KAPITULO 11
Apay a Nakaro ti Panagsagaba?
1, 2. Ania ti isalsaludsod ti adu a tattao?
NADADAEL ti maysa nga ili gapu iti tsunami. Maysa a lalaki ti nagpaltopaltog iti simbaan a nakasugatan ken nakatayan ti sumagmamano a tattao. Maysa nga ina ti natay gapu iti kanser ket naulila ti lima nga annakna.
2 No mapasamak dagiti kasta a didigra wenno trahedia, adu ti mangpampanunot, “Apay?” Isalsaludsod ti adu no apay a napno ti lubong iti gura ken panagsagaba. Napampanunotmo met kadin dayta?
3, 4. (a) Ania ti insaludsod ni Habakuk? (b) Ania ti insungbat kenkuana ni Jehova?
3 Maammuantayo iti Biblia a kasta met laeng ti saludsod dagiti tattao a nabileg ti pammatida iti Dios. Kas pagarigan, insaludsod ni propeta Habakuk ken ni Jehova: “Apay nga ipakpakitam kaniak ti dakes? Ken apay nga ipalpalubosmo ti panangidadanes? Apay nga adda pannakadadael ken kinaranggas iti sanguanak? Ken apay a nakaad-adu ti panagaapa ken panagririri?”—Habakuk 1:3.
4 Mabasatayo iti Habakuk 2:2, 3 ti sungbat ti Dios iti saludsod ni Habakuk ken ti karina nga ilintegna ti situasion. Ay-ayaten unay ni Jehova dagiti tattao. Kuna ti Biblia: “Ipatpategnakayo.” (1 Pedro 5:7) Kinapudnona, no marurodtayo a makakitkita iti panagsagaba, nakarkaro pay ti marikrikna ti Dios. (Isaias 55:8, 9) Isu a pagsasaritaantayo ti saludsod nga, Apay a nakaro ti panagsagaba ditoy lubong?
APAY A NAKARO TI PANAGSAGABA?
5. Ania ti ibagbaga ti adu nga agisursuro iti relihion maipapan iti panagsagaba? Ania ti isursuro ti Biblia?
5 Masansan nga ibagbaga dagiti pastor, padi, ken agisursuro iti relihion a pagayatan ti Dios nga agsagaba dagiti tattao. Ibaga ti dadduma nga amin a mapasamak iti maysa a tao, agraman dagiti trahedia, ket inkeddengen ti Dios ken saantayo a pulos maawatan no apay. Adda met dagiti mangibagbaga a matay dagiti tattao, agraman dagiti ubbing, tapno makaduada ti Dios idiay langit. Ngem saan nga agpayso dayta. Saan a pulos mangpataud ni Jehova kadagiti dakes a pasamak. Kuna ti Biblia: “Imposible nga agaramid ti Dios iti dakes, ken saan nga agaramid ti Mannakabalin-amin iti di umiso!”—Job 34:10.
6. Apay nga adu ti mangpabpabasol iti Dios iti amin a panagsagaba iti lubong?
6 Adu ti mangpabpabasol iti Dios iti amin a panagsagaba iti lubong ta pampanunotenda nga isu ti mangiturturay iti lubong. Ngem kas naadaltayo iti Kapitulo 3, ni Satanas a Diablo ti pudpudno a mangiturturay iti lubong.
7, 8. Apay a nakaro ti panagsagaba iti lubong?
7 Kuna ti Biblia a “ti intero a lubong ket adda iti pannakabalin daydiay managdakdakes.” (1 Juan 5:19) Naranggas ken naulpit ti mangiturturay iti lubong a ni Satanas. ‘Al-allilawenna ti intero a mapagnaedan a daga.’ (Apocalipsis 12:9) Adu a tattao ti mangtultulad kenkuana. Ket dayta ti maysa a rason no apay a napno ti lubong iti kinaulbod, gura, ken kinaranggas.
8 Adda pay dadduma a rason no apay a nakaro ti panagsagaba iti lubong. Idi nagrebelde da Adan ken Eva, naipatawidda ti basol kadagiti annakda. Ket gapu iti basol, makaaramid dagiti tattao iti mangparigat iti padada a tao. Masansan a kayatda a nangatngatoda ngem iti dadduma. Agaapada, makigubatda, ken irurrurumenda ti dadduma. (Eclesiastes 4:1; 8:9) No dadduma, agsagaba dagiti tattao gapu iti “tiempo ken di ninamnama a pasamak.” (Eclesiastes 9:11) No addada iti di umiso a lugar iti di umiso a tiempo, mabalin a mapasamak kadakuada ti aksidente ken dadduma pay a dakes a banag.
9. Apay a masiguradotayo nga adda nagsayaat a rason ni Jehova a mangipalpalubos nga agtultuloy ti panagsagaba?
9 Pulos a saan a ni Jehova ti mangpatpataud iti panagsagaba. Saan nga isu ti makimbasol iti gubat, krimen, ken panangirurumen. Saan a ti Dios ti mangpatpataud iti ginggined, bagyo, ken layus. Ngem baka mapanunotmo, ‘No ni Jehova ti kabibilgan iti intero nga uniberso, apay a saanna a pasardengen dagita a dakes a pasamak?’ Ammotayo nga ipatpategnatayo unay ti Dios isu nga adda la ketdi nagsayaat a rason no apay nga ipalpalubosna nga agtultuloy ti panagsagaba.—1 Juan 4:8.
NO APAY NGA IPALPALUBOS TI DIOS TI PANAGSAGABA
10. Kasano a kinarit ni Satanas ni Jehova?
10 Iti hardin ti Eden, inallilaw ti Diablo da Adan ken Eva. Imbaga ni Satanas a ti Dios ket dakes nga Agturay. Pinagparangna nga adda naimbag a banag nga ipapaidam ti Dios kadakuada. Kayat ni Satanas a mamatida nga isu ket nasaysayaat nga agturay ngem ni Jehova ken saanda a kasapulan ti Dios.—Genesis 3:2-5; kitaen ti Endnote 27.
11. Ania a saludsod ti masapul a sungbatantayo?
11 Nagsukir ken nagrebelde ken Jehova da Adan ken Eva. Impagarupda nga adda kalinteganda nga agdesision para iti bagida no ania ti umiso ken di umiso. Kasano ngata a paneknekan ni Jehova a kamali dagiti rebelde ken ammona ti kasayaatan para kadatayo?
12, 13. (a) Apay a saan a dagus a dinadael ni Jehova dagiti rebelde? (b) Apay nga impalubos ni Jehova nga iturayan ni Satanas ti lubong ken iturayan dagiti tattao ti bagbagida?
12 Saan a dagus a dinadael ni Jehova da Adan ken Eva. Imbes ketdi, impalubosna a maaddaanda iti annak. Kalpasanna, pinalubosanna dagiti annakda nga agpili no asino ti kayatda a mangituray kadakuada. Panggep ni Jehova a mapno ti daga iti perpekto a tattao, ket mapasamakto dayta uray ania ti aramiden ti Diablo.—Genesis 1:28; Isaias 55:10, 11.
13 Kinuestion ni Satanas ni Jehova iti sango ti minilion nga anghel. (Job 38:7; Daniel 7:10) Isu nga inikkan ni Jehova ni Satanas iti tiempo a mangpaneknek no agpayso ti akusasionna. Inikkanna met dagiti tattao iti tiempo a mangaramid iti bukodda a gobierno babaen ti panangiwanwan ni Satanas tapno makita no talaga nga agballigida uray no awan ti tulong ti Dios.
14. Ania ti napaneknekan iti panaglabas ti tiempo?
14 Iti rinibu a tawen, pinadas dagiti tattao nga iturayan ti bagbagida, ngem napaayda. Napaneknekan nga ulbod ni Satanas. Talaga a kasapulan dagiti tattao ti tulong ti Dios. Husto ni propeta Jeremias idi imbagana: “O Jehova, ammok a saan a kabaelan ti tao nga idalan ti bagina. Saan a naikkan ti tao iti autoridad a mangiturong uray iti addangna.”—Jeremias 10:23.
APAY A NAGBAYAG TI PANAGUR-URAY NI JEHOVA?
15, 16. (a) Apay nga impalubos ni Jehova nga agtultuloy ti panagsagaba iti napaut a tiempo? (b) Apay a saan a sinolbar ni Jehova dagiti problema a pinataud ni Satanas?
15 Apay nga impalubos ni Jehova nga agtultuloy ti panagsagaba iti napaut a tiempo? Apay a saanna a pagsardengen dagiti dakes a mapaspasamak? Iti panaglabas ti tiempo, napaneknekan a napaay ti panangituray ni Satanas. Pinadas dagiti tattao ti amin a klase ti gobierno ngem saanda a nagballigi. Uray no rimmang-ay ti siensia ken teknolohia, immadu met ti kinaawan hustisia, kinapanglaw, krimen, ken gubat. Saantayo a kabaelan nga iturayan ti bagbagitayo no awan ti tulong ti Dios.
16 Nupay kasta, saan a sinolbar ni Jehova dagiti problema a pinataud ni Satanas. No inaramid ti Dios dayta, kaipapananna a supsuportaranna ti panangituray ni Satanas. Siempre, saanna a pulos aramiden dayta. Maysa pay, mabalin a panunoten dagiti tattao a kabaelanda nga iturayan ti bagbagida. Ngem kinaulbod dayta ken saan a suportaran ni Jehova. Saan a pulos agulbod ti Dios.—Hebreo 6:18.
17, 18. Ania ti aramidento ni Jehova iti amin a dinadael ni Satanas?
17 Kabaelan ngata ni Jehova a tarimaanen ti amin a nadadael gapu iti panagrebelde ni Satanas ken dagiti tattao? Wen. Awan ti imposible iti Dios. Ammo ni Jehova no kaano a naan-anay a masungbatan ti amin nga akusasion ni Satanas. Kalpasan dayta, pagbalinennan a paraiso ti daga kas iti pinanggepna. Mapagungarto ti amin nga “adda iti pakalaglagipan a tanem.” (Juan 5:28, 29) Saanton a pulos agsakit wenno matay dagiti tattao. Tarimaanento ni Jesus ti amin a dinadael ni Satanas. Usarento ni Jehova ni Jesus a ‘mangdadael kadagiti aramid ti Diablo.’ (1 Juan 3:8) Agyamantayo ta naanus ni Jehova ken ik-ikkannatayo iti tiempo a mangam-ammo ken mangpili kenkuana kas Agturay kadatayo. (Basaen ti 2 Pedro 3:9, 10.) Uray no agpasartayo iti rigat, tulongannatayo nga agibtur.—Juan 4:23; basaen ti 1 Corinto 10:13.
18 Saannatayo a pilpiliten ni Jehova a mangpili kenkuana kas Agturay kadatayo. Inikkanna dagiti tattao iti wayawaya nga agpili. Adalentayo no kasanotayo a magunggonaan iti dayta a nagpateg a regalo.
KASANOM NGA USAREN TI REGALO A WAYAWAYA NGA AGPILI?
19. Ania a nagsayaat a regalo ti inted ni Jehova kadatayo? Apay a masapul nga agyamantayo iti dayta a regalo?
19 Naidumatayo kadagiti animal ta inikkannatayo ni Jehova iti nagsayaat a regalo a wayawaya nga agpili. Nakadepende ti tignay dagiti animal iti nainkasigudan nga abilidadda. Ngem datayo, mabalintayo a pilien no pangusarantayo iti biagtayo ken agdesision no kayattayo a paragsaken ni Jehova. (Proverbio 30:24) Maysa pay, saantayo a kasla makina a mangaramid laeng iti naiprograma nga aramidenna. Adda wayawayatayo nga agpili iti kayattayo a pakikaduaan, iti kayattayo a pakigayyeman, ken iti kayattayo nga aramiden iti biagtayo. Kayat ni Jehova a matagiragsaktayo ti biag.
20, 21. Ania ti kasayaatan a desision a maaramidam ita?
20 Kayat ni Jehova nga ayatentayo isuna. (Mateo 22:37, 38) Isu ket kas iti maysa nga ama a maragsakan a makangngeg iti anakna a naimpusuan a mangibaga iti “ay-ayatenka,” imbes a napilpilit. Inikkannatayo ni Jehova iti wayawaya nga agpili no agserbitayo kenkuana wenno saan. Pinili da Satanas, Adan, ken Eva a tallikudan ni Jehova. Kasanom nga usaren ti wayawayam nga agpili?
21 Usarem ti wayawayam nga agpili tapno pagserbiam ni Jehova. Minilion ti nagdesision a paragsakenda ti Dios ken tallikudanda ni Satanas. (Proverbio 27:11) Ania ti mabalinmo nga aramiden ita tapno addakanto iti baro a lubong ti Dios inton ikkatennan ti amin a panagsagaba? Masungbatan dayta iti sumaruno a kapitulo.