Insagana ni Juan ti Dalan

Idi dakkelen ni Juan, nga anak da Zacarias ken Elisabet, nagbalin a propeta. Imbaon ni Jehova ni Juan a mangipakaammo nga um-umayen ti Mesias. Ngem saan a nangisuro kadagiti sinagoga wenno ili, no di ket nangasaba iti let-ang, wenno awan matataona a lugar. Napan ken Juan dagiti taga-Jerusalem ken taga-Judea tapno makasursuroda. Imbagana a masapul nga isardengda dagiti madi nga aramidda tapno maparagsakda ti Dios. Adu ti nagbabawi ket binautisaran ida ni Juan iti Karayan Jordan.

Simple ti biag ni Juan. Naaramid iti dutdot ti kamelio ti badona, ken dudon ken diro ti kankanenna. Kayat dagiti tattao a maammuan no asino ni Juan. Napan kenkuana uray dagiti napangato a Fariseo ken Saduceo. Imbaga ni Juan kadakuada: ‘Masapul nga agbalbaliw ken agbabawikayo. Diyo panunoten nga espesialkayo gapu laeng ta ibagbagayo nga annaknakayo ni Abraham. Saan a kayat a sawen dayta nga annaknakayo ti Dios.’

Adu ti nangisaludsod ken Juan: ‘Ania ti aramidenmi tapno maparagsakmi ti Dios?’ Insungbat ni Juan kadagiti Judio: ‘No adda dua a badoyo, itedyo ti maysa iti agkasapulan.’ Ammom no apay nga imbagana dayta? Kayatna a maammuan dagiti adalanna a masapul nga ayatenda dagiti tattao tapno maparagsakda ti Dios.

Imbaga ni Juan kadagiti agsingsingir iti buis: ‘Agbalinkayo a napudno ken dikay agkusit.’ Imbagana kadagiti soldado: ‘Dikay agulbod wenno umawat iti pasuksok.’

Napan met ken Juan dagiti papadi ken Levita ket insaludsodda: ‘Asinoka? Kayat a maammuan dagiti tattao.’ Insungbat ni Juan: ‘Siak daydiay agpukpukkaw idiay let-ang a mangiturong kadagiti tattao ken Jehova, kas iti impadto ni Isaias.’

Maay-ayatan dagiti tattao kadagiti insuro ni Juan. Pinanunot ti adu nga isu ti Mesias. Ngem imbagana: ‘Adda umay a nabilbileg ngem siak. Saanak a maikari uray mangwarwar laeng iti galut dagiti sandaliasna. Mangbabautisarak iti danum, ngem isu ket mangbautisarto iti nasantuan nga espiritu.’