Leksion 9
Masapul a Nadalus Dagiti Adipen ti Dios
Apay a masapul a nadalustayo iti amin a banag? (1)
Ania ti kayat a sawen ti panagbalin a nadalus iti naespirituan? (2) nadalus iti moral? (3) nadalus iti mental? (4) nadalus iti pisikal? (5)
Aniada a kita ti narugit a panagsasao ti rebbeng a liklikantayo? (6)
1. Nadalus ken nasantuan ni Jehova a Dios. Namnamaenna nga agtalinaed a nadalus dagiti agdaydayaw kenkuana—iti naespirituan, moral, mental, ken pisikal. (1 Pedro 1:16) Kasapulan ti panagregget tapno makapagtalinaed a nadalus iti imatang ti Dios. Agbibiagtayo iti narugit a lubong. Nasken met a makidangadangtayo iti bukodtay a pagannayasan nga agaramid iti dakes. Ngem masapul a ditay sumuko.
2. Naespirituan a Kinadalus: No kayattay ti agserbi ken Jehova, di mabalin nga itultuloytay nga annuroten dagiti sursuro wenno kaugalian ti ulbod a relihion. Masapul a rummuartayo iti ulbod a relihion ket ditay suportaran iti aniaman a pamay-an. (2 Corinto 6:14-18; Apocalipsis 18:4) No naammuantayon ti kinapudno maipapan iti Dios, masapul nga agannadtayo tapno saandatay a maallilaw dagiti tao a mangisursuro iti kinaulbod.—2 Juan 10, 11.
3. Moral a Kinadalus: Kayat ni Jehova nga agtignay dagiti agdaydayaw kenkuana a kas pudno a Kristiano iti amin a tiempo. (1 Pedro 2:12) Makitana amin nga aramidtayo, uray no nalimed. (Hebreo 4:13) Rebbeng a liklikantay ti seksual nga imoralidad ken dadduma pay a narugit nga aramid daytoy a lubong.—1 Corinto 6:9-11.
4. Mental a Kinadalus: No punnuentay ti isiptayo iti nadalus, nasin-aw a pampanunot, nadalus met ti kababalintayo. (Filipos 4:8) Ngem no narugit ti kanayon nga adda iti panunottayo, mangituggod daytoy kadagiti dakes nga aramid. (Mateo 15:18-20) Rebbeng a liklikantay dagiti kita ti pagpalpaliwaan a mangrugit iti panunottayo. Mapunnotay ti panunottayo kadagiti nadalus a banag babaen ti panagadal iti Sao ti Dios.
5. Pisikal a Kinadalus: Gapu ta ibagida ti Dios, rebbeng a pagtalinaeden dagiti Kristiano ti bagi ken pagan-anayda a nadalus. Bugguantay koma dagiti imatayo no aggaputayo iti kasilias, ken agbuggotayo sakbay a mangantayo wenno agiggem iti taraon. No awan kasiliasyo, ikali sayo gaburan ti ibleng. (Deuteronomio 23:12, 13) Makatulong iti nasayaat a salun-at ti panagtalinaed a nadalus iti pisikal. Nadalimanek ken nadalus koma ti pagtaengan ti maysa a Kristiano agpadpada iti uneg ken ruar. Naiduma koma dayta iti komunidad kas nasayaat a pagwadan.
6. Nadalus a Panagsasao: Masapul a kanayon a pudno ti sawen dagiti adipen ti Dios. Dagiti ulbod didanto sumrek iti Pagarian ti Dios. (Efeso 4:25; Apocalipsis 21:8) Saan nga agsao iti dakes dagiti Kristiano. Saanda a dumngeg wenno agisawang kadagiti narasaw nga angaw wenno narugit nga estoria. Gapu iti nadalus a panagsasaoda, naidumada iti pagtrabahuan wenno eskuelaan ken iti sangakaarrubaan.—Efeso 4:29, 31; 5:3.
[Dagiti Ladawan iti panid 18, 19]
Masapul a nadalus dagiti adipen ti Dios iti amin a banag