Ti Dakkel a Layus​—Siasino Dagiti Dimngeg iti Dios?

Dakes ti ar-aramiden ti kaaduan a tattao idi tiempo ni Noe. Genesis 6:5

Naaddaan iti annak da Adan ken Eva, ket immadu ti tao ditoy daga. Idi agangay, nakikadua ti dadduma nga anghel iti panagrebelde ni Satanas.

Immayda ditoy daga ket naglasagda kas lallaki tapno maasawada dagiti babbai. Ti inyanak dagitoy a babbai ket saan nga ordinario a tattao ta nararanggas ken napipigsada.

Napno ti lubong iti tattao nga agar-aramid iti dakes. Kuna ti Biblia a “nakaro ti kinadakes ti tao ditoy daga ken kanayon a dakes ti pampanunot ken tarigagay ti pusona.”

Dimngeg ni Noe iti Dios ket nangaramid iti daong. Genesis 6:13, 14, 18, 19, 22

Naimbag a tao ni Noe. Imbaga ni Jehova ken ni Noe a dadaelenna dagiti dakes a tattao babaen ti dakkel a layus.

Imbaga pay ti Dios ken ni Noe a mangaramid iti dakkel a bangka, a maawagan iti daong. Iserrekna iti dayta ti pamiliana ken ti amin a kita ti animal.

Pinakdaaran ni Noe dagiti tattao maipapan iti um-umay a Layus, ngem saanda a dimngeg. Kinatkatawaan ti dadduma ni Noe; nakaunget met kenkuana ti dadduma.

Idi nalpasen ti daong, inserrek ni Noe dagiti animal.