Asidegen ti Paraiso!

Dagiti dakes a bambanag a maar-aramid ita ditoy daga ipakitada nga asidegen ti Paraiso. Kinuna ti Biblia a makitatayo dagiti nakaam-ames a tiempo sakbay la unay ti Paraiso. Agbibiagtay itan kadagita a tiempo! Adtoy ti dadduma kadagiti bambanag a kinuna ti Biblia a mapasamak:

Dadakkel a gubat: “Ti nasion tumakderto a bumusor iti nasion ket ti pagarian bumusor iti pagarian.” (Mateo 24:7) Natungpalen daytoy a padto. Nanipud idi tawen 1914, addan dua a gubat sangalubongan ken adu a babbabassit pay a gubat. Minilionen a tattao ti natay kadagitoy.

Nasaknap a sakit. Addanto “iti nadumaduma a disso, dagiti angol.” (Lucas 21:11) Natungpal kadin daytoy? Wen. Ti kanser, sakit ti puso, sarut, malaria, AIDS, ken dagiti dadduma pay a sakit pinapataynan ti minilion a tattao.

Kinakurang ti taraon. Iti intero a daga adda dagiti tattao a kurang ti taraonda. Minilion a tattao ti matay iti bisin iti tunggal tawen. Daytoy ket maysa pay a pagilasinan nga asidegen a dumteng ti Paraiso. Kuna ti Biblia: “Addanto dagiti kinakirang ti taraon.”​—Marcos 13:8.

Dagiti ginggined. “Addanto . . . dagiti ginggined iti nadumaduma a disso.” (Mateo 24:7) Natungpal metten daytoy iti tiempotayo. Nasuroken a sangariwriw a tattao ti natay kadagiti ginggined nanipud idi 1914.

Nadangkes a tattao. Dagiti tattao “managayat[da] iti kuarta” ken ‘managayatda iti bagbagida.’ “Managayat[da] iti ragragsak imbes a managayat koma iti Dios.” Dagiti ubbing “nasukir[da] kadagiti nagannak.” (2 Timoteo 3:1-5) Dikay kadi umannugot nga adu a tattao ti kasta itatta? Awan ti panagraemda iti Dios, ket riribukenda dagidiay mangikagkagumaan a mangam-ammo iti Dios.

Krimen. Addanto met “iyaadu ti kinakillo.” (Mateo 24:12) Mabalin nga umannugotkayo a nakarkaro ti krimen itatta ngem idi napalabas a sumagmamano a tawen. Agpegpeggad a matakawan, makusit, wenno madangran dagiti tattao iti amin a lugar.

Amin dagitoy ipakitada nga asidegen ti Pagarian ti Dios. Kuna ti Biblia: “Inton makitayo a mapaspasamak dagitoy a bambanag, ammuenyo a ti pagarian ti Dios asidegen.” (Lucas 21:31) Ania ti Pagarian ti Dios? Dayta ti nailangitan a gobierno ti Dios a mangyegto iti Paraiso ditoy daga. Ti pagarian ti Dios sukatannanto dagiti gobierno ti tao.​—Daniel 2:44.