Kasanoka nga Agbalin a Gayyem ti Dios?

1, 2. Siasino ti dadduma a gagayyem ni Jehova?

ASINO ti kayatmo nga agbalin a gayyem? Daydiay tao a kaykayatmo ken agkatunosankayo. Daydiay nasingpet ken magusgustuam ti ugalina.

² Adda dagiti tattao a pinili ni Jehova a Dios nga agbalin a gayyemna. Kas pagarigan, maysa ni Abraham kadagiti gayyem ni Jehova. (Isaias 41:8; Santiago 2:23) Naragsakan met ni Jehova ken ni David. Imbagana a ni David ket ‘makaay-ayo iti pusona.’ (Aramid 13:22) Kasta met, ‘ipatpateg unay’ ni Jehova ni propeta Daniel.​—Daniel 9:23.

3. Apay a gayyem ni Jehova da Abraham, David, ken Daniel?

³ Apay a nagbalin a gayyem ni Jehova da Abraham, David, ken Daniel? Imbaga ni Jehova ken ni Abraham: “Tinungpalmo ti bilinko.” (Genesis 22:18) Agbalin ni Jehova a gayyem dagidiay sipapakumbaba nga agtultulnog kenkuana. Posible met nga agbalin a gayyemna ti intero a nasion. Inlawlawag ni Jehova iti nasion ti Israel: “Agtulnogkayo kaniak, ket agbalinakto a Diosyo, ken agbalinkayto a tattaok.” (Jeremias 7:23) Isu a masapul met nga agtulnogka ken Jehova no kayatmo ti agbalin a gayyemna.

PROTEKTARAN NI JEHOVA DAGITI GAGAYYEMNA

4, 5. Kasano a protprotektaran ni Jehova dagiti gagayyemna?

⁴ Ibaga ti Biblia nga agbirbirok ni Jehova kadagiti pamay-an “tapno ipakitana ti pigsana kadagidiay naan-anay ti pusoda kenkuana.” (2 Cronicas 16:9) Iti Salmo 32:8, ikarkari ni Jehova kadagiti gagayyemna: “Ikkankanto iti pannakaawat ket isuroka iti dalan a rebbeng a papanam. Balakadankanto bayat a kitkitaenka.”

⁵ Adda nabileg a kabusor a saan a mangayat nga agbalintayo a gayyem ti Dios. Ngem kayatnatayo a protektaran ni Jehova. (Basaen ti Salmo 55:22.) Kas gagayyem ni Jehova, naimpusuan nga agserserbitayo kenkuana. Napudnotayo kenkuana uray iti narigat a kasasaad. Ken agtalektayo ken Jehova a kas iti salmista, a nangisurat maipapan kenkuana: “Gapu ta adda iti kannawan nga imak, saanakto a pulos maan-ano.” (Salmo 16:8; 63:8) Ania ti ar-aramiden ni Satanas tapno saantayo nga agbalin a gayyem ti Dios?

TI AKUSASION NI SATANAS

6. Ania ti imbaga ni Satanas maipapan kadagiti tattao?

⁶ Iti Kapitulo 11, naadaltayo a kinuestion ni Satanas ni Jehova ken inakusaranna nga isu ket ulbod ken saan a nainkalintegan ta saanna a pinalubosan da Adan ken Eva nga agdesision para iti bagida no ania ti umiso ken di umiso. Isursuro ti libro ti Biblia a Job nga ak-akusaran met ni Satanas dagiti mayat nga agbalin a gayyem ti Dios. Ibagbaga ni Satanas nga agserserbida iti Dios gapu kadagiti maaw-awatda Kenkuana, saan a gapu ta ay-ayatenda. Ibagbaga pay ni Satanas a mapagtallikudna ti asinoman iti Dios. Kitaentayo no ania ti maadaltayo ken Job ken no kasano a prinotektaran ni Jehova.

7, 8. (a) Ania ti nangibilangan ni Jehova ken Job? (b) Ania ti imbaga ni Satanas maipapan ken Job?

⁷ Asino ni Job? Isu ket maysa a naimbag a lalaki a nagbiag agarup 3,600 a tawenen ti napalabas. Imbaga ni Jehova nga awan ti sabali a tao a kas kenkuana iti daga iti daydi a tiempo. Resrespetuen unay ni Job ti Dios, ken kagurana ti dakes. (Job 1:8) Wen, ni Job ket pudpudno a gayyem ni Jehova.

⁸ Imbaga ni Satanas nga agserserbi laeng ni Job iti Dios gapu kadagiti managimbubukodan a rason. Kinunana ken Jehova: “Saan aya a protprotektaram ken ti pamiliana ken ti amin nga adda kenkuana? Binendisionam dagiti aramid ti imana, ket immadu unay dagiti tarakenna iti daga. Ngem tapno agbaliw ti kasasaad, unnatem ta imam ken pukawem ti amin nga adda kenkuana ket siguradonto nga iparupana kenka ti panangilunodna kenka.”​—Job 1:10, 11.

9. Ania ti impalubos ni Jehova nga aramiden ni Satanas?

⁹ Inakusaran ni Satanas ni Job nga agserserbi laeng ken Jehova gapu kadagiti maaw-awatna a bendision. Imbaga pay ni Satanas a mapasardengna ni Job nga agserbi ken Jehova. Saan nga immanamong ni Jehova, ngem impalubosna a suboken ni Satanas ni Job tapno makita no talaga a gayyemna ni Jehova gapu ta ay-ayatenna.

PINARIGAT NI SATANAS NI JOB

10. Kasano a pinarigat ni Satanas ni Job, ken ania ti reaksion ni Job?

¹⁰ Umuna, tinakaw wenno pinatay ni Satanas ti amin nga animal ni Job. Kalpasanna, pinatay ni Satanas ti kaaduan nga adipen ni Job. Napukaw ni Job ti amin. Kamaudiananna, pinatay ni Satanas ti sangapulo nga annak ni Job babaen ti maysa a bagyo. Ngem nagtalinaed ni Job a matalek ken Jehova. “Iti laksid amin dagitoy, saan a nagbasol ni Job wenno dina pinabasol ti Dios iti napasamak nga aniaman a di umiso.”​—Job 1:12-19, 22.

11. (a) Ania pay ti inaramid ni Satanas ken ni Job? (b) Ania ti reaksion ni Job?

¹¹ Saan a nagsardeng ni Satanas. Kinaritna ti Dios ket imbagana: “Sagidem ti tulang ken lasagna, ket siguradonto nga iparupana kenka ti panangilunodna kenka.” Isu nga inikkan ni Satanas ni Job iti naut-ot a sakit. (Job 2:5, 7) Ngem nagmatalek latta ni Job ken Jehova. Kinunana: “Agingga a matayak, agtalinaedak nga awan pagkuranganna!”​—Job 27:5.

12. Kasano a pinaneknekan ni Job nga ulbod ni Satanas?

¹² Saan nga ammo ni Job ti akusasion ni Satanas wenno no apay nga agpaspasar iti nakaro a rigat. Impagarupna a ni Jehova ti mangparparigat kenkuana. (Job 6:4; 16:11-14) Uray no kasta, nagtalinaed latta a matalek ni Job ken Jehova. Napaneknekanen a saan laeng a ti bagi ni Job ti pampanunotenna. Isu ket gayyem ti Dios gapu ta ay-ayatenna ni Jehova. Saan nga agpayso amin nga akusasion ni Satanas!

13. Ania ti resulta ti kinamatalek ni Job?

¹³ Uray no saan nga ammo ni Job ti mapaspasamak idiay langit, nagmatalek latta iti Dios ken pinaneknekanna a dakes ni Satanas. Binendisionan ni Jehova ni Job ta isu ket napudno a gayyem.​—Job 42:12-17.

NO KASANONAKA NGA AK-AKUSARAN NI SATANAS

14, 15. Ania ti akusasion ni Satanas iti amin a tattao?

¹⁴ Adda nagpateg a masursurom iti napasamak ken Job. Ak-akusarannatayo ita ni Satanas nga agserserbitayo laeng ken Jehova gapu kadagiti bendision a maaw-awattayo. Iti Job 2:4, imbaga ni Satanas: “Ited ti tao ti amin nga adda kenkuana para iti biagna.” Isu a saan laeng a ni Job ti ak-akusaran ni Satanas no di ket amin a tattao. Ibagbagana a ti bagida laeng ti pampanunotenda. Ginasut a tawen kalpasan a natay ni Job, in-insultuen latta ni Satanas ni Jehova ken ak-akusaranna dagiti adipenna. Kas pagarigan, mabasatayo iti Proverbio 27:11: “Agmasiribka, anakko, ket paragsakem ti pusok, tapno masungbatak daydiay mangin-insulto kaniak.”

¹⁵ Mabalinmo a pilien ti agtulnog ken Jehova ken agbalin a napudno a gayyemna tapno mapaneknekam nga ulbod ni Satanas. Uray no adda dagiti dadakkel a panagbalbaliw a masapul nga aramidem tapno agbalinka a gayyem ti Dios, dayta ti kasayaatan a desision a mabalinmo nga aramiden! Serioso a banag dayta. Ibagbaga ni Satanas a saanka nga agmatalek iti Dios no adda problemam. Padpadasennatayo nga allilawen tapno saantayo nga agmatalek iti Dios. Kasano?

16. (a) Ania dagiti pamay-an ni Satanas a mangpasardeng kadagiti tattao nga agserbi ken Jehova? (b) Ania ti mabalin nga aramiden ti Diablo tapno mapasardengnaka nga agserbi ken Jehova?

¹⁶ Agduduma ti pamay-an ni Satanas a mangpasardeng kadatayo a makigayyem iti Dios. Umatake a “kasla leon a ngumerngernger, nga agsapsapul iti alun-onenna.” (1 Pedro 5:8) Saankan a masdaaw no pasardengendaka dagiti gagayyem, kapamiliam, wenno ti dadduma nga agadal iti Biblia ken mangaramid iti umiso. Mabalin a mariknam a kasla maat-atakarka.a (Juan 15:19, 20) Pagbalbalinen met ni Satanas ti bagina a “kas anghel ti lawag.” Isu a mabalin nga allilawennatayo nga agsukir ken Jehova. (2 Corinto 11:14) Ti maysa pay nga us-usaren ni Satanas tapno agsardengtayo nga agserbi ken Jehova ket ti panangpanunottayo a saantayo a maikari nga agserbi iti Dios.​—Proverbio 24:10.

AGTULNOGKA KADAGITI BILIN NI JEHOVA

17. Apay nga agtultulnogtayo ken Jehova?

¹⁷ No agtulnogtayo ken Jehova, mapaneknekantayo nga ulbod ni Satanas. Ania ti makatulong kadatayo nga agbalin a natulnog? Ibaga ti Biblia: “Masapul nga ayatenyo ni Jehova a Diosyo iti amin a pusoyo ken iti amin a kararuayo ken iti amin a pigsayo.” (Deuteronomio 6:5) Agtultulnogtayo ken Jehova gapu ta ay-ayatentayo. Bayat nga umun-uneg ti ayattayo ken Jehova, ad-adda met a kayattayo nga aramiden ti amin a bilinna. Insurat ni apostol Juan: “Daytoy ti kaipapanan ti panagayat iti Dios, a tungpalentayo dagiti bilinna; ket kaskasdi a saan a makapadagsen dagiti bilinna.”​—1 Juan 5:3.

18, 19. (a) Ania dagiti banag nga ibagbaga ni Jehova a dakes? (b) Kasanotayo nga ammo a saan nga ipaaramid ni Jehova kadatayo ti ditay kabaelan nga aramiden?

¹⁸ Ngem ania dagiti bambanag nga ibagbaga ni Jehova a dakes? Makitatayo ti dadduma kadagita iti kahon a “Guraem Dagiti Kagura ni Jehova.” Mabalin a panunotem iti damo a saan met unay a dakes ti dadduma kadagita. Ngem no basaem ken utobem dagiti teksto ti Biblia, maawatam no apay a pagimbagantayo ti panagtulnog kadagiti bilin ni Jehova. Mabalin met a mariknam nga adda dagiti masapul a balbaliwam. Uray no narigat nga aramiden dagita no dadduma, maaddaanka iti talna ken kinaragsak gapu ta maysaka a matalek a gayyem ti Dios. (Isaias 48:17, 18) Kasanotayo nga ammo a kabaelantayo nga aramiden dagita a panagbalbaliw?

¹⁹ Saan a pulos ipaaramid ni Jehova kadatayo ti ditay kabaelan nga aramiden. (Deuteronomio 30:11-14) Kas pudno a Gayyem, mas am-ammonatayo ngem iti pannakaam-ammotayo iti bagitayo. Ammona dagiti paglaingan ken pagkapuyantayo. (Salmo 103:14) Impasigurado ni apostol Pablo: “Matalek ti Dios, ket dina ipalubos a masulisogkayo iti diyo kabaelan, no di ket mangisagana iti dalan a pagruaran tapno maibturanyo dayta a sulisog.” (1 Corinto 10:13) Makapagtalektayo a kanayon a pabilgennatayo ni Jehova a mangaramid iti umiso. Ikkannaka iti “bileg a nalablabes ngem iti gagangay” tapno maibturam dagiti narigat a situasion. (2 Corinto 4:7) Kalpasan a narikna ni Pablo ti tulong ni Jehova iti narigat a situasionna, naibagana: “Adda pigsak a mangsango iti amin a banag gapu iti daydiay mangpabpabileg kaniak.”​—Filipos 4:13.

SURSURUEM NGA AYATEN DAGITI AY-AYATEN TI DIOS

20. Ania dagiti kualidad a masapul a tuladem, ken apay?

²⁰ No kayattayo ti agbalin a gayyem ni Jehova, masapul nga isardengtayo nga aramiden dagiti ibilangna a dakes. Ngem adda pay masapul nga aramidentayo. (Roma 12:9) Dagiti gagayyem ti Dios ay-ayatenda dagiti ay-ayatenna. Nailadawanda iti Salmo 15:1-5. (Basaen.) Tultuladen dagiti gagayyem ni Jehova dagiti kualidadna ken ipakpakitada ti “ayat, rag-o, talna, kinaanus, kinaimbag, kinasayaat, pammati, kinaalumamay, panagteppel.”​—Galacia 5:22, 23.

21. Kasanom a masursuro nga ipakita dagiti kualidad a kayat ti Dios?

²¹ Kasanom a masursuro nga ipakita dagiti kualidad a kayat ti Dios? Masapul a sursuruem nga ayaten dagiti ay-ayaten ni Jehova babaen ti regular a panagbasa ken panagadal iti Biblia. (Isaias 30:20, 21) Bayat nga ar-aramidem dayta, umuneg ti panagayatmo ken Jehova ket dayta ti mangtignay kenka nga agtulnog kenkuana.

22. Ania ti resultana no agtulnogka ken Jehova?

²² Dagiti panagbalbaliw a masapul nga aramidem ket kas iti pananguksob iti daan a bado ken panangisuot iti baro. Ibaga ti Biblia a masapul nga ‘uksobem ti daan a personalidad’ ket isuotmo “ti baro a personalidad.” (Colosas 3:9, 10) Saan a nalaka dayta ngem no aramidentayo dagitoy a panagbalbaliw ken agtulnogtayo ken Jehova, ikarkarina nga ikkannatayo iti “dakkel a gunggona.” (Salmo 19:11) Wen, piliem ti agtulnog ken Jehova ket paneknekam nga ulbod ni Satanas. Agserbika ken Jehova saan a gapu iti maawatmo a gunggona iti masanguanan no di ket gapu ta talaga nga ay-ayatem. Iti kasta, agbalinka a pudno a gayyem ti Dios!