Pinaimbagna ti Agkukutel Gapu iti Asi

Idi mangaskasaba ni Jesus ken ti uppat nga adalanna kadagiti “sinagoga iti intero a Galilea,” nagdinamag dagiti nakaskasdaaw a bambanag nga inaramidna. (Marcos 1:39) Dimmanon ti damag iti siudad nga adda lalaki nga agkukutel. Dineskribir ti doktor a ni Lucas ti lalaki a “nakaro ti kukutelna.” (Lucas 5:12) Iti nakaro a kasasaad, daytoy a makapapatay a sakit ti in-inut a mangrunot iti nadumaduma a paset ti bagi.

Nakalkaldaang ngarud ti kasasaad daytoy nga agkukutel ken masapul nga agnaed iti lugar nga adayo kadagiti tattao. Kasta met, no adda dagiti tattao iti asidegna, masapul nga ipukkawna, “Narugitak, narugitak!” tapno saanda nga umasideg ken saanda a maakaran. (Levitico 13:45, 46) Ngem ania ti inaramid daytoy nga agkukutel? Immasideg ken Jesus ket nagparintumeng a nagpakpakaasi: “Apo, no kayatmo laeng koma, mapaimbagnak.”—Mateo 8:2.

Talaga a nagbileg ti pammati ti lalaki ken Jesus! Nakakaasi ti langana gapu iti sakitna! Ania ti aramiden ni Jesus? Ania ti aramidem no addaka koma sadiay? Gapu iti asi, iniggaman ni Jesus ti lalaki. Kinuna ni Jesus kenkuana: “Kayatko! Umimbagka.” (Mateo 8:3) Mabalin a narigat a patien ti dadduma dayta, ngem dagus nga immimbag ti agkukutel.

Kayatmo kadi nga adda agturay a naasi ken addaan pannakabalin a kas ken Jesus? Ti panangpaimbagna iti daytoy nga agkukutel ipanamnamana kadatayo nga inton agbalin nga Ari ni Jesus iti intero a daga, matungpalto daytoy a padto ti Biblia: “Maasianto kadagiti marigrigat ken napanglaw, ket ispalennanto ti biag dagiti napanglaw.” (Salmo 72:13) Wen, aramidento ni Jesus ti tarigagay ti pusona a tumulong iti amin nga addaan iti an-annayen.

Lagipem a sakbay pay a paimbagen ni Jesus daytoy nga agkukutel, maragragsakanen dagiti tattao iti ministeriona. Ita, nadamagda manen daytoy a nakaskasdaaw nga inaramidna. Ngem saan a kayat ni Jesus a mamati laeng kenkuana dagiti tattao gapu kadagiti nadamdamagda. Ammona ti padto nga agkuna a ‘saannanto nga ipangngeg ti timekna iti kalsada,’ kayatna a sawen nga isu ket maitan-ok. (Isaias 42:1, 2) Gapuna, kinuna ni Jesus iti immimbag nga agkukutel: “Dimo pulos ibagbaga daytoy iti asinoman, ngem mapanka agpakita iti padi, ket itedmo ti daton nga imbilin ni Moises, kas pammaneknek kadakuada nga immimbagkan.”—Mateo 8:4.

Ngem mabalin a mailadawanmo a gapu iti ragsak ti lalaki a napaimbag, saanna a mateppelan nga ibaga ti napasamak. Impadpadamagna dayta iti amin. Daytoy ti nangrubrob iti interes ken panagusiuso dagiti tattao nga uray la saanen a nawaya a makapan ni Jesus iti siudad. Gapuna, nagyan pay laeng kadagiti awan matataona a lugar. Ngem sinurot latta dagiti tattao a naggapu iti nadumaduma a lugar tapno agpaisuro ken agpaagasda kenkuana.