Ginasut ti Nakakita Kenkuana Sakbay ti Pentecostes

Kalpasan a nagungar ni Jesus, inyurnosna nga aguummongda a kaduana ti 11 nga apostolna iti maysa a bantay iti Galilea. Adda met sadiay ti dadduma nga adalan, agarup 500, a dadduma kadagitoy ti agduadua pay laeng. (Mateo 28:17; 1 Corinto 15:6) Ngem ti ibaga ni Jesus iti dayta a tiempo ti mangkombinsir iti tunggal maysa nga isu ket nagungaren.

Inlawlawag ni Jesus nga inted ti Dios kenkuana ti amin nga autoridad idiay langit ken ditoy daga. Kinunana: “Inkayo ngarud kadagiti tattao iti amin a nasion ket pagbalinenyo ida nga adalak, ken bautisaranyo ida iti nagan ti Ama ken iti nagan ti Anak ken iti nagan ti nasantuan nga espiritu, ken isuroyo a tungpalenda ti amin nga imbilinko kadakayo.” (Mateo 28:18-20) Saan laeng a nagungar ni Jesus. Kayatna a maitultuloy pay a maikasaba ti naimbag a damag.

Amin a pasurot ni Jesus—lallaki, babbai, ken ubbing—nabilinda nga agaramid kadagiti adalan. Mabalin a pasardengen ida dagiti bumusbusor a mangasaba ken mangisuro, ngem impatalged ni Jesus: “Naiteden kaniak ti amin nga autoridad idiay langit ken ditoy daga.” Ania ti kayat a sawen dayta kadagiti pasurotna? Imbagana: “Laglagipenyo a kanayon nga addaak kadakayo agingga iti panungpalan daytoy a sistema.” Saan nga ibagbaga ni Jesus nga amin a mangikasaba iti naimbag a damag ket kabaelandan ti agaramid iti milagro. Nupay kasta, ti nasantuan nga espiritu ti tumulong kadakuada.

Nagparang ni Jesus kadagiti adalanna “40 nga aldaw” kalpasan ti panagungarna. Nagusar iti nagduduma a bagi ken “babaen iti adu a positibo a pammaneknek imparangna ti bagina a sibibiag,” ken nangted iti instruksion “maipapan iti Pagarian ti Dios.”—Aramid 1:3; 1 Corinto 15:7.

Nalawag nga idi adda pay dagiti apostol idiay Galilea, imbilin ni Jesus nga agsublida idiay Jerusalem. Idi nakipagkita kadakuada iti siudad, kinunana: “Dikay pumanaw iti Jerusalem, no di ket itultuloyyo nga urayen ti inkari ti Ama, a nangngegyo kaniak; ta iti kinapudnona, nangbautisar ni Juan iti danum, ngem mabautisarankayto iti nasantuan nga espiritu sumagmamano nga aldaw kalpasan daytoy.”—Aramid 1:4, 5.

Idi agangay, nakipagkita manen ni Jesus kadagiti apostolna. “Impanna ida agingga idiay Betania,” iti makindaya a sikigan ti Bantay Dagiti Olibo. (Lucas 24:50) Nupay imbagan ni Jesus ti maipapan iti ipapanawna, mamatida pay laeng a ditoy daga ti Pagarianna.—Lucas 22:16, 18, 30; Juan 14:2, 3.

Insaludsod dagiti apostol ken Jesus: “Apo, isublim kadi ti pagarian iti Israel iti daytoy a tiempo?” Kinunana: “Saan a dakayo ti mangammo iti tiempo wenno pampanawen nga inkeddeng ti Ama.” Kalpasanna, impaganetgetna manen ti trabaho nga aramidenda. Kinunana: “Umawatkayto iti pannakabalin inton umay kadakayo ti nasantuan nga espiritu, ket dakayto dagiti saksik idiay Jerusalem, iti intero a Judea ken Samaria, ken agingga iti kaadaywan a paset ti daga.”—Aramid 1:6-8.

Adda idi dagiti apostol iti Bantay Dagiti Olibo, kaduada ti napagungar a ni Jesus a mangrugin nga agpalangit. Di nagbayag, nalingdanen kadagiti ulep ket saandan a nakita. Kalpasan a nagungar, nagusar ni Jesus kadagiti nagduduma a bagi. Ngem ita, inuksobna ti bagi nga inusarna iti daytoy a gundaway, ket immuli idiay langit kas maysa nga espiritu. (1 Corinto 15:44, 50; 1 Pedro 3:18) Bayat a kumitkita a nakatangad dagiti matalek nga apostol, nagparang iti abayda ti “dua a lallaki a nakabado iti puraw.” Kinuna dagitoy nga anghel a nagparang kas tao: “Lallaki a taga-Galilea, apay a nakatakderkayo a mangtangtangad iti tangatang? Daytoy a Jesus a napan iti tangatang manipud kadakayo umayto a kas iti pamay-an a nakitayo nga ipapanna iti tangatang.”—Aramid 1:10, 11.

Awan ti nagarbo a seremonia idi pimmanaw ditoy daga ni Jesus. Dagiti laeng pasurotna ti nakakita. Agsublinto iti kasta met laeng a pamay-an—nga awan ti nagarbo a seremonia. Dagiti laeng matalek a pasurotna ti nakatarus ti kaaddana kas Ari iti Pagarian.

Nagsubli dagiti apostol idiay Jerusalem. Iti simmaruno nga al-aldaw, nagtataripnongda a kaduada ti dadduma nga adalan, agraman ni “Maria nga ina ni Jesus ken ti kakabsatna.” (Aramid 1:14) Nagtultuloyda a nagkararag. Ti maysa nga inkararagda ket ti panangpili iti adalan a mangsukat ken ni Judas Iscariote tapno agbalin met laeng a 12 ti bilang dagiti apostol. (Mateo 19:28) Kayatda ti adalan a nakakita kadagiti aramid ni Jesus ken ti panagungarna. Nagbibinnunotda tapno maammuanda ti pagayatan ti Dios. Dayta ti maudi a nadakamat a panagbibinnunot iti Biblia. (Salmo 109:8; Proverbio 16:33) Ni Matias, a mabalin a maysa kadagiti 70 nga imbaon ni Jesus, ti napili ken “naibilang kadagiti 11 nga apostol.”—Aramid 1:26.

Sangapulo nga aldaw kalpasan a nagpalangit ni Jesus, sinelebraran dagiti Judio ti Piesta ti Pentecostes idi 33 C.E. Agarup 120 nga adalan ti nagtataripnong iti makinngato a kuarto iti Jerusalem. Bigla a napno ti balay iti daranudor kas iti bumanesbes nga angin. Nagparang dagiti kas iti dila nga apuy a nagdisso iti tunggal maysa nga adda sadiay. Nangrugi nga agsao dagiti adalan iti nagduduma a pagsasao. Naibukbok kadakuada ti nasantuan nga espiritu nga inkari ni Jesus!—Juan 14:26.