Agtutubo—Kasanoyo nga Usaren ti Biagyo?
“KAYATKO a matagiragsak a naan-anay ti biagko.” Kasta ti kuna ti maysa nga agtutubo a babai. Di pagduaduaan a kayatmo met dayta. Ngem kasanom a matagiragsak a “naan-anay” ti biag? Mabalin a kunaen ti media, dagiti kapatadam, ken nalabit uray dagiti mannursurom, nga agtaud ti balligi iti adu a masapulan a kuarta ken panangtagiragsak iti natan-ok a karera!
Nupay kasta, mamakdaar ti Biblia kadagiti agtutubo a ti pananggun-od kadagiti material a banag ket maysa laeng a “panangkamkamat iti angin.” (Eclesiastes 4:4) Ti maysa a rason, sumagmamano laeng nga agtutubo ti pudpudno a makagun-od iti kinabaknang ken dayaw. Dagidiay makagun-od kadagita masansan a maupayda unay. “Mayarig dayta iti awan nagyanna a kahon,” kuna ti maysa a Britano nga agtutubo a nanggun-od iti natan-ok nga akademiko a karera. “No kitaem ti unegna, awan gayam ti nagyanna.” Pudno a no dadduma, ti trabaho mabalin a mangipaay iti kinabaknang ken dayaw. Ngem dina mapennek ti ‘naespirituan a kasapulam.’ (Mateo 5:3) Maysa pay, mamakdaar ti 1 Juan 2:17 a “ti lubong aglabas.” Uray no magun-odmo ti balligi iti daytoy a lubong, apagbiit laeng dayta.
Gapuna, idagadag ti Eclesiastes 12:1 kadagiti agtutubo: “Laglagipem ti Namarsua kenka ita ta agtutuboka pay.” (Today’s English Version) Wen, ti kasayaatan a pamay-an a pangusaram iti biagmo isu ti panagserbi ken Jehova a Dios. Ngem umuna, masapul a maikarika nga agserbi iti Dios. Kasano a maaramidam dayta? Ken ania ti ramanen ti panagserbi iti Dios?
Kualipikado nga Agbalin a Saksi ni Jehova
Umuna iti amin, masapul a patanorem ti tarigagay nga agserbi iti Dios—ket saan nga automatiko a dumteng dayta a tarigagay, uray no Kristiano dagiti nagannak kenka. Masapul a maaddaanka iti personal a relasion ken Jehova. “Ti panagkararag tulongannaka a maaddaan iti personal a relasion ken Jehova,” kuna ti maysa nga agtutubo a babai.—Salmo 62:8; Santiago 4:8.
Itampok ti Roma 12:2 ti sabali pay nga addang a masapul nga aramidem. Kunana: ‘Paneknekanyo iti bagbagiyo ti naimbag ken makaay-ayo ken naan-anay a pagayatan ti Dios.’ Adda kadi dagiti kanito a pinagduaduaam ti dadduma kadagiti banag a nasursurom? No kasta, surotem ti balakad ti Biblia, ket ‘paneknekam iti bagim’ a pudno dagita a banag! Agsukimatka a mismo. Basaem ti Biblia ken dagiti naibatay-Biblia a publikasion. Nupay kasta, ti panangadal kadagiti banag maipapan iti Dios ket saan laeng a basta panangusig iti bambanag. Utobem a naimbag ti basbasaem tapno umukuok dayta iti piguratibo a pusom. Daytoy ti mangparayray iti panagayatmo iti Dios.—Salmo 1:2, 3.
Kalpasanna, padasem nga iranud iti di pormal a wagas ti maad-adalmo, nalabit kadagiti kaeskuelaam. Ti sumaruno nga addang isu ti panangasaba iti binalaybalay. Nalabit adda dagiti tiempo a makasarakka iti kaeskuelaam bayat ti panangasabam, ket mabalin a mabainka iti damo. Ngem idagadag ti Biblia kadatayo a ditay “ibain ti naimbag a damag.” (Roma 1:16) Mensahe ti biag ken namnama ti idandanonmo! Apay koma nga ibainmo dayta?
Ita, no Kristiano dagiti nagannak kenka, mabalin a kumuykuyogkan kadakuada a mangasaba. Ngem makaaramidka kadi iti ad-adu pay ngem ti basta panagtakder iti ruangan a di agsasao wenno panangipaima laeng kadagiti magasin ken polieto? Kabaelam kadin ti makisarita a bukbukod, nga usarem ti Biblia a mangisuro iti bumalay? No saan pay, agkiddawka iti tulong kadagiti dadakkelmo wenno iti maysa a nataengan a miembro ti kongregasion. Pagbalinem a kalat ti makualipikar kas maysa a di bautisado nga agibumbunannag iti naimbag a damag!
Inton agangay, matignayka nga agdedikar—nga ikarim iti Dios nga agserbika kenkuana bayat a sibibiagka. (Roma 12:1) Nupay kasta, ti dedikasion ket saan la a basta pribado a banag. Iparebbeng ti Dios kadagiti amin ti “publiko a panangideklara maipaay iti pannakaisalakan.” (Roma 10:10) Iti aldaw ti bautismo, berbal nga ipaduyakyakmo nga umuna ti pammatim. Sumaruno ti bautismo iti danum. (Mateo 28:19, 20) Pudno a maysa a serioso nga addang ti bautismo. Ngem dika bumdeng gapu ta maamakka di la ket ta saanmonto a matungpal ti obligasionmo. No umadanika iti Dios a dumawat iti bileg, ipaayna kenka “ti pannakabalin a nalablabes ngem ti gagangay” tapno makapagtalinaedka a natibker.—2 Corinto 4:7; 1 Pedro 5:10.
Iti aldaw ti bautismo, agbalinka a maysa kadagiti Saksi ni Jehova. (Isaias 43:10) Rumbeng nga addaan daytoy iti dakkel nga epekto iti panangusarmo iti biagmo. Ti panagdedikar ramanenna ti ‘panangtallikud iti bagim.’ (Mateo 16:24) Mabalin a paglikudam dagiti personal a kalat ken ambision ket ‘sapulem nga umuna ti pagarian ti Dios.’ (Mateo 6:33) No kasta, ti dedikasion ken bautismo ti manglukat iti adu a gundaway tapno maaramidmo dayta. Usigentayo ti sumagmamano kadagitoy.
Dagiti Gundaway a Makapagserbi iti Dios iti Amin a Tiempo
● Panagpayunir ti maysa kadagita a gundaway. Ti payunir nga agibumbunannag ket maysa a mapagulidanan a bautisado a Kristiano a mangbusbos iti di nababbaba ngem 70 nga oras tunggal bulan a mangikasaba iti naimbag a damag. Ti panangbusbos iti ad-adu nga oras iti tay-ak tulongannaka a mangparang-ay iti abilidadmo a mangasaba ken mangisuro. Napasaran ti adu a payunir ti rag-o nga itden ti panangtulong kadagiti iyad-adalanda iti Biblia nga agbalin a bautisado a Saksi. Adda pay kadi sabali a trabaho nga ad-adda a makaparagsak ken makapnek?
Tapno adda pagbiagda, adda part-time a trabaho ti kaaduan a payunir. Adu ti agplano a nasaksakbay para iti daytoy a responsabilidad babaen ti panagsursuroda iti trabaho idiay eskuelaan wenno kadagiti dadakkelda. No mariknam ken dagiti dadakkelmo a nasaysayaat nga agadalka pay kalpasan a makapagturposka iti haiskul, siguraduem a ti motibom ket, saan a tapno agpabaknang, no di ket tapno masuportaram ti ministeriom ken nalabit makapagserbika kas amin-tiempo a ministro.
Nupay kasta, ti nakaisentruan ti biag ti maysa a payunir ket saan a ti trabahona, no di ket ti ministeriona—ti panangtulong kadagiti sabsabali a manggun-od iti biag! Apay a dimo ikeddeng ti panagpayunir kas kalatmo? Mangiturong ti panagpayunir iti dadduma pay a pribilehio. Kas pagarigan, immakar ti dadduma a payunir kadagiti lugar a dakdakkel ti pakasapulan kadagiti agibumbunannag iti Pagarian. Nagadal ti dadduma iti sabali a pagsasao ken nagserbi iti kongregasion a sabali ti pagsasaona wenno uray iti sabali a pagilian. Wen, ti panagpayunir ket makagunggona a wagas ti panagbiag!
● School for Kingdom Evangelizers Daytoy nga eskuelaan nga agpaut iti dua a bulan ket nairanta a mangsanay kadagiti aduan-kapadasan a payunir a sidadaan a mangpanaw iti pagtaenganda tapno agserbi iti sadinoman nga addaan iti panagkasapulan. Kas man la ibagbagada, “Adtoyak! Ibaonnak!” kas panangtulad ken ni Jesu-Kristo, ti katan-okan nga Ebanghelisador a nagbiag ditoy daga. (Isaias 6:8; Juan 7:29) Ti iyaadayo iti pagtaengan ket mabalin nga agkalikagum iti nasimsimple a biag. Mabalin a naan-anay a naiduma ti kultura, klima, ken taraon a nakairuaman ti maysa. Nalabit nasken pay ketdi nga agsursuro iti sabali a lengguahe. Daytoy nga eskuelaan tulonganna dagiti babbaro, babbalasang, ken naasawaan a kakabsat, nga agtawen iti 23 agingga iti 65, a mangparayray kadagiti naespirituan a kualidad a kasapulan iti panangitungpalda iti annongenda ken kadagiti abilidad a tumulong kadakuada nga agpausar a naan-anay ken ni Jehova ken iti organisasionna.
● Ti panagserbi iti Bethel kaipapananna ti panagserbi kas boluntario iti maysa kadagiti sanga nga opisina dagiti Saksi ni Jehova. Dagiti dadduma a miembro ti pamilia ti Bethel ket direkta nga agtrabahoda iti pannakapataud dagiti literatura ti Biblia. Maikkan ti dadduma iti trabaho a makatulong iti pannakapataud dagiti literatura ti Biblia, kas ti panangmantener kadagiti pasdek ken alikamen wenno panangaywan kadagiti pisikal a kasapulan ti pamilia ti Bethel. Amin a trabaho ket sagrado a pribilehio iti panagserbi ken Jehova. Kanayonanna, naragsak dagidiay adda iti Bethel ta pagaammoda nga aniaman ti trabahoda, pakagunggonaan daytoy dagiti adu a kakabsatda iti intero a lubong.
No dadduma, maawis nga agserbi iti Bethel dagiti kakabsat nga addaan iti naisangsangayan a paglaingan. Nupay kasta, masanay ti kaaduan kadakuada kalpasan ti isasangpetda. Saan nga agserbi dagidiay adda iti Bethel maipaay iti material a gunggona no di ket mapnekdan iti maipaay a probision a taraon, kuarto a pagturogan, ken bassit a gatad para iti personal a paggastuan. Maipapan iti panagserbina, kastoy ti kinuna ti maysa nga agtutubo a miembro ti pamilia ti Bethel: “Nagsayaat unay! Saan a nalaka ti rutina, ngem adu a bendision ti sagsagrapek iti panagserbik ditoy.”
● Ti trabaho a panagibangon ipaayanna ti maysa iti gundaway a makiraman iti panagibangon kadagiti pasilidad iti sanga nga opisina ken kadagiti Kingdom Hall. Dagiti construction servant, kas awag kadakuada, ket tumultulong iti kasta a trabaho a panagibangon. Maysa daytoy a porma ti sagrado a panagserbi, kas iti trabaho dagidiay nangbangon iti templo ni Solomon. (1 Ar-ari 8:13-18) Maay-aywanan dagiti construction servant a kas iti pannakaaywan dagiti kameng ti pamilia ti Bethel. Anian a pribilehio ti adda kadagitoy a kakabsat iti daytoy a trabaho nga agpaay a pakaidayawan ni Jehova!
Agserbi ken Jehova iti Amin a Kararua
Ti panagserbi ken Jehova ti kasayaatan a wagas a pangusaram iti biagmo. Apay a dimo aramiden a personal a kalat ti panagserbi iti Dios iti amin a tiempo? Makisaritaka maipapan iti amin-tiempo a serbisio kadagiti nagannak kenka, panglakayen iti kongregasionyo, ken manangaywan iti sirkitoyo. No interesadoka iti panagserbi iti Bethel, wenno no kayatmo ti ageskuela iti School for Kingdom Evangelizers, tabunuam dagiti miting para kadagiti posible nga agbalin nga aplikante, a maang-angay kadagiti rehional a kombension.
Pudno a saan nga amin ket kualipikado wenno makapagserbi iti amin a tiempo. No dadduma makedngan ti maaramidan ti maysa gapu iti problema iti salun-at, pinansial a kasasaad, ken obligasion iti pamilia. Nupay kasta, masapul nga ipangag ti amin a dedikado a Kristiano ti bilin ti Biblia a: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mateo 22:37) Kalikaguman ni Jehova nga aramidem ti amin a kabaelam nga ipalubos ti kasasaadmo. Gapuna, aniaman ti kasasaadmo, ipangrunam iti biagmo ti panagserbi ken Jehova. Mangaramidka kadagiti realistiko a teokratiko a kalat. Wen, “laglagipem ti Namarsua kenka ita ta agtutuboka pay”—ket mabendisionankanto iti agnanayon gapu iti panangaramidmo iti dayta!
Malaksid no adda sabali a naipakita, naadaw dagiti teksto ti Biblia manipud iti Baro a Lubong a Patarus ti Nasantuan a Kasuratan.