Panangsuporta iti Trabaho ti Pagarian iti Lugartayo ken iti Intero a Lubong

KAS kaitungpalan ti padto ni Jesus maipapan iti maudi nga al-aldaw, ikaskasaba dagiti Saksi ni Jehova ti naimbag a damag “agingga iti kaadaywan a paset ti daga.” (Ara. 1:8; Mat. 24:14) Tapno maaramidda daytoy, us-usarenda ti tiempo ken pigsada a mangiranud iti naespirituan a bambanag. Gapu ta agtalekda nga ipaay ni Jehova ti kasapulan dagiti katrabahuanna, agtultuloy nga iyun-unada ti Pagarian ti Dios. (Mat. 6:25-34; 1 Cor. 3:5-9) Nalawag nga ipakita dagiti resulta nga an-anamongan ken bembendisionan ida ni Jehova.

PANANGASIKASO ITI INTERES TI PAGARIAN ITI INTERO A LUBONG

² No makitada dagiti pamay-antayo a mangasaba ken maammuanda a libre dagiti iwarwarastayo a Biblia ken dagiti literatura a naibatay iti Biblia, adda dagiti agsaludsod: “Kasano a posible amin dagitoy?” Pudno a dakkel ti magastos iti panagimprenta ken panagaramid iti Biblia ken dagiti literatura a naibatay iti Biblia. Adu pay ti magastos iti panagibangon ken panangmantener kadagiti pagtaengan a Bethel a pagyanan dagiti ministro a mangasikaso kadagiti pagimprentaan, mangidaulo iti trabaho a panangasaba, ken agserbi iti dadduma pay a pamay-an tapno maisaknap ti naimbag a damag. Maipaayan met iti pinansial a tulong dagiti manangaywan iti sirkito, misionero, special pioneer, ken dadduma pay nga adda iti espesial nga amin-tiempo a panagserbi tapno makapagtultuloyda iti trabahoda. Nalawag a ti trabaho a panangikasaba iti naimbag a damag ita​—iti man lugartayo wenno iti intero a lubong​—ket agkasapulan iti dakkel a gatad. Paggapgapuan ngay dagita a kuarta?

³ Adu a mangap-apresiar iti trabaho dagiti Saksi ni Jehova a panangisuro iti Biblia ti maragsakan a mangted iti donasion para iti sangalubongan a trabaho. Ngem datayo a Saksi ti kangrunaan a mangsupsuporta iti trabahotayo. Dadduma ti boluntario a mangipatpatulod iti donasionda iti sanga nga opisina dagiti Saksi ni Jehova. Kas kadagiti nagkauna nga adipen ti Dios, sipaparabur a supsuportarantayo ti panagibangon iti pasdek a pagdaydayawan ken Jehova. (Ex. 35:20-29; 1 Cron. 29:9) Dadduma a donasion ket agtaud kadagiti sanikua a maipatawid babaen ti testamento, adda met dagiti maawat a babassit a donasion nga aggapu kadagiti indibidual, kongregasion, ken sirkito. No mapagtitipon dagitoy, umdasen a pangsuporta tapno maitultuloy ti ministerio.

⁴ Ibilang dagiti Saksi ni Jehova a pribilehio nga usaren ti kuartada ken dadduma pay a material a sanikuada tapno maisaknap ti trabaho a panangasaba. Addaan idi ni Jesus ken dagiti adalanna iti kahon ti kuarta a pangalaanda iti pondo a mausar kadagiti paggastuanda. (Juan 13:29) Dakamaten ti Biblia ti maipapan kadagiti babbai a nagserbi ken Jesus ken kadagiti adalanna. (Mar. 15:40, 41; Luc. 8:3) Siyayaman nga inawat ni apostol Pablo ti naayat a material a tulong manipud kadagiti interesado a maisaknap ti naimbag a damag ken dagiti mayat a makiraman iti ministerio. (Fil. 4:14-16; 1 Tes. 2:9) Agtultuloy a sursuroten dagiti Saksi ni Jehova dagitoy nga ulidan idi un-unana maipapan iti naregta a panagserbi ken naparabur a panangted. Gapuna, mabalinen a maited ti “libre a danum ti biag” kadagiti naemma a tattao iti amin a lugar.​—Apoc. 22:17.

PANANGASIKASO KADAGITI KASAPULAN TI KONGREGASION

⁵ Dagiti paggastuan iti kada kongregasion ket masupusopan met babaen kadagiti boluntario a donasion. Awan ti panagkolekta, awan met ti naikeddeng nga ited a gatad, ken panagur-or iti kuarta. Adda dagiti kahon a pagitinnagan iti donasion kadagiti lugar a paggigimongan tapno adda gundaway ti tunggal maysa a mangted sigun iti “inkeddeng ti pusona.”​—2 Cor. 9:7.

⁶ Dagiti maidonar a kuarta ket kangrunaan a para iti paggastuan iti pannakausar ken pannakamantener ti Kingdom Hall. Mabalin nga ikeddeng ti bagi dagiti panglakayen nga ipatulod ti dadduma a kuarta iti sanga nga opisina dagiti Saksi ni Jehova tapno mausar iti pannakaisaknap ti trabaho mainaig iti Pagarian iti intero a lubong. No naikeddengen, adda maaramid a resolusion nga anamongan ti kongregasion para iti daytoy a panggep. Gapuna, adu a kongregasion ti regular a mangmangted iti donasion para iti sangalubongan a trabaho. No sipapanunottayo kadagiti kasapulan ti kongregasion, saanen a masapul a kanayon a mayanunsio ti panagdonar.

PANANGASIKASO KADAGITI DONASION

⁷ Kalpasan ti tunggal gimong, dua a kakabsat a lallaki ti mangala iti kuarta iti kahon ti donasion sa irekordda dayta. (2 Ar. 12:9, 10; 2 Cor. 8:20) Mangaramid ti bagi dagiti panglakayen kadagiti urnos tapno maaywanan dagitoy a pondo agingga a maipatulod iti sanga nga opisina wenno mausar para iti kasapulan ti kongregasion. Ti kabsat a mangas-asikaso kadagiti kuenta ti kongregasion isaganana ti binulan nga statement tapno maipakaammo iti kongregasion. Kada tallo a bulan, ti koordineytor ti bagi dagiti panglakayen iyurnosna ti pannaka-audit dagiti kuenta.

PAGGASTUAN TI SIRKITO

⁸ Masupusopan dagiti paggastuan kadagiti asamblea, ken dadduma pay a paggastuan ti sirkito babaen kadagiti donasion dagiti Saksi a mangbukel iti sirkito. Adda dagiti kahon iti donasion kadagiti pagasambleaan tapno maited dagiti boluntario a donasion para iti sirkito. Kanayonanna, tapno masupusopan dagiti agdama paggastuan, mabalin a mangted dagiti kongregasion iti kontribusion kadagiti sabali a gundaway.

⁹ Nasayaat no kabaelan ti sirkito a supusopan ti aniaman a paggastuan, sa maidonar dagiti sobra a pondo iti sangalubongan a trabaho. No saan nga umdas ti pondo ti sirkito tapno mabayadan dagiti naggastuan iti kalkalpas nga asamblea wenno ti dadduma a paggastuan iti sumaganad nga asamblea, kas iti abang ti pagasambleaan, mabalin nga ipalagip ti manangaywan iti sirkito kadagiti kongregasion ti pribilehioda a mangted iti kontribusion. Pagsasaritaan daytoy ti tunggal bagi dagiti panglakayen ken ammuenda no mano ti kabaelan nga idonar ti kongregasionda para iti pondo ti sirkito. Kalpasan a napagnunumuanda dayta, mangaramidda iti resolusion.

¹⁰ No adda dagiti paggastuan a masapul a pagsasaritaan dagiti panglakayen iti sirkito, maangay ti miting dagiti panglakayen iti aldaw ti asamblea sirkito. Amin a desision malaksid pay kadagiti naikeddeng a paggastuan ti sirkito ket masapul a maisurat kas resolusion nga anamongan dagiti panglakayen. Masapul nga eksakto ti kantidad a nadakamat iti resolusion ken maipakaammo tapno maaprobaran tunggal adda mairuar a pondo ti sirkito.

¹¹ Adda maaramid nga urnos para iti regular a pannaka-audit dagiti pondo ti sirkito.

PANANGASIKASO KADAGITI NAPANGLAW

¹² Ti maysa a panggep nga addaan idi ni Jesus ken dagiti adalanna iti kahon ti kuarta ket pangtulongda kadagiti napanglaw. (Mar. 14:3-5; Juan 13:29) Nagtultuloy dayta a responsabilidad dagiti Kristiano ta kinuna ni Jesus: “Kanayon a kaduayo dagiti napanglaw.” (Mar. 14:7) Kasano nga itungtungpal ita dagiti Saksi ni Jehova daytoy a responsabilidadda?

¹³ No dadduma, mabalin nga agkasapulan iti material a tulong dagiti matalek a kakabsat iti kongregasion gapu iti kinalakay, kinabaket, sakit, wenno pakarigatan a dida maliklikan. Mabalin a matignay a tumulong dagiti kapamilia, kabagian, ken dadduma pay a makaammo iti kasapulanda. Maitunos daytoy iti sasao ni apostol Juan: “Asinoman nga addaan kadagiti material a sanikua iti daytoy a lubong ket makitana nga agkasapulan ti kabsatna ngem dina ipakita a makipagrikna kenkuana, kasano koma nga agtalinaed kenkuana ti ayat ti Dios? Ay-ayatek nga annak, agayattayo koma, saan nga iti sao wenno iti dila, no di ket iti aramid ken kinapudno.” (1 Juan 3:17, 18; 2 Tes. 3:6-12) Paset ti pudno a panagdayaw ti panangasikaso kadagiti matalek a kakabsat a mabalin nga agkasapulan iti material a tulong.​—Sant. 1:27; 2:14-17.

¹⁴ Iti umuna a suratna ken ni Timoteo, inlawlawag ni apostol Pablo no kasano a maipaay ti material a tulong kadagiti maikari. Mabasam ti balakadna iti 1 Timoteo 5:3-21. Kangrunaan a responsabilidad ti tunggal Kristiano nga ipaay dagiti kasapulan ti sangakabbalayanda. Dagiti nataengan wenno masaksakit a kakabsat ket rumbeng a tulongan dagiti annakda, appoko, wenno dadduma pay nga asideg a kakabagianda. No dadduma, adda dagiti material a tulong nga ipaay dagiti ahensia ti gobierno wenno programa ti komunidad, isu a mabalin a tulongan dagiti kabagian wenno ti dadduma dagiti agkasapulan a mangaprobetsar iti kasta a tulong. Mabalin nga adda dagiti situasion a kasapulan a tumulong ti intero a kongregasion kadagiti agkasapulan a kakabsat a nabayagen a matalek nga agserserbi. No awan ti kapamilia wenno dadduma pay a kabagian a tumulong kadagita a kakabsat ken awan ti tulong nga ited dagiti ahensia ti gobierno, mabalin a mangaramid ti bagi dagiti panglakayen kadagiti urnos tapno maipaayanda iti tulong. Dagiti Kristiano ibilangda a pribilehio nga iranud dagiti material a sanikuada kadagiti agkasapulan.

¹⁵ Adu kadagiti kakabsattayo ti marigrigatan gapu iti pannakaidadanes, gubat, ginggined, layus, bisin, wenno dadduma pay a didigra a gagangay kadagitoy napeggad a tiempo. (Mat. 24:7-9) Mabalin nga awan ti maited a tulong dagiti kakabsat iti kongregasion iti maysa ken maysa, isu nga iyurnos ti Bagi a Manarawidwid ti panagtitinnulong dagiti kakabsat iti nagduduma a lugar tapno maipaay ti kasapulan a tulong. Kastoy met laeng ti inaramid dagiti Kristiano idiay Asia Menor tapno maipaay ti taraon dagiti kakabsat idiay Judea idi adda napasamak a bisin. (1 Cor. 16:1-4; 2 Cor. 9:1-5) No tuladentayo ti ulidanda, pampaneknekantayo ti ayattayo kadagiti kakabsattayo ken ipakpakitatayo a pudno nga adalannatayo ni Jesu-Kristo.​—Juan 13:35.

PANAGIWARAS ITI LITERATURA

¹⁶ Dakkel ti maaramidan ti panagiwaras kadagiti Biblia ken literatura a naibatay iti Biblia tapno maisaknap ti mensahe maipapan iti Pagarian. Gagangay a dutokan ti bagi dagiti panglakayen ti maysa a ministerial nga adipen a mangasikaso kadagiti suplay a libro, bokleta, broshur, ken dadduma pay a literatura ti kongregasion. Dagiti kakabsat a madutokan a mangasikaso kadagitoy a suplay saanda a tagtagilag-anen ti responsabilidadda. Masapul a naurnos ti rekordda tapno adda magun-odan a suplay ti kongregasion.

¹⁷ Kas dedikado a Kristiano, bigbigentayo a ti tiempo, mental ken pisikal nga abilidadtayo, paglaingan ken material a sanikua, ken uray ti biagtayo ket sagut ti Dios ken nairanta nga usarentayo nga agserbi kenkuana. (Luc. 17:10; 1 Cor. 4:7) Ipakpakitatayo ti nauneg a panagayat ken Jehova no usarentayo dagiti sanikuatayo iti umiso a pamay-an. Kayattayo nga idaydayaw ni Jehova babaen kadagiti sanikuatayo, ta ammotayo a maragsakan iti aniaman a sagut a maitedtayo kas ebkas ti amin-kararua a debosiontayo. (Prov. 3:9; Mar. 14:3-9; Luc. 21:1-4; Col. 3:23, 24) Kinuna ni Jesus: “Inawatyo nga awan bayadna, itedyo nga awan bayadna.” (Mat. 10:8) Bayat nga us-usarentayo ti biagtayo ken dagiti sanikuatayo nga agserbi ken Jehova, makariknatayo iti dakdakkel a rag-o.​—Ara. 20:35.