Maikanatad a Kapigsa ti Timek

NO NAKAPSUT ti timek ti agpalpalawag iti publiko, mabalin nga agtuglep ti dadduma nga agdengdengngeg. No nakapsut ti timek ti maysa nga agibumbunannag iti tay-ak ti ministerio, mabalin a saanna a matengngel ti atension ti bumalay. Ket no saan nga umdas ti kapigsa ti timek dagiti agkomento kadagiti gimong, saan a masagrap dagiti timmabuno ti kasapulan a pammaregta. (Heb. 10:24, 25) Iti kasumbangirna, no saan a maitutop ti tiempo a panangipigsa ti agpalpalawag iti timekna, mabalin nga alusiisen dagiti agdengdengngeg​—wenno masikoranda pay ketdi.​—Prov. 27:14.

Ikonsiderarmo Dagiti Agdengdengngeg Kenka. Asino ti kasarsaritam? maysa nga indibidual? maysa a pamilia? bassit a grupo nga agtataripnong sakbay ti panangasaba? intero a kongregasion? wenno iti dakkel a kombension? Nabatad a ti kapigsa ti timek a maikanatad iti maysa a kasasaad ket mabalin a di maitutop iti sabali.

Kadagiti nadumaduma nga okasion, nagpalawag dagiti adipen ti Dios iti sanguanan ti dakkel a tallaong. Idi naidedikar ti templo sadi Jerusalem idi kaaldawan ni Solomon, awan ti alikamen a pangpapigsa iti timek. Isu a nagtakder ni Solomon iti nangato a plataporma ket binendisionanna dagiti tattao “buyogen ti natbag a timek.” (1 Ar. 8:55; 2 Cron. 6:13) Adu a siglo ti naglabas, kalpasan a naiparukpok ti nasantuan nga espiritu idi Pentecostes 33 K.P., maysa nga umariwekwek​—a ti sumagmamano ket interesado, nangrabrabak ti dadduma​—ti naguummong iti ayan ti bassit a grupo dagiti Kristiano sadi Jerusalem. Kas panangipakita iti praktikal a sirib, “timmakder ni Pedro . . . ket impigsana ti timekna.” (Ara. 2:14) Naited ti nabileg a pammaneknek.

Kasano a maibagam a maikanatad ti kapigsa ti timekmo iti maysa a kasasaad? Ti reaksion dagiti agdengdengngeg ti maysa a kasayaatan a pagrukodan. No madlawmo a marigatan dagiti dadduma a dumngeg, masapul nga ikagumaam a papigsaen ti timekmo.

Indibidual man wenno grupo ti kasarsaritam, nainsiriban nga ikonsiderarmo no asino dagiti agdengdengngeg. No adda nakapsut ti panagdengngegna, nalabit ipigpigsam ti agsao. Ngem no agpukkawka, saandaka nga apresiaren dagidiay medio nabambannayat a mangtarus gapu iti kinalakay wenno kinabaketdan. Ibilangda pay ketdi a kinasabrak ti panagpukkaw. Kadagiti dadduma a kultura, matmatanda a makaung-unget wenno di makaan-anus ti maysa a tao a napigsa unay ti panagsaona.

Ikonsiderarmo Dagiti Makasinga nga Ariwawa. No addaka iti tay-ak ti ministerio, sigurado a dagiti maipasango a kasasaad impluensiaanda ti kasapulan a kapigsa ti timekmo a mangasaba. Nalabit kasapulan a daegam ti ungor dagiti lugan, naariwawa nga ubbing, agtataul nga aso, napigsa a tokar, wenno nakapigpigsa nga uni ti telebision. Iti kasumbangirna, kadagiti lugar nga agdedekket ti balbalay, mabalin a mabainan ti bumalay no napigsa unay ti bosesmo nga uray la maawis ti atension dagiti kaarruba.

Adu a nagduduma a sirkumstansia ti masapul a sarangten met ti kakabsat a lallaki nga agpalawag iti kongregasion wenno kadagiti kombension. Ti panagpalawag iti ruar ket naiduma unay iti panagpalawag iti uneg ti paggigimongan a no sadino ket nalawlawag ti timek. Idiay Latin America, nagpalawag ti dua a misionero iti balkonahe ti balay ti maysa nga interesado a tao bayat a maipabpabuya ti fireworks iti kabangibangda a plasa ken di agsarday ti panagtaraok ti kawitan iti kaarrubada!

No madamaka nga agpalpalawag, mabalin nga adda mapasamak a kasapulan ti apagbiit a panagsardengmo agingga nga agtalna dayta a makasinga wenno ipigpigsam ti timekmo. Kas pagarigan, no yero ti atep ti paggigimongan, ti bigla a panagdissuor ti tudo isut’ mangparigat kadagiti adda iti tallaong a dumngeg iti agpalpalawag. Sigurado a maysa a karit no adda ubing nga agsangsangit wenno adda dagiti naladaw a sumangpet. Sursuruem a sulnitan dagiti pakasingaan tapno naan-anay a magunggonaan dagiti agdengdengngeg iti impormasion nga idatdatagmo.

Makatulong ti alikamen a mangpapigsa iti timek no adda mausar, ngem kaskasdi a kasapulan a pigsaan latta ti agpalpalawag ti timekna no kalikaguman ti kasasaad. Kadagiti lugar a masansan nga agawan ti koriente, inkapilitan nga ituloy dagiti agpalpalawag ti diskursoda nga awan ti mikropono.

Ikonsiderarmo ti Material a Maipalpalawag. Agpannuray met iti linaon ti material nga ipalpalawagmo ti kapigsa ti timek a kasapulam. No kasapulan ti suheto ti kinabileg, saanmo a dadaelen ti palawagmo babaen ti nakakapkapsut a panagsao. Kas pagarigan, no ibasbasam dagiti panangkondenar a linaon ti Kasuratan, napigpigsa koma ti timekmo ngem no ibasbasam ti balakad maipapan iti panagayat. Ibagaymo ti kapigsa ti timekmo iti material, ngem annadam di la ket ta sika ti pakaiturongan ti atensionda.

Ikonsiderarmo ti Panggepmo. No kayatmo a gutugoten dagiti agdengdengngeg a regtaanda ti agserbi, masapul nga ipigpigsam bassit ti timekmo. No kayatmo a baliwan ti kapanunotanda, saanmo nga abugen ida babaen ti nakapigpigsa a timek. No ikagkagumaam ti mangandingay, nasaysayaat ti naalumamay a panagsao.

Epektibo a Panagusar iti Napigsa a Timek. No kayatmo nga alaen ti atension ti maysa a tao nga okupado, masansan a makatulong ti napigsa a timek. Ammo dagiti nagannak daytoy, isu nga agpukkawda a mangayab kadagiti annakda iti tiempo nga isardengdan ti agay-ayam. Nasken met ti napigsa a timek no iyanunsio ti tserman a mangrugin ti gimong iti kongregasion wenno iti asamblea. Bayat a mangaskasaba dagiti agibumbunannag, mabalin a pigsaanda ti kumablaaw bayat nga asitganda dagidiay adda ar-aramidenda iti arubayan.

Uray pay naalamon ti atensionda, masapul nga itultuloymo nga usaren ti umdas a kapigsa ti timek. Ti nakakapkapsut a timek ket mabalin nga ipasimudaagna a di nakasagana ti agpalpalawag wenno kurang ti kombiksionna.

No agmandarka, pigsaam ti agsao tapno agtignay dagiti tattao. (Ara. 14:9, 10) Kasta met, maliklikan ti pannakaisagmak no ipukkawmo ti ibagam. Idiay Filipos, agpakamatay koman ti guardia ta impagarupna a nakataray dagiti balud a bambantayanna. “Ni Pablo nagpukkaw iti natbag a timek, a kunkunana: ‘Dika saktan ta bagim, ta addakami amin ditoy!’” Iti kasta, naatipa ti panagpakamatay. Kinasabaan ngarud da Pablo ken ni Silas ti guardia ken ti sangakabbalayanna, ket isuda amin inawatda ti kinapudno.​—Ara. 16:27-33.

No Kasano a Parang-ayem ti Kapigsa ti Timekmo. Kadagiti dadduma, ad-adu a panangikagumaan ti kasapulan tapno masursuroda nga ibagay ti maikanatad a kapigsa ti timekda. Mabalin a kurang ti kapigsa ti timek ti maysa a tao gapu iti gagangay a kinakapsut ti bosesna. Nupay kasta, buyogen ti panagregget, mabalin a rumang-ay, nupay gagangay a naalumamay ti panagsasaona. Intonaram ti panagangesmo ken ti posturam. Iruammo ti agtugaw ken agtakder a diretso. Iliadmo bassit dagiti abagam, ket umangeska iti nauneg. Siguraduem a punnuen iti angin ti makimbaba a paset dagiti baram. Daytoy nga abasto nga angin, a maitutop ti panagruarna, isut’ mangkontrol iti kapigsa ti timekmo nga agpalawag.

Kadagiti dadduma, ti problemada ket napigsa unay ti panagsaoda. Nalabit nayugalida ti kasta gapu ta nalayang a lugar ti pagtartrabahuanda wenno nalaaw ti aglawlawda. Iti kasumbangirna, nalabit dimmakkelda iti sangakabbalayan nga agpipinnukkawda ken gagangay nga adu ti pakasingaan. Nagbanaganna, ipapanda a makasingitda laeng iti tungtongan babaen ti panangipigpigsada iti bosesda ngem iti dadduma. Bayat a rumangrang-ayda a mangipangag iti balakad ti Biblia nga ikawesda ti “kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured,” ibagayda ti kapigsa ti timekda bayat a makisaritada kadagiti sabsabali.​—Col. 3:12.

Ti nasayaat a panagsagana, ti kapadasan nga ibunga ti regular a pannakipaset iti tay-ak ti serbisio, ken ti panagkararag ken ni Jehova ti tumulong kenka nga agsao iti maikanatad a kapigsa ti timek. Agpalpalawagka man iti plataporma wenno adda kaskasabaam iti tay-ak ti ministerio, ikagumaam nga ipamaysa ti panunotmo no kasano a matulongan ti sabali babaen ti pannakangngegna iti ibagbagam.​—Prov. 18:21.