Ania ti Namnama Dagiti Natay?

1. Ania ti naimbag a damag maipapan kadagiti natay?

Idi dimteng ni Jesus idiay Betania iti asideg ti Jerusalem, uppat nga aldaw a natayen ti gayyemna a ni Lazaro. Napan ni Jesus iti tanem a kaduana da Marta ken Maria a kakabsat ni Lazaro. Di nagbayag, immaribungbong ti adu a tattao. Mailadawam kadi iti panunotmo ti rag-o da Marta ken Maria idi pinagungar ni Jesus ti kabsatda?​—Basaen ti Juan 11:21-24, 38-44.

Ammo idin ni Marta ti naimbag a damag maipapan kadagiti natay. Ammona a pagungarento ni Jehova dagiti natay tapno agnaeddanto manen ditoy daga.​—Basaen ti Job 14:14, 15.

2. Ania ti kasasaad dagiti natay?

Naaramid ti tao manipud iti tapok. (Genesis 2:7; 3:19) Saantayo nga espiritu nga agnanaed iti nainlasagan a bagi. Naparsuatayo nga addaan iti pisikal a bagi, isu nga awan ti paset ti bagitayo nga agtultuloy nga agbiag kalpasan a mataytayo. No mataytayo, matay met ti utektayo, ket agpukawen ti panunottayo. Gapuna, idi napagungar ni Lazaro, awan ti naestoriana a kapadasanna idi natay ta awan ti puot dagiti natay.​—Basaen ti Salmo 146:4; Eclesiastes 9:5, 6, 10.

Ti kadi Dios tutuokenna dagiti tattao iti apuy kalpasan ti ipapatayda? Yantangay ipakita ti Biblia nga awan puot dagiti natay, nalawag ngarud a ti umap-apuy nga impierno ket maysa nga ulbod a sursuro a mangpadakes iti Dios. Kagurana ti kapanunotan a panangtutuok kadagiti tattao iti apuy.​—Basaen ti Jeremias 7:31.

Buyaen ti video nga Ania ti Kasasaad Dagiti Natay?

3. Makasaritadatayo kadi dagiti natay?

Saan a makasao ken saan a makangngeg dagiti natay. (Salmo 115:17) Ngem adda dagiti dakes nga anghel a kabaelanda a kasarita dagiti tattao, nga agpammarangda nga isuda dagiti natay. (2 Pedro 2:4) Iparit ni Jehova ti panangpadas a makisarita kadagiti natay.​—Basaen ti Deuteronomio 18:10, 11.

4. Siasino dagiti mapagungar?

Minilion a natay ti mapagungarto ditoy daga. Mapagungarto uray ti dadduma a saan a makaam-ammo iti Dios ken nagar-aramid iti kinadakes.​—Basaen ti Lucas 23:43; Aramid 24:15.

Dagiti mapagungar mabalindanto a sursuruen ti kinapudno maipapan iti Dios ken ipakita ti pammatida ken Jesus babaen ti panagtulnogda kenkuana. (Apocalipsis 20:11-13) Dagidiay mapagungar ken agaramid iti naimbag matagiragsakdanto ti biag nga agnanayon ditoy daga.​—Basaen ti Juan 5:28, 29.

5. Ania ti isuro kadatayo ti panagungar maipapan ken Jehova?

Pinagbalin ti Dios a posible a maaddaan iti namnama dagiti natay babaen ti panangibaonna iti Anakna a matay para kadatayo. Gapuna, ti panagungar ipakitana kadatayo ti ayat ken nagpaiduma a kinaimbag ni Jehova. Inton mapagungar dagiti natay, siasino ti nangnangruna a kayatmo a makita?​—Basaen ti Juan 3:16; Roma 6:23.