“Kangrunaan iti Amin, Maaddaankayo iti Nasged nga Ayat”
“Ti panungpalan ti amin a bambanag immasidegen. . . . Kangrunaan iti amin, maaddaankayo iti nasged nga ayat iti maysa ken maysa.”—1 PEDRO 4:7, 8.
AMMO ni Jesus a napateg dagiti maudi a sumagmamano nga oras a kaduana dagiti apostolna. Ammona no ania ti agur-uray kadakuada. Adda dakkel a trabaho nga aramidenda, ngem magurgura ken maidadanesda a kas kenkuana. (Juan 15:18-20) Iti dayta a maudi a rabii a panagkakaduada, saan la a naminsan a pinalagipanna ida nga ‘agiinnayatda.’—Juan 13:34, 35; 15:12, 13, 17.
2 Adda ni apostol Pedro iti daydi a rabii. Naawatanna ti kinapateg ti palagip ni Jesus ta sumagmamano a tawen kalpasanna, idi nagsurat sakbay unay ti pannakadadael ti Jerusalem, impaganetgetna ti kinapateg ti ayat. Binalakadanna dagiti Kristiano: “Ti panungpalan ti amin a bambanag immasidegen. . . . Kangrunaan iti amin, maaddaankayo iti nasged nga ayat iti maysa ken maysa.” (1 Pedro 4:7, 8) Napateg unay ti sasao ni Pedro kadagidiay agbibiag “kadagiti maudi nga aldaw” daytoy agdama a sistema ti bambanag. (2 Timoteo 3:1) Ania ti “nasged nga ayat”? Apay a nasken nga addaantayo iti kasta nga ayat kadagiti sabsabali? Ken kasanotayo a maipakita dayta?
Ania ti “Nasged nga Ayat”?
3 Iti kapanunotan ti adu, ti ayat ket maysa a rikna a masapul a naikasigudan a tumaud. Ngem saan a basta ayat ti kayat a sawen ni Pedro. Agsasao ni Pedro maipapan iti katan-okan a kita ti ayat. Nagtaud iti Griego a sao nga a·gaʹpe ti sao a naipatarus nga “ayat” iti 1 Pedro 4:8. Ipasimudaag dayta a termino ti di agimbubukodan nga ayat nga iwanwanwan wenno iturturong ti prinsipio. Sigun iti maysa a reperensia, mabalin nga iturong ti agape nga ayat gapu ta saan a basta emosion daytoy no di ket maysa a pangngeddeng ti nakem a manggutugot iti maysa a tao nga agtignay. Gapu ta addaantayo iti natawid a pagannayasan a maseknan laeng iti bukodtayo a bagi, kasapulantayo dagiti palagip nga ipakita ti ayat iti tunggal maysa, nga aramidentayo dayta kadagiti wagas a maitunos kadagiti nadiosan a prinsipio.—Genesis 8:21; Roma 5:12.
4 Di kayat a sawen daytoy a masapul nga agiinnayattayo gapu laeng ta pagrebbengantayo dayta. Ti a·gaʹpe ket napnuan kinabara ken rikna. Kinuna ni Pedro a masapul a ‘maaddaantayo iti nasged [iti literal, “nalawa”] nga ayat iti maysa ken maysa.’a (Kingdom Interlinear) Ngem ti kasta nga ayat sapulenna ti panagregget. Maipapan iti Griego a sao a naipatarus a “nasged,” kuna ti maysa nga eskolar: “Iladawan daytoy ti maysa nga atleta a mangwatwat kadagiti piskelna bayat nga iyibusna ti pigsana agingga a makagteng iti pagpatinggaan ti lumba.”
5 No kasta, ti ayattayo ket saan a nakedngan iti panangaramid laeng kadagiti banag a nalaka nga aramiden wenno sumagmamano laeng a tattao ti pangipakitaantayo iti dayta. Ti Nakristianuan nga ayat kalikagumanna ti ‘panangpalawa’ iti pusotayo, panangipakita iti ayat uray no narigat nga aramiden dayta. (2 Corinto 6:11-13) Nalawag, nasken a patanoren ken ikagumaantayo nga ipakita ti kastoy nga ayat, no kasano a masapul nga agsanay ken agbannog ti maysa nga atleta tapno lumaing. Nasken nga addaantayo iti kasta nga ayat iti tunggal maysa. Apay? Gapu iti tallo a rason.
Apay a Rumbeng nga Agiinnayattayo?
6 Umuna, “agsipud ta ti ayat naggapu iti Dios.” (1 Juan 4:7) Ni Jehova, a Gubuayan daytoy napateg a galad, ti immuna a nangayat kadatayo. Kuna ni apostol Juan: “Babaen itoy naiparangarang ti ayat ti Dios iti kasasaadtayo, agsipud ta ti Dios imbaonna ti bugbugtong nga Anakna ditoy lubong tapno magun-odantayo ti biag babaen kenkuana.” (1 Juan 4:9) ‘Naibaon’ ti Anak ti Dios babaen ti panagbalinna a tao, panangitungpalna iti ministeriona, ken ipapatayna iti kayo a pagtutuokan. Inaramidna amin dagitoy tapno “magun-odantayo ti biag.” Kasanotayo a subadan daytoy a katan-okan nga ebkas ti ayat ti Dios? Kuna ni Juan: “No kastoy ti panangayat kadatayo ti Dios, ngarud datayo pagrebbengantayo nga ayaten ti maysa ken maysa.” (1 Juan 4:11) Paliiwem ta insurat ni Juan, “No kastoy ti panangayat kadatayo ti Dios”—saan la a sika no di ket datayo. Nalawag ti punto: No ay-ayaten ti Dios dagiti padatayo a managdaydayaw, rumbeng ngarud nga ayatentay met ida.
7 Maikadua, nangnangruna ita a nasken nga ayatentayo ti tunggal maysa babaen ti panangtulong kadagiti kakabsattayo nga agkasapulan gapu ta “ti panungpalan ti amin a bambanag immasidegen.” (1 Pedro 4:7) Agbibiagtayo iti “napeggad a tiempo a narigat a pakilangenan.” (2 Timoteo 3:1) Mapasarantayo dagiti rigat gapu kadagiti kasasaad iti lubong, natural a didigra, ken ibubusor. Iti sidong dagiti narigat a kasasaad, masapul nga agbalintayo a nasingsinged iti tunggal maysa. Ti nasged nga ayat pagkaykaysaennatayo ken tignayennatayo a ‘mangisakit iti maysa ken maysa.’—1 Corinto 12:25, 26.
8 Maikatlo, masapul nga agiinnayattayo gapu ta ditay kayat nga “ikkan ti lugar ti Diablo” a manggundaway kadatayo. (Efeso 4:27) Alisto ni Satanas a mangusar kadagiti pagkurkurangan dagiti kapammatiantayo—dagiti pagkapuyan, biddut, ken kamalida—kas pakaitibkolan. Umikaytayo kadi iti kongregasion gapu iti nasakit a sao wenno di naayat a tignay? (Proverbio 12:18) Saan no addaantayo iti nasged nga ayat iti tunggal maysa! Ti kasta nga ayat tulongannatayo a mangtaginayon iti talna ken sangsangkamaysa nga agserbi iti Dios “iti abagan-abaga.”—Sofonias 3:9.
No Kasanom a Maipakita nga Ay-ayatem Dagiti Sabsabali
9 Ti panangipakita iti ayat masapul a mangrugi iti pagtaengan. Kinuna ni Jesus a mailasin dagiti pudno a pasurotna babaen ti ayatda iti tunggal maysa. (Juan 13:34, 35) Masapul a maiparangarang ti ayat saan laeng nga iti kongregasion no di pay ket iti pamilia—iti nagbaetan ti agassawa ken iti nagbaetan dagiti nagannak ken annak. Saan nga umdas ti pannakarikna iti ayat kadagiti kameng ti pamilia; nasken nga iyebkastayo dayta kadagiti positibo a wagas.
10 Kasano a maipakita ti agassawa ti ayatda iti tunggal maysa? Ti lalaki a pudno a mangay-ayat iti asawana ipakitana nga ipatpategna ni baketna babaen ti sao ken aramid—iti publiko ken iti pribado. Raemenna ti dignidad ti asawana ken ikabilanganna ti pampanunot, panangmatmat, ken rikriknana. (1 Pedro 3:7) Iyun-unana ti pagimbagan ni baketna imbes a ti bukodna, ken aramidenna ti amin a kabaelanna a mangipaay kadagiti material, naespirituan, ken emosional a kasapulan ti asawana. (Efeso 5:25, 28) Ti babai a pudno a mangay-ayat iti asawana ipakitana ti “nauneg a panagraem,” uray no adda dagiti tiempo a di maaramid ni lakayna dagiti namnamaenna. (Efeso 5:22, 33) Suportaranna ni lakayna ken agpasakup kenkuana, saan a mangkalikagum iti di nainkalintegan, no di ket makitinnulong kenkuana a mangipangpangruna kadagiti naespirituan a banag.—Genesis 2:18; Mateo 6:33.
11 Nagannak, kasanoyo a maipakita ti ayat kadagiti annakyo? Ti situtulok a panagtrabahoyo tapno maitedyo dagiti material a kasapulanda ket pammaneknek ti ayatyo. (1 Timoteo 5:8) Ngem saan laeng a taraon, kawes, ken pagtaengan ti kasapulan dagiti annak. Tapno ayaten ken agserbida iti pudno a Dios bayat a dumakdakkelda, masapul a masursuruanda kadagiti naespirituan a banag. (Proverbio 22:6) Nasken nga iwayaanyo kas pamilia ti agadal iti Biblia, makiraman iti ministerio, ken tumabuno kadagiti Nakristianuan a gimong. (Deuteronomio 6:4-7) Tapno mataginayon dagiti kasta nga aktibidad, masapul ti panagsakripisio, nangruna kadagitoy napeggad a tiempo. Ebkas ti ayat ti pannakaseknan ken panangikagumaanyo a mangipaay kadagiti naespirituan a kasapulan dagiti annakyo, ta ipakpakitayo a naimpusuan a maseknankayo iti agnanayon a pagimbaganda.—Juan 17:3.
12 Dagiti nagannak nasken met nga ipakitada ti ayat babaen ti panangipaayda kadagiti emosional a kasapulan dagiti annakda. Awanan gaway dagiti ubbing; nasken nga ipatalgedyo iti naganus a pusoda nga ay-ayatenyo ida. Ibagayo nga ay-ayatenyo ida, ken bussogenyo ida iti dungngo, ta dagiti kasta nga ebkas ti ayat ipanamnamana kadakuada a maipatpateg ken adda serbida. Sidudungngo ken sipupudno a komendaranyo ida, ta ipasimudaag dayta kadakuada a makita ken apresiarenyo dagiti magapgapuananda. Disiplinaenyo ida buyogen ti ayat, ta ti kasta a panangtubngar ipamatmatna kadakuada a maseknankayo iti kita ti tao a pagbalbalinanda. (Efeso 6:4) Amin dagita a nasayaat nga ebkas ti ayat ket makatulong a mangipasdek iti naragsak, nadekket a pamilia nga ad-adda a nakasagana a mangdaer kadagiti pakarigatan kadagitoy maudi nga aldaw.
13 Ti ayat tignayennatayo a mangpalabas iti pagkurkurangan dagiti sabsabali. Laglagipem nga idi binagbagaan ni Pedro dagiti sinuratanna a ‘maaddaanda iti nasged nga ayat iti maysa ken maysa,’ nangted iti rason no apay a nagpateg daytoy: “Agsipud ta ti ayat abbonganna ti nakaad-adu a basol.” (1 Pedro 4:8) Ti ‘panangabbong’ kadagiti basol dina kayat a sawen ti ‘panangabbong’ kadagiti nadagsen a basol. Dagiti kasta a banag ket rumbeng a maipakaammo ken tamingen dagiti responsable a lallaki iti kongregasion. (Levitico 5:1; Proverbio 29:24) Nakaro a kinaawan ayat—ken di nainkasuratan—no palubosantayo dagiti napeklan a managbasol nga agtultuloy a mangdangran wenno mangbiktima kadagiti inosente.—1 Corinto 5:9-13.
14 Kaaduanna, babassit laeng dagiti biddut ken kamali dagiti kapammatiantayo. No dadduma, maitibkoltayo amin iti sao wenno aramid. Maupay wenno masaktantayo pay ketdi dagiti sabsabali. (Santiago 3:2) Rumbeng kadi nga isarsaritatayo a dagus ti biddut dagiti sabsabali? Ti panangaramid iti kasta mangpataud laeng iti susik iti uneg ti kongregasion. (Efeso 4:1-3) No iturturongnatayo ti ayat, ditay ‘ipadlaw ti biddut’ ti kapammatiantayo. (Salmo 50:20) No kasano nga abbongan ti palitada ken pinta dagiti narusanger a paset ti diding, ti ayat abbonganna met dagiti biddut dagiti sabsabali.—Proverbio 17:9.
15 Ti ayat tignayennatayo a tumulong kadagidiay pudno nga agkasapulan. Bayat nga agtultuloy a kumaro dagiti kasasaad kadagiti maudi nga aldaw, mabalin nga adda dagiti kanito a kasapulan dagiti kapammatiantayo ti material wenno pisikal a tulong. (1 Juan 3:17, 18) Kas pagarigan, addaan kadi iti nakaro a pinansial a parikut wenno napukawan iti panggedan ti maysa a kameng ti kongregasion? No kasta, mabalintayo a tulongan iti material a pamay-an, aginggat’ ipalubos ti kasasaadtayo. (Proverbio 3:27, 28; Santiago 2:14-17) Adda kadi nasken a tarimaanen iti pagtaengan ti maysa a baket a balo? No kasta, mabalintay nga idiaya ti itutulongtayo a mangtarimaan.—Santiago 1:27.
16 Saan laeng a dagidiay asideg kadatayo ti pangipakitaantayo iti ayat. No dadduma, makadamagtayo kadagiti adipen ti Dios kadagiti sabali a lugar a biktima ti napigsa a bagyo, ginggined, wenno riribuk. Mabalin a kasapulanda unay ti taraon, kawes, ken dadduma pay a banag. Saan a napateg no ania ti nagtaudanda a puli wenno tribu. ‘Ay-ayatentayo ti intero a timpuyog dagiti kakabsat.’ (1 Pedro 2:17) Isu a kas kadagiti kongregasion idi umuna a siglo, magagarantayo a mangsuporta kadagiti urnos a panangsaranay a naorganisar a mangipaay iti tulong. (Aramid 11:27-30; Roma 15:26) No ipakitatayo ti ayat kadagita a pamay-an, mapalagdatayo ti singgalut a mamagkaykaysa kadatayo kadagitoy maudi nga aldaw.—Colosas 3:14.
17 Ti ayat tignayennatayo a mangiranud kadagiti sabsabali iti naimbag a damag maipapan iti Pagarian ti Dios. Utobem ti ulidan nga impasdek ni Jesus. Apay a nangasaba ken nangisuro? “Simnek ti asina” kadagiti tattao gapu iti nakaay-ay-ay a kasasaadda iti naespirituan. (Marcos 6:34) Binaybay-an ken inyaw-awan ida dagiti saan a pudno a narelihiosuan a pastor, a rumbeng koma a mangisuro kadakuada kadagiti naespirituan a kinapudno ken mangted iti namnama kadakuada. Isu a gapu iti nasged, naimpusuan nga ayat ken asi ni Jesus, liniwliwana dagiti tattao babaen “ti naimbag a damag ti pagarian ti Dios.”—Lucas 4:16-21, 43.
18 Iti kaaldawantayo, adu met dagiti tattao a nabaybay-an ken nayaw-awan iti naespirituan ken awanan iti namnama. No, kas ken Jesus, sipapanunottayo kadagiti naespirituan a kasapulan dagidiay di pay makaammo iti pudno a Dios, matignaytayo gapu iti ayat ken asi a mangiranud kadakuada iti naimbag a damag maipapan iti Pagarian ti Dios. (Mateo 6:9, 10; 24:14) Gapu ta ababan ti natda a panawen, ad-adda a naganat ita nga ikasabatayo daytoy makaispal-biag a mensahe.—1 Timoteo 4:16.
“Ti Panungpalan ti Amin a Bambanag Immasidegen”
19 Laglagipem a rinugian ni Pedro ti balakadna a maaddaan iti ayat iti maysa ken maysa babaen dagitoy a sasao: “Ti panungpalan ti amin a bambanag immasidegen.” (1 Pedro 4:7) Din agbayag, daytoy dakes a lubong ket sukatanto ti nalinteg a baro a lubong ti Dios. (2 Pedro 3:13) No kasta, saan a panawen ita ti panagpampamayan. Pinakdaarannatayo ni Jesus: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw kellaat nga umay kadakayo kas maysa a silo.”—Lucas 21:34, 35.
20 Ngarud, nasken nga ‘agtultuloytayo nga agbantay,’ a siputantayo no sadino ti ayantayon iti agus ti panawen. (Mateo 24:42) Agannadtayo iti aniaman kadagiti sulisog ni Satanas a mabalin a mangsinga kadatayo. Pulos a ditay palubosan daytoy nalamiis, awanan ayat a lubong a manglapped kadatayo a mangipakita iti ayattayo kadagiti sabsabali. Kangrunaan iti amin, ad-adda a sumingedtayo koma iti pudno a Dios a ni Jehova, nga iti saanen a mabayag tungpalento ti Mesianiko a Pagarianna ti nadayag a panggepna iti daga.—Apocalipsis 21:4, 5.
[Footnote]
a Iti 1 Pedro 4:8, kuna ti dadduma a patarus ti Biblia a masapul nga agiinnayattayo a “sipapasnek,” “naimpusuan,” wenno “sipupudno.”
DAGITI SALUDSOD A MAUSAR ITI PANAGADAL
• Ania a pammakada a balakad ti impaay ni Jesus kadagiti adalanna, ken ania ti mangipakita a naawatan dayta ni Pedro? (Par. 1-2)
• Ania ti “nasged nga ayat”? (Par. 3-5)
• Apay a rumbeng nga agiinnayattayo? (Par. 6-8)
• Kasanom a maipakita nga ay-ayatem dagiti sabsabali? (Par. 9-18)
• Apay a saan a panawen daytoy ti panagpampamayan, ken ania koma ti determinado nga aramidentayo? (Par. 19-20)
[Ladawan iti panid 29]
Ti nadekket a pamilia ad-adda a nakasagana a mangdaer kadagiti pakarigatan kadagitoy maudi nga aldaw
[Ladawan iti panid 30]
Ti ayat tignayennatayo a tumulong kadagidiay pudno nga agkasapulan
[Ladawan iti panid 31]
Ebkas ti ayat ti panangiranud kadagiti sabsabali iti naimbag a damag maipapan iti Pagarian ti Dios