Natalna a Baro a Lubong ti Dios—Mabalinmo ti Agbiag Sadiay

PINAGNAED ti Dios da Adan ken Eva idiay hardin ti Eden. Nupay nagsukir ken natayda, impamuspusan ti Dios ti panagbiag nga agnanayon dagiti annakda, a pakairamanantayo, iti Paraiso. Inkari ti Biblia: “Dagiti nalinteg tagikuaendanto ti daga, ket agtaengdanto nga agnanayon iti dayta.”​​—Salmo 37:29.

Nadakamat iti Biblia ti maipapan iti “baro a langlangit” ken “baro a daga.” (Isaias 65:17; 2 Pedro 3:13) Ti agdama a simboliko a “langlangit” ket buklen dagiti gobierno ti tao iti kaaldawantayo, ngem ni Jesu-Kristo ken dagidiay kakaduana nga agturay idiay langit isudanto ti mangbukel iti “baro a langlangit.” Anian a nakaragragsak inton agturay iti intero a daga daytoy a baro a langlangit, wenno ti nalinteg a gobierno ti Dios a mangyeg iti talna!

No kasta, ania ti “baro a daga”?— Ti baro a daga isudanto dagiti naimbag a tattao nga agayat ken Jehova. Nasken a matarusam a no dakamaten ti Biblia ti sao a “daga,” pasaray tuktukoyenna dagiti tattao nga agnanaed ditoy daga, saan a ti daga a mismo. (Genesis 11:1; Salmo 66:4; 96:1) Gapuna, dagiti tattao a mangbukel iti baro a daga agnaeddanto a mismo ditoy daga.

No kasta, mapukawton ti agdama a lubong dagiti nadangkes a tattao. Laglagipem, ti Layus idi kaaldawan ni Noe pinukawna ti dakes a lubong dagiti tattao. Ket kas naammuantan, madadaelto inton Armagedon daytoy agdama a dakes a lubong. Kitaenta no anianto ti kasasaad ti biag iti baro a lubong ti Dios kalpasan ti Armagedon.

Kayatmo kadi ti agbiag nga agnanayon iti Paraiso iti sidong ti natalna a baro a lubong ti Dios?— Awan ti doktor a makaited kadatayo iti biag nga agnanayon. Awan ti agas a mabalintayo a tomaren tapno saantayo a matay. Ti kakaisuna a pamay-an tapno agbiagtayo nga agnanayon ket babaen ti iyaadanitayo iti Dios. Ket isuronatayo ti Naindaklan a Mannursuro no kasanotayo nga aramiden dayta.

Ukradenta ti Biblia iti Juan kapitulo 17, bersikulo 3. Kastoy ti mabasata a sasao ti Naindaklan a Mannursuro: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”

No kasta, ania ti imbaga ni Jesus a masapul nga aramidentayo tapno agbiagtayo nga agnanayon?— Umuna, masapul a gumun-odtayo iti pannakaammo maipapan iti nailangitan nga Amatayo, a ni Jehova, ken kasta met ti Anakna, a nangisakripisio iti biagna para kadatayo. Kayatna a sawen a nasken nga adalentayo ti Biblia. Daytoy a libro nga Agsursuroka iti Naindaklan a Mannursuro tulongannatayo nga agadal iti Biblia.

Ngem kasano a ti panagadaltayo iti maipapan ken Jehova matulongannatayo nga agbiag ng agnanayon?— No kasano a kasapulantayo ti taraon iti inaldaw, kasapulan met nga agadaltayo iti maipapan ken Jehova iti inaldaw. Kuna ti Biblia: ‘Saan laeng a ti tinapay ti pagbiag ti tao no di ket ti isuamin a sao a rummuar iti ngiwat ni Jehova.’​​—Mateo 4:4.

Kasapulan met a maaddaantayo iti pannakaammo maipapan ken Jesu-Kristo gapu ta imbaon ti Dios ti Anakna a mangikkat iti basoltayo. Kuna ti Biblia: “Awan ti asinoman a sabali a pakaisalakanan.” Ken kastoy pay ti kuna ti Biblia: “Ti mangwatwat iti pammati iti Anak adda agnanayon a biagna.” (Aramid 4:​12; Juan 3:36) Ita, ania ti kaipapanan ti ‘panangwatwat iti pammati’ ken Jesus?— Kayatna a sawen a pudno a mamatitayo ken Jesus ken ammuentayo a ditay makapagbiag nga agnanayon no awan ni Jesus. Patientayo kadi dayta?— No mamatitayo, itultuloytayo ti agsursuro iti Naindaklan a Mannursuro iti inaldaw, ken tungpalentayo ti ibagbagana.

Ti maysa a nasayaat a pamay-an tapno makasursuroka iti Naindaklan a Mannursuro ket basaem a patinayon daytoy a libro. Kitaem ken utobem a naimbag dagiti amin a ladawan. Padasem a sungbatan dagiti saludsod a masarakan kadagitoy a ladawan. Kasta met, duakayo ken ni nanangmo wenno ni tatangmo a mangbasa iti libro. No awan ni nanang wenno ni tatangmo, dagiti dadduma pay a nataengan ken ubbing ti kaduam a mangbasa iti dayta. Saan aya a nagsayaat no matulongam dagiti sabsabali a mangammo manipud iti Naindaklan a Mannursuro no ania ti kasapulan nga aramidenda tapno agbiagda nga agnanayon iti baro a lubong ti Dios?—

Kunaen kadatayo ti Biblia: “Ti lubong aglabas.” Ngem kalpasanna ilawlawag ti Biblia no kasanotayo a makapagbiag nga agnanayon iti baro a lubong ti Dios. Kunana: “Ti agaramid iti pagayatan ti Dios agtalinaed iti agnanayon.” (1 Juan 2:17) No kasta, kasanotayo a makapagbiag nga agnanayon iti baro a lubong ti Dios?— Wen, babaen ti pananggun-od iti pannakaammo maipapan ken Jehova ken ti patpatgenna nga Anak a ni Jesus. Ngem masapul met nga aramiden wenno iyaplikartayo dagiti masursurotayo. Sapay koma ta ti panangadalmo iti daytoy a libro tulongannaka a mangaramid kadagita.