inlawlawag Ti Pagwanawanan a ti teokratiko nga urnos kalikagumanna a dagiti pannakadutok ti serbisio maaramid babaen itoy nga ahensia. No kasano a dagiti kongregasion idi immuna a siglo binigbigda ti bagi a manarawidwid sadi Jerusalem, kasta met ita a dagiti kongregasion dida rumang-ay iti naespirituan no awan sentral a pannakaiwanwanda.​—Ara. 15:2-30; 16:4, 5.

Tapno umisot’ pannakamatmat iti relasion dagitoy, nupay kasta, nailawlawag a no Ti Pagwanawanan dakamatenna “Ti Sosiedad,” saan laeng a dayta legal nga ahensia ti tuktukoyenna, no di ket ti gunglo dagiti napulotan a Kristiano a nangipasdek iti dayta legal nga ahensia ken mangus-usar iti dayta. Gapuna a dayta nga ebkas itakderanna ti matalek ken naannad nga adipen agraman ti Bagi a Manarawidwidna.

Uray pay idi sakbay a rimmuar dagiti artikulo ti Pagwanawanan a napauluan “Organisasion” idi 1938, idi a dagiti kongregasion sadi Londres, Nueva York, Chicago, ken Los Angeles ket dimmakkelda agingga a kasapulanen a mabingbingayda iti babbabassit a grupo, kiniddawda idin a ti Sosiedad koma ti mangdutok kadagiti amin nga ad-adipenda. Ti Hunio 15, 1938 (iti Ingles), a ruar Ti Pagwanawanan inawisna amin a kongregasion a tuladenda koma dayta. Tapno maaramid ti kasta, naisingasing daytoy sumaganad a resolusion:

“Dakami, a kompania ti ili ti Dios a naala agpaay iti naganna, a masarakan ditoy . . . . . . . . . . . . , bigbigenmi a ti gobierno ti Dios ket talaga a teokrasia ket ni Kristo Jesus addan iti templo ket addaan naan-anay a panangiwanwan ken panangtengngel iti makitkita nga organisasion ni Jehova, agraman ti di makita, ket ‘TI SOSIEDAD’ isut’ makitkita a pannakabagi ti Apo ditoy daga, ket kiddawenmi ngarud a ‘Ti Sosiedad’ organisarenna daytoy a kompania para iti serbisio ket dutokanna dagiti nagduduma nga adipen ditoy, tapno dakam amin agtrabaho a sangsangkamaysa iti talna, kinalinteg, tunos ken naan-anay a panagtitimpuyog. Iratipmi ditoy ti listaan dagiti nagan dagiti kameng daytoy a kompania nga ipapanmi nga ad-addada a nataengan ket agparang ngarud nga isudat’ maikanatad unay a matudingan kadagiti nagduduma a saad a nadesignaran para iti serbisio.”l

Gistay amin a kongregasion dagiti Saksi ni Jehova sidadaanda nga immanamong itoy. Dagidi sumagmamano a nagkedked di nagbayag didan pulos rimmaman iti pannakaiwaragawag ti Pagarian ket iti kasta immikaydan a Saksi ni Jehova.

Pagsayaatan ti Teokratiko a Pannakaiturong

Nabatad a no dagiti sursuro, estandarte ti kondukta, ken dagiti urnos ti organisasion wenno panangasaba ket madisidiran a lokal, di agbayag mapukawton ti pakailasinan ken panagkaykaysa ti organisasion. Nalaklaka a masinasina dagiti kakabsat gaput’ sosial, kultural, ken nasional a paggigidiatan. Ti teokratiko a pannakaiturong, iti kasumbangirna, ipasiguradona a dagiti pagsayaatan manipud naespirituan a panagprogreso ket dumanon nga awan tubenna kadagiti amin a kongregasion iti intero a lubong. Iti kasta maaddanto ti napudno a panagkaykaysa nga inkararag ni Jesus nga agraira kadagiti pudno a pasurotna, ket ti trabaho a panagebanghelio nga imbilinna naan-anaytot’ pannakairingpasna.​—Juan 17:20-22.

Nupay kasta, indagadag dagiti dadduma a daytoy panangikagumaan a mabalbaliwan ti organisasion, pamuspusan laeng idi ni J. F. Rutherford tapno dakdakkel ti matengngelna kadagiti Saksi ket daytoy ti pamay-anna a mangipilit iti bukodna nga autoridad. Kasta kadi a talaga ti kaso? Di pagduaduaan a ni Kabsat Rutherford ket tao a nabileg ti kumbiksionna. Adda puersa ti panagsasaona ken dina inkompromiso ti kinapudno a patpatienna. Nalabit medio prangka no tamingenna dagiti situasion a no mailasinna a dagiti tattao ad-adda a maseknandat’ bagbagida imbes nga iti trabaho ti Apo. Ngem ni Kabsat Rutherford pudno unay a napakumbaba iti saklang ti Dios. Kas insurat, idi agangay, ni Karl Klein, a nagbalin a miembro ti Bagi a Manarawidwid idi 1974: “Dagiti kararag ni Kabsat Rutherford no kadagiti panagdaydayaw iti agsapa . . . isut’ nangayatak kenkuana. Nupay nakabangbangag ti timekna, no agkararag iti Dios kasla bassit nga ubing a makisarsarita ken tatangna. Anian a nagsayaat a relasion ken Jehova ti impalgak dayta!” Ni Kabsat Rutherford kumbinsido unay iti kinasiasino ti makitkita nga organisasion ni Jehova, ket inkagumaananna a siguraduen nga awan tao wenno grupo dagiti tao ti makabalin a mangtuben kadagiti lokal a kakabsat a naan-anay a mabenepisiaran iti naespirituan a taraon ken panangiturong nga inted ni Jehova kadagiti adipenna.

Nupay nagserbi ni Kabsat Rutherford iti 25 a tawen kas presidente ti Watch Tower Society ket impamaysana amin a pigsana a nangparang-ay iti trabaho ti organisasion, saan nga isut’ lider dagiti Saksi ni Jehova, ket dina idi kayat dayta. Idi naangay ti kumbension idiay St. Louis, Missouri, idi 1941, di nagbayag sakbay ti ipapatayna, impalawagnat’ maipapan iti liderato, a kunkunana: “Kayatko a maammuan ti asinoman nga estranghero ditoy ti kapanunotanyo maipapan iti tao kas lideryo, tapno dida malipatan. Tunggal adda rumsua a banag ken rumang-ay dayta, ibagada nga adda nalaing a lider dagita ket adut’ pasurotna. No adda asinoman kadakayo a dumdumngeg ita nga ipagarupna a siak, daytoy tao nga agtaktakder ditoy, isut’ lider dagiti saksi ni Jehova, sumungbatkayo ti Wen.” Karkarna a kinaulimek ti nadlaw, sa naburak dayta iti nakabatbatad a “Saan” a naggapu kadagiti dadduma a dumdumngeg. Intultuloy ti nagbitla: “No dakayo nga adda ditoy mamatikayo a maysaak la kadagiti adipen ti Apo, ket agtutunostayo ken agbibinnadang nga agserbi iti Dios ken agserbi ken Kristo, Wen kunayo.” Sangsangkatunos nga impukkaw dagiti dumdumngeg ti determinado a “Wen!” Iti sumuno a bulan adda dagiti nagasamblea idiay Inglaterra nga eksakto a kastat’ sungbatda.

Kadagiti dadduma a lugar nariknada a dagus dagiti gunggona ti teokratiko nga organisasion. Kadagiti dadduma, medio nabambannayat; dagidi rimsua a di nataengan, di napakumbaba nga ad-adipen naikkatda idi agangay, ket sabalin dagiti nadutokan.

Ngem, bayat nga ad-adda a naipasdek dagiti teokratiko a wagas, nagragsakan dagiti Saksi ni Jehova a nangsagrap ti naipadtot’ Isaias 60:17. Idi nagusar kadagiti simboliko a termino a mangiladawan kadagiti rimmang-ay a kasasaad a mapasaran dagiti adipen ti Dios, kuna sadiay ni Jehova: “Iti lugar ti suer mangyegakto ti balitok, ket imbes a landok mangyegakto ti pirak, ket imbes a kayo, ti suer, ken imbes a kadagiti bato, landok; ket tudingakto ti talna kas kadagiti manangaywanmo ket ti kinalinteg kas kadagiti mangpaannong kenka.” Saan a deskribiren daytoy ti aramidento dagiti tao, no di ket, daydiay aramiden a mismo ti Dios ken dagiti pagsayaatan nga awatento dagiti adipenna bayat nga agpasakopda iti Dios. Masapul nga agraira kadakuada ti talna. Ti ayat iti kinalinteg isu komat’ puersa a manggutugot kadakuada nga agserbi.

Manipud Brazil, ni Maud Yuille, asawa ti manangaywan ti sanga, nagsurat ken Kabsat Rutherford: “Ti artikulo nga ‘Organisasion’ iti Hunio 1 ken 15 [1938] a Towers tignayennak a mangiyebkas ti sumagmamano a sao kenka, a ti matalek a panagserbim us-usaren ni Jehova, ti panagyamanko ken Jehova gapu iti karkarna nga urnos nga inaramidna para iti makitkita nga organisasionna, kas naibalabala kadagitoy dua a Pagwanawanan. . . . Anian a pannakabang-ar a makita ti panagpatingga ti ‘Panangituray dagiti Aginlalaing’, agraman ‘kalintegan dagiti babbai’ ken dadduma pay a di nainkasuratan nga urnos nga inkapilitan a sumurot dagiti dadduma a tao kadagiti lokal nga opinion ken indibidual a pangngeddeng, imbes a [kada Jehova a Dios ken Jesu-Kristo], a nagbanag a pakaumsian ti nagan ni Jehova. Nupay pudno nga iti laeng ‘kallabes nga inawagan ti Sosiedad dagiti amin a kameng ti organisasion kas “ad-adipen”’, kaskasdi napaliiwko nga iti adun a tawtawen kasakbayanna, sigun kadagiti surat nga impatulodmo kadagiti kakabsat, imbilangmot’ bagim kas ‘kabsat ken adipenyo, babaen iti kinamanagparabur ti Apo’.”

Maipapan itoy a nagbalbaliwan ti organisasion, inreport ti sanga idiay Britania: “Ti naimbag nga epekto daytoy ket nakaskasdaaw. Ti naidaniw ken propetiko a pannakadeskribir daytoy idiay Isaias kapitulo sisenta napnot’ imnas ngem saan nga aglablabes. Amin nga adda iti kinapudno nagsasaritaanda daytoy. Isut’ topiko a pagtutungtonganda. Nagraira ti sapasap a rikna ti kinasaranta​—ti sidadaan a panangiyusuat iti nabileg a nasayaat ti pannakaiplanona a dangadang. Bayat a kumarkaro ti panagdandanag toy lubong, naglapusanan ti panagrag-oda iti nateokratikuan a turay.”

Dagiti Agdaldaliasat a Manangaywan Pakirdenda Dagiti Kongregasion

Ad-adda a limmagda dagiti singgalut ti organisasion kas resultat’ serbisio dagiti agdaldaliasat a manangaywan. Idi immuna a siglo, naisalsalumina ti iraraman ni apostol Pablo iti kasta nga aktibidad. No dadduma, nakiraman met dagiti lallaki a kas kada Bernabe, Timoteo, ken ni Tito. (Ara. 15:36; Fil. 2:19, 20; Tito 1:4, 5) Nareregtada amin idi nga ebanghelisador. Sa, pinaregtada dagiti kongregasion babaen kadagiti diskursoda. No rumsua dagiti isyu a mangapektar iti panagkaykaysa dagiti kongregasion, naisubmite dagitoy iti sentral a bagi a manarawidwid. Ket, “bayat a nagdaliasatda kadagiti siudad,” dagidiay nadutokan iti dayta a rebbengen “inyawatda kadagiti adda sadiay tapno salimetmetanda dagiti alagaden nga inkeddeng dagiti apostol ken dagiti panglakayen nga adda idiay Jerusalem.” Ti resultana? “Dagiti kongregasion nagtultuloyda a napabileg iti pammati ket immadu ti bilangda iti inaldaw-aldaw.”​—Ara. 15:1–16:5; 2 Cor. 11:28.

Uray idi pay laeng 1870’s, binisbisitan ni Kabsat Russell dagiti grupo dagiti Estudiante ti Biblia​—dagiti sagdudua ken saggatlo agraman dagiti daddadakkel a grupo​—tapno pabilgenna ida iti naespirituan. Addada met sumagmamano a kakabsat a nakiraman iti dayta idi 1880’s. Ket idi 1894, inyurnosen ti Sosiedad nga ibaon dagiti kualipikado a dumidiskurso a regular a tumulong kadagiti Estudiante ti Biblia tapno umadut’ pannakaammo ken panangapresiarda iti kinapudno ken tapno ad-adda a sumingedda iti maysa ken maysa.

No mabalin ti dumidiskurso makikadua iti grupo ti maysa wenno sumagmamano nga aldaw, agpalawag ti maminsan wenno mamindua ket kalpasanna, bisitaenna dagiti babbabassit a grupo ken indibidual tapno pagsasaritaanda dagiti naun-uneg a bambanag iti Sao ti Dios. Inkagumaananda a bisitaen iti maminduat’ makatawen ti kada grupo idiay Estados Unidos ken Canada, nupay saan nga isu met la nga isu a kabsat ti bumisita. Idi pinilida dagitoy nga agdaldaliasat a dumidiskurso, naigunamgunam ti kinaemma, kinapakumbaba, ken ti nalawag a pannakatarusdat’ kinapudno agraman kinasungdoda iti dayta ken ti abilidadda a mangisuro a buyogen iti kinabatad. Daydi a ministerioda pulos a di nasuelduan. Ipaayan la ida dagiti lokal a kakabsat iti taraon ken pagdagusan, ket no talaga a kasapulanda, tinulongan ida ti Sosiedad iti pasaheda. Pilgrim ti naiyawag idi kadakuada.

Adu kadagitoy nga agdaldaliasat a pannakabagi ti Sosiedad ti inay-ayat dagidiay nagserbianda. Ni A. H. Macmillan, maysa a Canadiano, malaglagip dagiti kakabsat a ti Sao ti Dios nagbalin kenkuana a “kasla sumsumged nga apuy.” (Jer. 20:9) Kasapulan a sarsaritaenna idi dayta, ket kastat’ inaramidna, a saan laeng nga idiay Canada ti nagdiskursuanna no di pay ket kadagiti adu a paset ti Estados Unidos ken dadduma pay a daga. Ni William Hersee, sabali pay a pilgrim, malaglagipda unay gaput’ naisangsangayan a panangasikasona kadagiti agtutubo. Dida met malipatan dagiti kararagna gapu ta iparangarangda ti nauneg nga espiritualidad a nangtignay nga agpadpada iti puso dagiti agtutubo ken lallakay.

Saan a nalaka ti panagbiahe dagiti pilgrim idi a tiempo. Kas pangarigan, tapno mabisitana ti grupo nga adda iti asideg ti Klamath Falls, Oregon, ni Edward Brenisen nagbiahe nga immuna babaen iti tren, santo nagpatpatnag babaen iti karuahe, sa kamaudiananna babaen iti makategteg-tulang a kariton idiay kabambantayan agingga a nagtengna ti talon a paggigimonganda. Iti parbangon, daydi aldaw kalpasan ti gimongda, adda kabsat a nangipabulod kenkuana iti kabalio a pagsakayanna iti agarup 100 kilometro tapno makagteng iti kaasitgan nga estasion ti tren ket mapan manen iti sumaruno a grupo a bisitaenna. Makabannog a biag daydi, ngem naimbag ti imbunga dagidi a bannog dagiti pilgrim. Kimmired ti ili ni Jehova, nagkaykaysa ti pannakaawatda iti Sao ti Dios, ket simmingedda iti maysa ken maysa nupay agaaddayoda.

Idi 1926, inyusuat ni Kabsat Rutherford ti panagbalbaliw ti trabaho dagiti pilgrim tapno saanda laeng nga agdaldaliasat a dumidiskurso no di ket agdaldaliasat a superbisor ken mangparang-ay iti panagserbi dagiti kongregasion idiay tay-ak. Tapno maigunamgunam ti baro a rebbengenda, idi 1928 naawaganda a direktor ti serbisio ti rehion. Nagserbida a kadua dagiti lokal a kakabsat, nga impaayanda idat’ personal nga instruksion iti serbisio idiay tay-ak. Idi a tiempo mabalinen a magtengda ti kada kongregasion idiay Estados Unidos ken kadagiti dadduma pay a daga iti agarup maminsan iti makatawen, bayat a sarungkaranda pay dagiti indibidual ken babbabassit a grupo a di pay naorganisar para iti panagserbi.

Bayat dagiti simmaruno a tawen, nadumadumat’ nagbalbaliwan ti trabaho dagiti agdaldaliasat a manangaywan.a Ad-adda pay a rimmegget idi 1938 idi nga amin nga adipen dagiti kongregasion ket teokratikon ti pannakadutokda. Ti regular a pannakabisita dagiti kongregasion kadagiti simmaganad a tawen isut’ nangted gundaway tapno personal a masanay ti kada nadutokan nga adipen ken ad-adu a tulong kadagiti isuamin para iti panagserbi idiay tay-ak. Idi 1942, sakbay a naibaon dagiti agdaldaliasat a manangaywan kadagiti kongregasion, limmasatda pay nga umuna iti nainget a panageskuela; kas resultana, dakdakkel ti panagpapada ti panangannongdat’ trabahoda. Nabiit laeng ti ibibisitada idi (maysa aginggat’ tallo nga aldaw, agdepende iti kadakkel ti kongregasion). Iti ibibisitada sinukimatda dagiti rekord ti kongregasion, minitingda dagiti amin nga adipen tapno itukon ti kasapulan a balakad, maysa wenno ad-adu pay a palawag ti indiskursoda iti kongregasion, ket indauluanda ti panagserbi iti tay-ak. Idi 1946 naiyatiddog dagita nga ibibisita iti makalawas kada kongregasion.

Daytoy nga urnos nga ibibisita kadagiti kongregasion nanayonan idi 1938 babaen iti serbisio ti adipen ti rehion a buyogen iti baro nga akem. Nalawlawa a lugar ti sinakupna, a kadarato busbosenna ti makalawas iti kada kabsat nga agdaldaliasat iti sona (sirkito) a mangbisita kadagiti kongregasion. Bayat ti bisitana isut’ agserbi iti programa ti asamblea a tabunuan dagiti amin a kongregasion a mangbukel iti sona.b Daytoy nga urnos ti nanggutugot unay kadagiti kakabsat ken nangipaay ti regular nga oportunidad tapno mabautisaran dagiti kabbaro nga adalan.

“Daydiay Mangayat iti Serbisio”

Maysa kadagiti nakiraman itoy a serbisio nanipud 1936 isu ni John Booth, nga idi 1974, nagbalin a kameng ti Bagi a Manarawidwid. Idi kinatungtongda a kas manamnama nga agdaldaliasat a superbisor, naibaga kenkuana daytoy: “Saan a dagidiay nasigo a dumidiskurso ti masapul, no di ket daydiay mangayat iti serbisio ken mangidaulo iti dayta ken serbisio ti idagadagna kadagiti gimong.” Ni Kabsat Booth kasta idit’ panagayatna iti panagserbi ken Jehova, kas paneknekan ti naregta a panagpayunirna nanipud 1928, ket ginutugotna ti regta a panagebanghelio kadagiti sabali babaen iti ehemplo ken kadagiti sao a pammaregta.

Ti immuna a kongregasion a binisitana, idi Marso 1936, isut’ Easton, Pennsylvania. Insuratna kalpasanna: “Masansan a sumangpetak iti maysa a lugar nga apaghusto nga agtataripnongdat’ panagserbi iti tay-ak iti agsapa, saakto mitingen dagiti adipen ti kompania no iti sardam sa kalpasanna palawagakon ti intero a kompania. Masansan a dua nga aldaw ti busbosek a kadua ti kompania ken maysa nga aldaw no kadagiti babbabassit a grupo, a no dadduma innem a kasta a grupo ti mabisitak iti makalawas. Kanayon nga agakar-akarak.”

Dua a tawen kalpasanna, idi 1938, isut’ nadutokan kas adipen iti rehion, tapno tamingenna ti asamblea ti sona (maawagan asamblea sirkito itan) kada lawas. Daytoy ti timmulong a nangpakired kadagiti kakabsat kadagidi tiempo a kumarkaro ti pannakaidadanes kadagiti dadduma a deppaar. Kas pananglagipna kadagidi nga aldaw ken kadagiti nagduduma a responsabilidadna, kinunan Kabsat Booth: “Daydi mismo a lawas [a nagtestigoak idiay korte iti kaso a nakainaigan ti agarup 60 a Saksi sadi Indianapolis, Indiana] siak ti naidarum iti sabali a kaso sadi Joliet, Illinois, inyabogaduak pay ti maysa a kabsat iti sabali a kaso sadi Madison, Indiana, ket, mainayon pay, tinamingko ti asamblea ti sona iti kada ngudot’ lawas.”

Dua a tawen kalpasan a naisubli dagitoy nga asamblea ti sona idi 1946 (asamblea sirkito itan), ni Carey Barber ti maysa kadagidiay naituding kas adipen ti distrito. Datin a kameng ti pamilia ti Bethel idiay Brooklyn, Nueva York, iti 25 a tawen. Ti immuna a distritona sinaklawna ti intero a makinlaud a deppaar ti Estados Unidos. Idi damo, agarup 1,600 kilometro ti kaadayo ti nagbabaetan dagiti asamblea a mabiahe kada lawas. Bayat nga immadu ti dagup ken kadakkel dagiti kongregasion, immasideg met dagita a distansia, ket adu nga asamblea sirkito ti masansan a naangay iti maymaysa laeng a dakkel a siudad. Kalpasan ti 29 a tawen a kapadasanna kas agdaldaliasat a manangaywan, naawis ni Kabsat Barber nga agsubli idiay sangalubongan a hedkuarter idi 1977 kas miembro ti Bagi a Manarawidwid.

No tiempo ti gubat ken nakaro a pannakaidadanes, masansan nga inrisgo dagiti agdaldaliasat a manangaywan ti wayawaya ken biagda tapno tamingen ti naespirituan a pagsayaatan dagiti kakabsatda. Bayat a sinakupan dagiti Nazi ti Belgium, intultuloy ni André Wozniak a binisita dagiti kongregasion ket tinulonganna ida a maaddaan abasto a literatura. Masansan nga isut’ inanup dagiti Gestapo ngem dida nagballigi a nangkemmeg kenkuana.

Idiay Rhodesia (Zimbabwe itan) idi arinunos ti 1970’s, agam-amak dagiti umili, ket napeggad ti agbiahe bayat nga adda gubat iti pagilian a mismo. Ngem dagiti agdaldaliasat a manangaywan dagiti Saksi ni Jehova, kas naayat a pastor ken manangaywan, nagbalinda a “kas paglemmengan a disso manipud iti angin” kadagiti kakabsatda. (Isa. 32:2) Sumagmamano kadakuadat’ nagnagna iti adu nga aldaw kadagiti let-ang, a sumang-at sumalog kadagiti bantay, a ballasiwenda dagiti napeggad a karayan, nga agpatnagda a maturog idiay kannag​—amin dagita tapno laeng madanonda dagiti naiputputong a kongregasion ken agibumbunannag, tapno paregtaenda ida nga agtalinaed a natibker iti pammati. Maysa kadagitoy isu ni Isaiah Makore, a bassit lat’ dina nakapaltogan idi simyag dagiti bala iti ngatuen ti ulona idi a naginkuentro dagiti soldado ti gobierno ken dagiti “mangilablaban iti wayawaya.”

Dagiti dadduma nga agdaldaliasat a manangaywan internasional a wagas ti panagserbida iti organisasion iti adu a tawtawen. Dagiti presidente ti Watch Tower Society masansan nga agbiaheda kadagiti sabali a daga tapno asikasuenda dagiti kasapulan ti organisasion ken tapno agpalawagda kadagiti kumbension. Dagita nga ibibisita adut’ nagapuananda a mangipalagip a sibabatad kadagiti Saksi ni Jehova iti isuamin a lugar nga internasional ti panagkakabsatda. Ni Kabsat Knorr naisangsangayan ti panangsurotna iti daytoy nga aktibidad iti regular a pamay-an, a binisitana ti kada sanga ken pagtaengan dagiti misionero. Bayat a dimmakkel ti organisasion, biningayda ti globo iti sangapulo nga internasional a sona, ket nangrugi idi Enero 1, 1956, dagiti kualipikado a kakabsat, babaen iti panangidirihir ti presidente, inrugidat’ timmulong iti daytoy a serbisio tapno regular ti pannakaasikasona. Dagita a panagbisita kadagiti sona, a maang-angayen babaen iti panangiturong ti Komite ti Serbisio iti Bagi a Manarawidwid, agtultuloy a tumulongda iti sangalubongan a panagkaykaysa ken iyaabante ti intero nga organisasion.

Adda pay dagiti napateg nga irarang-ay a timmulong iti agdama nga urnos ti organisasion.

Kanayonan a Teokratiko a Pannakaator

Idi ngalay ti Gubat Sangalubongan II, natay ni Joseph F. Rutherford, idi Enero 8, 1942, ket ni Nathan H. Knorr ti nagbalin a maikatlo a presidente ti Watch Tower Society. Napalalot’ pannakaparigat ti organisasion idi gaput’ pannakaipawil ti aktibidadna kadagiti adu a daga, kinaranggas dagiti nagderraaw a nagpammarang a patriotiko, ken ti pannakaaresto dagiti Saksi bayat a nagiwarasdat’ literatura ti Biblia no mangaskasabada iti publiko. Ti panagbaliw ti administrasion pabannayatenna kadi ti trabaho kabayatan ti napeggad a tiempo? Dagidi kakabsat a nangtaming kadagiti administratibo a banag nagpannuraydat’ panangiturong ken bendision ni Jehova. Maitunos iti panagtarigagayda iti nadiosan a giya, inusisada manen ti mismo nga urnos ti organisasion tapno makitada no adda ketdi benneg a mabalin nga ad-adda a makitunos kadagiti dalan ni Jehova.

Idi 1944, adda naangay nga asamblea serbisio sadi Pittsburgh, Pennsylvania, a nainaig iti tinawen a miting ti Watch Tower Society. Idi Setiembre 30, kasakbayan dayta tinawen a miting, naipalawag dagiti serye dagiti agkakapateg a diskurso no aniat’ kunaen ti Kasuratan maipapan iti organisasion dagiti adipen ni Jehova.c Naisentro ti atension iti Bagi a Manarawidwid. Iti dayta nga okasion naipaganetget a ti teokratiko a prinsipio masapul a maiyaplikar kadagiti amin nga ahensia nga us-usaren ti klase matalek ken naannad nga adipen. Nailawlawag a ti legal a korporasion saan a naimiembro dagiti amin a “nakonsagrar” nga ili ti Dios. Inrepresentarna laeng ida, nga agtignay kas legal nga ahensia para kadakuada. Nupay kasta, yantangay ti Sosiedad isut’ maus-usar nga agipablaak tapno maabastuan dagiti Saksi ni Jehova iti literatura a naglaon iti naespirituan a lawag, ti Bagi a Manarawidwid nainkalintegan ken nesesita a mainaig a sisisinged kadagiti opisial ken direktor dayta legal a Sosiedad. Maiyap-aplikar kadi a naan-anay dagiti teokratiko a prinsipio kadagiti aktibidadna?

Ti karta ti Sosiedad inlanadna ti kaadda dagiti aksionista (shareholder) a ti kada dagup a kontribusion a $10 (E.U.) palugodanna ti nagkontribusion a maaddaan iti maysa a butos nainaig iti pannakapili dagiti miembro ti konseho dagiti direktor ken opisial ti Sosiedad. Nalabit agparang a dagita a kontribusion ket ebidensia ti pudno a panaginteresda iti trabaho ti organisasion. Nupay kasta, addada problema a pinartuat daytoy nga urnos. Inlawlawag ni Kabsat Knorr, a presidente ti Sosiedad: “Sigun kadagiti probision ti karta ti Sosiedad, kasla agparang a ti panagbalin a maysa a kameng ti bagi a manarawidwid agdepende kadagiti mait-ited a kontribusion iti legal a Sosiedad. Ngem sigun iti pagayatan ti Dios saan a mabalin daytoy no kadagiti pudno a napili nga ilina.”

Pudno unay a ni Charles Taze Russell, nga iti damo a 32 a tawen ti Sosiedad isut’ kangrunaan a kameng ti bagi a manarawidwid, isut’ kaaduan iti pinansial, pisikal, ken mental a kontribusion iti Sosiedad. Ngem saan a ti kuarta nga inkontribusionna ti nangikeddeng no kasanot’ panangusar ti Apo kenkuana. Daydi naan-anay a dedikasionna, ti di agkupas a regtana, ti di maikompromiso a takderna para iti Pagarian ti Dios, ken ti di maisin a kinasungdo ken kinamatalekna isut’ nangtanda kenkuana iti imatang ti Dios a kas maikari iti dayta a serbisio. No maipapan iti teokratiko nga organisasion, agaplikar daytoy a pagalagadan: “Insaad ti Dios dagiti kameng ti bagi, tunggal maysa kadakuada, kas iti nagragsakanna.” (1 Cor. 12:18) “Nupay kasta,” inlawlawag ni Kabsat Knorr, “yantangay ti karta ti Sosiedad ipalubosna ti kalintegan nga agbutos kadagidiay agkontribusion iti pundo para iti trabaho ti Sosiedad, adda tendensiana a manglibeg wenno manggamgam iti daytoy Teokratiko a prinsipio a mainaig iti bagi a manarawidwid; ket agannayas met dayta iti panagpeggadna wenno iti panangtubenna iti dayta.”

Isut’ gapuna, nga iti daytoy a miting ti korporasion a tinabunuan dagiti amin nga aksionista a butante ti Sosiedad idi Oktubre 2, 1944, nagnunumuanda amin a rebisaren ti karta ti Sosiedad tapno itunosda nga ad-adda kadagiti teokratiko a prinsipio. Ti miembro saanen a malimitaran ti bilangda no di ket dumanon koman iti 300 inggat’ 500, a dagita ket lallakida amin a pinili ti konseho dagiti direktor, saan a gapu iti kuarta a maikontribusionda, no di ket gapu ta nataengan, aktibo, matalekda a Saksi ni Jehova nga agserserbi iti amin-tiempo iti trabaho ti organisasion wenno aktiboda a ministro kadagiti kongregasion dagiti Saksi ni Jehova. Dagitoy a miembro butosanda ti konseho dagiti direktor, sa ti konseho dagiti direktor isudat’ mangpili kadagiti opisialda. Nagepekto dagitoy baro nga urnos iti simmaganad a tawen, idi Oktubre 1, 1945. Anian a salaknib daytoy lallalo ta tiempo idi a dagiti komunkontra a benneg ket masansan nga immaniobrada dagiti ganuat ti korporasion tapno matengngelda dagita a korporasion sadanto baliwan ti porma dagita tapno maiyatadayda iti bukodda a gandat!

Bimmatad ti bendision ni Jehova kadagitoy nga iyaabante tapno kumompormeda kadagiti teokratiko a prinsipio. Nupay nakaro unay a pammarigat ti immapay iti organisasion kabayatan ti Sangalubongan a Gubat II, immadu ti bilang dagiti mangiwarwaragawag iti Pagarian. Awan sardayna, simamaingel nga intultuloyda nga inkasaba ti Pagarian ti Dios. Nanipud 1939 inggat’ 1946, adda karkarna nga irarang-ay a 157 porsiento iti ranggo dagiti Saksi ni Jehova, ket nakadanunda kadagiti innem pay a daga nga addaan naimbag a damag. Iti simmaganad a 25 a tawen, ti dagup dagiti aktibo a Saksi immadu iti gistay 800 porsiento a nainayon, ket adda kanayonan a 86 a dagdaga a regular a nangireport iti aktibidadda.

Naisangsangayan a Pannakasanay Dagiti Manangaywan

Adda dagiti managpaliiw a taga ruar a nagkuna a no dumakkelen ti organisasion, di maliklikan a lumulok met dagiti estandartena. Ngem no idilig, impadtot’ Biblia a ti kinalinteg ken kinatalna agrairanto kadagiti adipen ni Jehova. (Isa. 60:17) Kalikaguman dayta ti naannad ken agtultuloy nga edukasion iti Sao ti Dios dagiti responsable a manangaywan, ti nalawag a pannakatarus kadagiti nalinteg nga estandartena, ken ti awan sardayna a panangipakat kadagita nga estandarte. Naiwayaten ti kasta nga edukasion. Ti natarus a panangadal kadagiti nalinteg nga alagaden ti Dios progresibodan a nailanad iti Pagwanawanan, ket daytoy a material sistematiko nga inadalen ti kada kongregasion dagiti Saksi ni Jehova iti intero a lubong. Ngem, mainayon iti dayta, dagiti manangaywan iti arban ad-adu nga instruksion ti naited kadakuada.

Dagiti kangrunaan a manangaywan kadagiti sanga ti Sosiedad naummongda para iti naisangsangayan a pannakasanay no tiempo dagiti kumbension internasional. Nanipud 1961 inggat’ 1965, naikondukta kadakuada idiay Nueva York dagiti espesial pannakadiseniona a kurso ti eskuelaan a walo inggat’ sangapulo a bulan ti kawatiwatda. Nanipud 1977 inggat’ 1980, adda manen sabali a serye dagiti espesial a lima-lawas a kurso para kadakuada. Iti dayta a pannakasanay nairaman ti bersikulo-por-bersikulo a panangadalda kadagiti amin a libro ti Biblia agraman panangamiris kadagiti detalye ti organisasion ken dagiti pamuspusan tapno maparang-ay ti pannakaikasaba ti naimbag a damag. Awan nasionalistiko a pannakabingbingay dagiti Saksi ni Jehova. Sadinoman ti lugar a pagnanaedanda, parepareho a nangato nga estandarte ti Biblia ti salimetmetanda ken parepareho a banag ti patien ken isuroda.

Naisangsangayan met ti pannakaasikaso dagiti manangaywan ti sirkito ken distrito. Adu kadakuada ti nagraduar iti Watchtower Bible School of Gilead wenno maysa kadagiti Extension School dayta. Sagpaminsan, maummongda kadagiti sanga nga opisina ti Sosiedad, wenno agtataripnongda kadagiti kumbiniente a lugar, tapno agseminarda iti sumagmamano nga aldaw wenno makalawas.

Idi 1959 nagandar ti sabali pay a naisalsalumina a probision. Isu daytoy ti Eskuelaan ti Ministerio ti Pagarian, a tinabunuan dagiti manangaywan ti sirkito ken distrito agraman dagiti manangaywan ti kongregasion. Makabulan a kurso dayta idi nangrugi. Kalpasan a nausar iti makatawen idiay Estados Unidos, naipatarus ti libro dayta a kurso kadagiti dadduma a pagsasao ket nagin-inut a nausar iti intero a globo. Yantangay ta di mabalinan dagiti amin a manangaywan ti agbakasion iti panggedanda iti makabulan, adda naiyurnos a dua-lawas a bersion dayta a kurso a nangrugi idi 1966.

Saan a seminario daytoy nga eskuelaan a pakasanayan dagiti lallaki sakbay a maordinanda. Dagidiay timmabuno itoy nga eskuelaan datidan nga ordinado a ministro. Adu kadakuada ti manangaywan ken papastoren ti arban iti adu a dekada. Ti kursoda nangted gundaway tapno detaliado a pagsasaritaanda dagiti instruksion manipud Sao ti Dios maipapan iti trabahoda. Naigunamgunam unay ti kinapateg ti ministerio idiay tay-ak ken no kasanot’ epektibo a panangaramid iti dayta. Gaput’ panagbalbaliw dagiti moral nga estandarte ti lubong, nawadwad met a tiempo ti nabusbos tapno pagsasaritaan ti pannakaitandudo dagiti estandarte ti Biblia no iti moralidad. Kadagiti kallabes a tawen sinaruno daytoy a kurso dagiti seminar kada dua wenno tallo a tawen, agraman dagiti makatulong a miting nga inkondukta dagiti agdaldaliasat a manangaywan kadagiti lokal a panglakayen iti adu a daras iti kada tawen. Daytoy ti nangiwayat iti gundaway a panangasikaso kadagiti agdama a problema. Dagitoy ti nangtuben iti pannakaitawtawda kadagiti estandarte ti Biblia, ket timmulongda iti sangsangkapada a pannakataming dagiti situasion a rumsua kadagiti amin a kongregasion.

Ipapuso dagiti Saksi ni Jehova ti naibalakad iti 1 Corinto 1:10: “Dawatek kadakayo, kakabsat, gapu iti nagan ni Apotayo a Jesu-Kristo a sawenyo amin koma ti maymaysa a banag, ket awan koma dagiti panaglalasin kadakayo, no di ket naan-anay koma ti panagtitimpuyogyo iti maymaysa nga isip ken iti maymaysa a kapanunotan.” Saan a puersado nga ikukumporme daytoy; agresulta daytoy iti pannakasursuro kadagiti dalan ti Dios kas nairekord iti Biblia. Pagragsakan dagiti Saksi ni Jehova dagiti dalan ti Dios ken dagiti panggepna. No adda asinoman a dinan pagragsakan ti agbiag sigun kadagiti estandarte ti Biblia, siwayawayada a pumanaw iti organisasion. Ngem no adda asinoman a mangikasaba iti sabali a sursuro wenno di mangikankano iti moralidad ti Biblia, agaksion dagiti manangaywan tapno masaluadan ti arban. Iyaplikar ti organisasion ti balakad ti Biblia: “Kitaenyo dagidiay mamataud kadagiti panagsisina ken pakaitibkolan a maisalungasing kadagiti sursuro nga inadalyo, ket umadayokayo kadakuada.”​—Roma 16:17; 1 Cor. 5:9-13.

Impadtot’ Biblia a ti Dios partuatenna ti kasta a kasasaad kadagiti adipenna, kasasaad a ti kinalinteg isut’ agraira ken mamataud kadagiti natalna a bunga. (Isa. 32:1, 2, 17, 18) Dagita a kasasaad makaallukoy unay kadagidiay tattao nga agayat iti nalinteg.

Mano kadagita a managayat iti kinalinteg ti maummong sakbay ti panungpalan daytoy daan a sistema? Saan nga ammo dagiti Saksi ni Jehova. Ngem ni Jehova ammona no aniantot’ kasapulan daytoy trabahona, ket sigun iti bukodna a tiempo ken iti bukodna a wagas siguraduenna a ti organisasionna ket nakabalan a mangtaming iti dayta.

Panagsagana Para iti Napartak nga Irarang-ay

Idi a madamat’ panagsirarakda kas pannakaisagana ti libro nga Aid to Bible Understanding iti sidong ti panangiwanwan ti Bagi a Manarawidwid, ad-adda manen nga inasikasoda ti wagas a pannakaorganisar ti kongregasion Kristiano idi immuna a siglo. Siaannad nga inadalda dagiti termino ti Biblia kas iti “panglakayen,” “manangaywan,” ken “ministro.” Mabalin ngata a ti moderno-nga-aldaw nga organisasion dagiti Saksi ni Jehova ket ad-adda a kumomporme iti padron a nailanad kadagiti Kasuratan a kas giya?

Determinado idi dagiti Saksi ni Jehova nga agparbeng iti nadibinuan a direksion. Idi naangay ti serye dagiti kumbension idi 1971, naasikaso dagiti urnos a pannakatarawidwid ti nagkauna a kongregasion Kristiano. Nailawlawag a ti ebkas a pre·sbyʹte·ros (lakay, panglakayen), kas nausar iti Biblia, saan a limitado laeng kadagiti lallakay, ket di met nagaplikar kadagiti isuamin a kameng ti kongregasion a nataengan iti naespirituan. Ad-adda a nausar daytoy iti opisial a kayulogan a nainaig kadagiti manangaywan dagiti kongregasion. (Ara. 11:30; 1 Tim. 5:17; 1 Ped. 5:1-3) Inawat dagitoy dagiti saadda babaen iti pannakadutok, kas maitunos kadagiti pagalagadan a nagbalin a paset dagiti naipaltiing a Kasuratan. (Ara. 14:23; 1 Tim. 3:1-7; Tito 1:5-9) No la ket ta adda umdas a kualipikado a lallaki, nasursurok ngem maysa idi ti panglakayen ti kongregasion. (Ara. 20:17; Fil. 1:1) Dagitoy ti nangbukel “ti bagi dagiti panglakayen,” nga addaanda amin iti agpapada nga opisial a saad, ket awan kadakuada ti mas prominente wenno mannakabalin a miembro ti kongregasion. (1 Tim. 4:14) Tapno adda tumulong kadagiti panglakayen, nailawlawag nga addada met dagiti nadutokan a “ministerial nga ad-adipen,” sigun kadagiti pagalagadan nga inlanad ni apostol Pablo.​—1 Tim. 3:8-10, 12, 13.

Dagdagus a naipakat dagitoy nga urnos tapno ti organisasion ket ad-adda a maikumporme iti daytoy a padron ti Biblia. Nangrugi dagitoy iti mismo a Bagi a Manarawidwid. Nanayonan dagiti pito a dati a miembrona nga isuda, kas miembro ti konseho dagiti direktor ti Watch Tower Bible and Tract Society of Pennsylvania, isuda idit’ nagserbi kas bagi a manarawidwid para kadagiti Saksi ni Jehova. Awanen ti naipiho a bilang dagiti miembro ti Bagi a Manarawidwid. Idi 1971, 11 ti dagupda; adda sumagmamano a tawen a dimmanonda iti 18; idi 1992, adda 12. Isuda amin ket lallaki a pinulotan ti Dios kas makipagtawid ken Jesu-Kristo. Dagiti 12 nga agserserbi kas miembro ti Bagi a Manarawidwid idi 1992 adda dagup a rekordda a nasurok a 728 a tawen ti panagserbida iti amin-tiempo kas ministro ni Jehova a Dios.

Inkeddengda idi Setiembre 6, 1971, a ti tserman kadagiti miting ti Bagi a Manarawidwid masapul nga agrikos a tinawen sigun iti alpabetiko nga urnos ti apeliedo dagiti miembrona. Aktual a nagepekto daytoy idi Oktubre 1. Dagiti miembro ti Bagi a Manarawidwid nagsusublatda met, iti linawas, a nangidaulo iti panagdaydayaw iti agsapa ken ti Panagadal iti Pagwanawanan dagiti agtartrabaho idiay hedkuarter.d Daytoy nga urnos nagepekto idi Setiembre 13, 1971, idi a ni Frederick W. Franz isut’ nangidaulo iti programa ti binigat a panagdaydayaw idiay hedkuarter ti Sosiedad sadi Brooklyn, Nueva York.

Iti sumuno a tawen, naisaganan ti pannakabalbaliw ti pannakaaywan dagiti kongregasion. Saan laengen a maymaysa ti adipen ti kongregasion a tultulongan ti espesipiko a bilang dagiti dadduma pay nga adipen. Dagiti lallaki a kualipikado sigun iti Kasuratan madutokanda nga agserbi kas panglakayen. Dagiti dadduma, a makaragpat kadagiti pagalagadan ti Biblia, madutokanda kas ministerial nga adipen. Daytoy ti nangwaknit iti dana tapno ad-adu ti mangibaklay kadagiti responsabilidad iti kongregasion ket iti kasta magun-odda dagiti napateg a kapadasan. Awan kadagiti Saksi ni Jehova idi ti nakapanunot a ti dagup dagiti kongregasion ket umadunto iti 156 porsiento iti sumaganad a 21 a tawen, nga agdagupda ti 69,558 iti 1992. Ngem ti Ulo ti kongregasion, ni Apo Jesu-Kristo, nabatad a sagsaganaanna idin ti mapasungad.

Idi rugrugi ti 1970’s, siaannad nga inut-utobda ti kanayonan pay a re-organisasion ti Bagi a Manarawidwid. Nanipud idi naaramid a korporasion ti Watch Tower Society idi 1884, ti panagipablaak kadagiti literatura, ti pannakatarawidwid ti sangalubongan a panagebanghelio, ken dagiti urnos para kadagiti eskuelaan ken kumbension ket nataming amin iti sidong ti panangidirihir ti opisina ti presidente ti Watch Tower Bible and Tract Society. Ngem kalpasan ti naannad a pananganag ken panangusisa kadagiti detalye iti las-ud ti adu a bulbulan, adda baro nga urnos a nagaanamonganda amin idi Disiembre 4, 1975. Naporma dagiti innem a komite ti Bagi a Manarawidwid.

Ti Komite ti Tserman (a buklen ti agdama a tserman ti Bagi a Manarawidwid, ti kallabes a tserman, ken ti sumuno a tserman) awatenna dagiti report maipapan kadagiti dadakkel nga emerhensia, didigra, ken kampania ti panangidadanes, ket siguraduenna a dagdagus nga asikasuen dagitoy ti Bagi a Manarawidwid. Ti Komite ti Panagsurat iwanwanna ti pannakaisurat, pannakairekord iti casette, ken pannakai-video dagiti naespirituan a taraon para kadagiti Saksi ni Jehova ken ti pannakaiwaras dagita iti publiko, ket aywananna ti pannakaipatarus dagita kadagiti ginasut a pagsasao. Rebbengen ti Komite ti Panangisuro ti pannakaiwanwan dagiti eskuelaan ken asamblea, agraman dagiti kumbension distrito ken internasional, para iti ili ni Jehova, agraman dagiti instruksion para iti pamilia ti Bethel ken ti panakabalabala dagiti material a mausar kadagita a panggep. Ti Komite ti Serbisio iwanwanna amin a paset ti trabaho a panagebanghelio, agraman aktibidad dagiti kongregasion ken dagiti agdaldaliasat a manangaywan. Ti pannakaiyimprenta, pannakaipablaak, ken pannakaipaktora dagiti literatura agraman panagandar dagiti paktoria ken ti pannakataming dagiti legal a problema ken problema ti korporasion iwanwan amin ti Komite ti Panagipablaak. Ket ti Komite ti Personnel aywananna dagiti urnos para iti personal ken naespirituan a tulong kadagiti kameng dagiti pamilia ti Bethel ken rebbengennat’ agawis kadagiti kabbaro a kameng nga agserbi kadagiti pamilia ti Bethel iti intero a lubong.

Nadutokan pay dagiti kanayonan a tumulong a komite a mangaywan kadagiti paktoria, dagiti pagtaengan a Bethel, ken dagiti hasienda a nainaig iti sangalubongan a hedkuarter. Kadagitoy a komite sibubulos nga usaren ti Bagi a Manarawidwid dagiti abilidad dagiti kameng ti “dakkel a bunggoy.”​—Apoc. 7:9, 15.

Nabaliwan met ti pannakaiwanwan dagiti sanga ti Sosiedad. Nanipud Pebrero 1, 1976, kada sanga ti inaywananen ti komite a buklen ti tallo wenno ad-adu a miembro, agdepende kadagiti kasapulan ken kadakkel ti sanga. Agandar dagitoy iti sidong ti panangidirihir ti Bagi a Manarawidwid bayat a tamingendat’ trabaho ti Pagarian iti lugarda.

Idi 1992, adda nainayon a badang nga inyurnos ti Bagi a Manarawidwid idi a nadutokan ti sumagmamano a tumulong, a naggapu nga ad-adda kadagiti kameng ti dakkel a bunggoy a makiraman kadagiti miting ken trabaho dagiti komite ti Panagsurat, Panangisuro, Serbisio, Panagipablaak, ken ti Personnel.e

Ti kastoy a pannakaiwaras dagiti rebbengen nagbanag a pakagunggonaan unay. Malaksid kadagiti panagbalbaliw a naiwayaten kadagiti kongregasion, timmulong daytoy iti panangipuera iti aniaman a tuben a mangitawtaw kadagiti indibidual a mangapresiar a ni Kristo isut’ Ulo ti kongregasion. Nagbanag a makagungona unay no adu a kakabsat a lallaki ti agbibinnalakad no kadagiti problema a mangapektar iti trabahot’ Pagarian. Sa, ti kastoy a re-organisasion impamuspusanna nga ipaay ti nesesita a pannakaaywan kadagiti adu a lugar a makasapul unay iti kasta bayat ti periodo a napasamak ti napalalot’ peggesna nga irarang-ay ti organisasion. Idi pay la ugma, impadton ni Jehova baeten ken propeta Isaias: “Daydiay bassit a mismo agbalinto a sangaribo, ket ti kabassitan maysa a maingel a nasion. Siak a mismo, ni Jehova, aramidekto a nadaras iti panawenna.” (Isa. 60:22) Saanna laeng a pinadaras no di ket intedna pay ti nesesita a panangidirihir tapno ti makitkita nga organisasionna ket mabaelanna a tamingen dayta.

Ti madagdagus a paginteresan dagiti Saksi ni Jehova isu dayta trabaho nga inted ti Dios kadakuada kadagitoy ultimon nga al-aldaw toy daan a lubong, ket organisadodan unay a mangiringpas iti dayta. Dagiti Saksi ni Jehova makitada dagiti sigurado nga ebidensia a daytoy nga organisasion saan a kukua ti tao no di ket iti Dios ket ti mismo nga Anak ti Dios, a ni Jesu-Kristo, isut’ mangidirdirihir iti dayta. Kas agturturayen nga Ari, saluadanto ni Jesus dagiti matalek nga iturayanna a lumasat iti um-umay a dakkel a rigat ket siguraduenna nga epektibo ti pannakaorganisarda a mangiringpas iti pagayatan ti Dios bayat ti umay a Milenio.

[Dagiti Footnote]

Nanipud 1938 inggat’ 1941, dagiti adipen ti rehion, iti kabbaro nga akemda, nagserbida a regular kadagiti lokal nga asamblea, a dagiti Saksi manipud iti limitado a lugar (maysa a sona) nagtataripnongda para iti espesial a programa. Idi naisubli daytoy a trabaho idi 1946, dagitoy nga agdaldaliasat a manangaywan naawaganda kas adipen ti distrito; itan, manangaywan ti distrito.

[Blurb iti panid 204]

Awan lugarna kadakuada ti klase klero

[Blurb iti panid 205]

Dida impadas nga ipasdek ti “naindagaan nga organisasion”

[Blurb iti panid 206]

Kasanot’ pannakapili dagiti panglakayen?

[Blurb iti panid 212]

Direktor a dinutokan ti Sosiedad

[Blurb iti panid 213]

Dadduma a papanglakayen dida kayat ti mangasaba iti ruar ti kongregasion

[Blurb iti panid 214]

Rimmasay ti bilangda ngem kimmired ti organisasion

[Blurb iti panid 218]

Kasano a maaramid dagiti pannakadutok?

[Blurb iti panid 220]

Kayat laeng kadi ni Rutherford a dakdakkel ti matengngelna?

[Blurb iti panid 222]

Pannakilangen kadagiti sagdudua ken saggatlo agraman kadagiti daddadakkel a grupo

[Blurb iti panid 223]

Baro a rebbengen dagiti agdaldaliasat a manangaywan

[Blurb iti panid 234]

Napalawa a Bagi a Manarawidwid buyogen ti agrikos a panangitserman

[Blurb iti panid 235]

Nesesita a panangaywan iti periodo ti napegges nga irarang-ay

[Kahon iti panid 207]

Apay a Nagbalbaliw?

Idi sinaludsodda no apay binaliwannat’ panangmatmatna iti pannakapili dagiti panglakayen kadagiti nadumaduma a grupo ti ili ti Apo, insungbat ni C. T. Russell:

“Umuna ipasiguradok a dagus kadakayo a sigud a diak inako a saanak nga agkamali. . . . Dikam ilibak a manaynayonan pay ti pannakaammomi, ket ita adda makitami a sangkabassit a naggidiatan ti lawag ti pagayatan ti Apo no maipapan kadagiti Panglakayen wenno lider dagiti nadumaduma a babassit a grupo ti ilina. Ti nagkamalianmi isut’ sobra a pananginanamami kadagiti ingungoten a kakabsat a, gapu ta nasapada a naammuan ti Kinapudno, nagbalinda a natural a lider dagitoy babassit a kompania. Ti karkarna a panangmatmatmi kadakuada a kaay-ayomi a sinalimetmetan a ta, ti pannakaammodat’ Kinapudno isut’ namagpakumbaba kadakuada, a laglagipenda ti kinanumoda, ket aniaman ti ammoda ken kabaelanda nga idatag kadagiti sabali ket maigapu ta isuda dagiti pannakangiwat ken us-usaren ti Dios. Ninamnamami unay a dagitoy ket agbalinda a nasayaat nga ehemplo iti arban; ket no sigun iti panangiwanwan ti Apo addanto itedna iti dayta bassit a kompania a maysa wenno ad-adu pay a kasta met la a makabael, wenno ad-adda pay a makabael, a mangidatag iti Kinapudno, ti espiritu ti ayat ti mangiturongto koma kadakuada a mangpadayaw iti maysa ken maysa, ket iti kasta matulongan ken maidagadag iti maysa ken maysa ti pannakiramanda iti serbisio ti Iglesia, ti bagi ni Kristo.

“Gapu ta kastoy ti kapanunotanmi impapanmi a dagiti nawadwad a kinamanagparabur ken kinapudno a rimsua itan ken tagtagipatgen ti nakonsagrar nga ili ti Apo isut’ makagapu a saanmi a sinuroten ti wagas a binalabala dagidi apostol iti nagkauna nga Iglesia. Ti nagkamalianmi isut’ saanmi a panangbigbig a dagiti urnos a binalabala dagiti apostol babaen iti nadibinuan a panangiwanwan ket natantan-ok ngem ti aniaman a pinorma ti sabali, ket ti Iglesia no iti sapasap kasapulanto a surotenda dagiti alagaden nga inyusuat dagidi apostol agingga, nga inton mabalbaliwantayon gaput’ panagungar, agbalintayto amin a naan-anay ken perpekto ket direktamente a makitimpuyog iti Maestro.

“Nagin-inut a limmawag kadakam ti kamalimi idi a madlawmi kadagiti ingungoten a kakabsat ti medio kaadda ti espiritu ti panagsasalisal, ken ti tarigagay kadagiti adu a mangmatmat iti panagbalin a lider kadagiti gimong a kas maysa a saad imbes ket a maysa a serbisio, ken ti panangilaksid ken panangtuben iti irarang-ay kas panagbalin a lider dagiti dadduma a kakabsat a natural nga umarngi ti abilidadda ken pumatas ti pannakaammodat’ Kinapudno ken ti pannakabaelda a mangipakat iti kampilan ti Espiritu.”​—“Zion’s Watch Tower,” Marso 15, 1906, p. 90.

[Kahon/Dagiti ladawan iti panid 208, 209]

Dagiti Pasilidad nga Inusar ti Sosiedad Itay Napan a Siglo Idiay Pittsburgh

Ti Bible House, a makita ditoy, nagserbi kas hedkuarter iti 19 a tawen, nanipud 1890 inggat’ 1909f

Ditoy idit’ pagad-adalan ni Kabsat Russell

Dagiti kameng ti pamilia ti Bible House a nagserbi ditoy idi 1902

Ti patakder inramanna dagiti departamento ti “typesetting” ken “composition” (makinngato a kannawan), departamento ti pagipaktoraan (makimbaba a kannawan), bodega ti literatura, pagturogan dagiti kameng ti pamilia, ken kapilia (assembly hall) nga aglaon ti agarup 300

[Footnote]

[Kahon iti panid 211]

Makintrabaho iti Dayta?

Idi arinunosen ti naindagaan a panagbiagna, insurat ni Charles Taze Russell: “Masansan a malipatan ti ili ti Dios a ti Apo a mismot’ mangidadaulo iti trabahona. Masansan a kastoy ti kapanunotanda, Iringpasmi ti trabaho ket allukoyenmi ti Dios a makibinnadang kadakami itoy a trabaho. Alaentay komat’ umiso a panangmatmat, ket tarusantayo a ti Dios adda panggepna ket iringringpasna ti dakkel a trabaho; ket dayta agballiginto, nga interamente, a di agpannuray kadatayo ken iti bannogtayo; ket dakkel a pribilehio ti naited iti ili ti Dios tapno makibinnadangda iti Nangaramid kadakuada iti pannakairingpas dagiti planona, dagiti diseniona, dagiti urnosna, iti wagasna. No kastoy ti panangmatmattayo, ti ikararagtayo ken seggaantayo isut’ intay panangammo ken panangaramid iti pagayatan ti Apo, a kontentotay no ania man ti ipaakemna kadatayo, yantangay ti Diostayo isut’ mangiturturong kadatayo. Isu daytoy ti programa nga inkagkagumaan a suroten ti Watch Tower Bible and Tract Society.”​—“The Watch Tower,” Mayo 1, 1915.

[Kahon/Ladawan iti panid 215]

Salsaludsod Para iti V.D.M.

Dagiti letra a V.D.M. irepresentarda dagiti sao a Latin a “Verbi Dei Minister,” wenno Ministro ti Nadibinuan a Sao.

Adda insagana ti Sosiedad a listaan dagiti saludsod maipapan kadagiti Nainkasuratan a banag idi 1916. Dagidiay mangirepresentar ti Sosiedad a kas dumidiskurso nakalikaguman nga isuratdat’ sungbatda iti kada saludsod. Daytoy ti nangtingitingan ti Sosiedad kadagiti kapanunotan, opinion, ken pannakaawat dagitoy a kakabsat no maipapan kadagiti pamunganayan a kinapudno ti Biblia. Adda konseho kadagiti opisina ti Sosiedad a nangusig a siaannad kadagiti naisurat a sungbat. Dagidi nabigbig a kualipikado nga agdiskurso masapul a ti sungbatda ket umiso iti 85 porsiento wenno nangatngato pay.

Kalpasan dayta, adu a panglakayen, diakono, ken dadduma nga Estudiante ti Biblia ti nagkalikagum no mabalin a maaddaandat’ listaan dagiti saludsod. Idi agangay, naibilin a nasaysayaat no dagiti klase ket pilienda kas representanteda dagidiay kualipikado laeng kas V.D.M.

Idi impatay ti Sosiedad ti titulo a Ministro ti Nadibinuan a Sao, dina kaipapanan daytoy a naordinan dayta a dumidiskurso. Kayuloganna laeng a ti nangusisa a konseho nga adda kadagiti opisina ti Sosiedad ket rinepasona ti doktrinal a rimmang-ayan dayta a tao, agraman pay ti pakasarsaritaanna, ket impapanda nga isut’ maikari a maawagan Ministro ti Nadibinuan a Sao.

Adtoy dagiti saludsod para iti V.D.M.:

(1) Aniat’ immuna kadagiti amin a pinarsua ti Dios?

(2) Aniat’ kayulogan ti sao a “Logos,” kas mayaplikar iti Anak ti Dios? ket aniat’ kaipapanan dagiti sao nga Ama ken Anak?

(3) Kaano ken kasano a simrek ti basol ditoy lubong?

(4) Aniat’ inted ti Dios a dusa ti basol dagiti managbasol? ket asino dagiti managbasol?

(5) Apay a nesesita nga agbalin a lasag ti “Logos”? ket Isu kadit’ “inkarnado”?

(6) Aniat’ kasasaad daydi Tao a Kristo Jesus nanipud naiyanak agingga a natay?

(7) Aniat’ kasasaad ni Jesus nanipud nagungar; ket aniat’ opisial a relasionna ken Jehova?

(8) Aniat’ trabaho nga annongen ni Jesus kabayatan daytoy Periodo ti Ebanghelio​—nanipud Pentecostes agingga ita?

(9) Aniat’ nagapuananen ni Jehova a Dios agingga ita para iti lubong ti sangatauan? ket ania met ti nagapuanan ni Jesus?

(10) Aniat’ Nadibinuan a panggep para iti Iglesia apaman a makompleto dayta?

(11) Aniat’ Nadibinuan a panggep para iti lubong ti sangatauan?

(12) Aniantot’ pagtungpalan dagidiay talaga a nasukir?

(13) Aniantot’ gunggona wenno bendision nga umapay iti lubong ti sangatauan gaput’ panagtulnogda iti Pagarian ti Mesias?

(14) Aniada nga addang ti nasken nga alaen ti managbasol tapno adda relasionna ken Kristo ken iti Nailangitan nga Ama?

(15) Kalpasan a ti Kristiano ket naiyanak iti Nasantuan nga Espiritu, aniat’ turongen ti biagnan, kas indirihir ti Sao ti Dios?

(16) Tinallikudam kadin ti basol tapno agserbika iti sibibiag a Dios?

(17) Naan-anay kadin a kinonsagrarmo ti biagmo ken amin a pannakabalinmo ken talentom para iti Apo ken iti serbisiona?

(18) Insimbolom kadin daytoy a pannakakonsagrar babaen iti pannakaitaneb iti danum?

(19) Sinapataam kadin ti I. B. S. A. [International Bible Students Association] a Kari ti kinasantot’ biag?

(20) Nabasam kadin a naan-anay ken siaannad dagiti innem a tomo ti STUDIES IN THE SCRIPTURES?

(21) Nalawlawaganka met laeng ken nabenepisiaran iti dayta?

(22) Mamatika kadi nga adda umdas ken permanente a pannakaammom iti Biblia nga isut’ mamagbalin kenka a mas episiente nga adipen ti Apo iti intero a panagbiagmo?

[Kahon/Dagiti ladawan iti panid 216, 217]

Dagiti Patakder a Nausar Idiay Brooklyn idi Un-unana

Bethel Home

122-124 Columbia Heights

Panganan idiay Bethel Home

Tabernakulo

Adda ditoy dagiti opisina, bodega ti literatura, departamento ti koreo, pagimprentaan, ken ti auditorium nga aglaon 800, sadi 17 Hicks Street (nausar nanipud 1909 inggat’ 1918)

Ti auditorium

Dagiti Nagkauna a Paktoria

Dagiti kameng ti pamilia ti Bethel a nagtrabaho sadiay paktoria ti Myrtle Avenue idi 1920 (kannawan)

35 Myrtle Avenue (1920-22)

18 Concord Street (1922-27)

117 Adams Street (1927- )

[Kahon/Dagiti ladawan iti panid 224, 225]

Dagiti Agdaldaliasat a Manangaywan Sumagmamano Kadagiti Rinibo a Nagserserbi

Canada, 1905-33

Inglaterra, 1920-32

Finland, 1921-26, 1947-70

Estados Unidos, 1907-15

Agbiahe a bumisita kadagiti kongregasion​—

Greenland

Venezuela

Lesotho

Mexico

Peru

Sierra Leone

Lugan a pagdagusan sadi Namibia

Pannakikuyog kadagiti lokal a Saksi nga agserbi iti tay-ak sadi Japan

Panangmiting kadagiti panglakayen sadi Alemania

Panangipaay kadagiti praktikal a balakad kadagiti payunir sadi Hawaii

Panangisuro iti kongregasion sadi Francia

[Kahon/Ladawan iti panid 229]

Dagiti Nagkauna a Legal a Korporasion

Zion’s Watch Tower Tract Society. Damo a naporma idi 1881 sa legal a naaprobaran a korporasion iti estado ti Pennsylvania idi Disiembre 15, 1884. Idi 1896 ti naganna nagbalin a Watch Tower Bible and Tract Society. Nanipud 1955 nagbalin daytoy a Watch Tower Bible and Tract Society of Pennsylvania.

Peoples Pulpit Association. Naporma idi 1909 a nainaig iti panangiyalis ti Sosiedad kadagiti prinsipal nga opisinana sadi Brooklyn, Nueva York. Idi 1939 ti naganna nagbalin a Watchtower Bible and Tract Society, Inc. Nanipud 1956 nagbalin daytoy a Watchtower Bible and Tract Society of New York, Inc.

International Bible Students Association. Naaprobaran a korporasion sadi Londres, Inglaterra, idi Hunio 30, 1914.

Tapno matungpal dagiti legal a pagalagadan, adda dagiti dadduma a korporasion a pinorma dagiti Saksi ni Jehova kadagiti adu a komunidad ken dagdaga. Nupay kasta, dagiti Saksi ni Jehova saanda a nabingay-bingay kadagiti organisasion a nasional wenno iti rehion. Nagkaykaysada a sangalubongan nga agkakabsat.

[Kahon iti panid 234]

‘Kas ti Nagkauna a Kristiano a Komunidad’

Kinuna ti relihiuso a pagbasaan nga “Interpretation” idi Hulio 1956: “No iti trabahoda a panangorganisar ken panangasaba, isuda [dagiti Saksi ni Jehova] ti kaasitgan kadagiti aniaman a grupo no iti pannakipada iti nagkauna a Kristiano a komunidad. . . . Mammano dagiti grupo a kastat’ kawadwad a Kasuratan ti usarenda iti mensaheda, iti sao ken iti naisurat, a kas ar-aramidenda.”

[Ladawan iti panid 210]

Tapno naing-inget ti panangaywan, naipasdek dagiti sanga nga opisina. Ti immuna isu idiay Londres, Inglaterra, itoy a patakder

[Ladawan iti panid 221]

Ni J. F. Rutherford idi 1941. Ammo dagidi Saksi a saan nga isut’ liderda

[Ladawan iti panid 226]

Ni John Booth, agdaldaliasat a manangaywan sadi E.U.A. nanipud 1936 inggat’ 1941

[Ladawan iti panid 227]

Ni Carey Barber, a ti distritona sinaklawna ti naglawa a paset ti Estados Unidos

[Ladawan iti panid 228]

Ni Kabsat Knorr regular a binisitana ti kada sanga ken pagtaengan dagiti misionero

[Ladawan iti panid 230]

Dagiti kangrunaan a manangaywan kadagiti sanga ti Sosiedad naummongda para iti naisangsangayan a pannakasanay (Nueva York, 1958)

[Dagiti ladawan iti panid 231]

Ti Eskuelaan ti Ministerio ti Pagarian impaayna dagiti napateg nga instruksion para kadagiti manangaywan iti intero a lubong

Eskuelaan ti Ministerio ti Pagarian iti kampo dagiti “refugee” sadiay Thailand, 1978; sadiay Filipinas, 1966 (makinngato a kattigid)

[Dagiti ladawan iti panid 232]

Dagiti instruksion ti organisasion ti nagsasagadsad a naipablaak (Ingles idi damo, sa kadagiti dadduma a pagsasao) tapno maurnos ti aktibidad dagiti Saksi ken tapno mapakaammuan dagiti isuamin maipapan kadagiti probision a nairanta a tumulong iti ministerioda