Nangpaimbag ni Jesus iti Sabbath

Kagurgura dagiti Fariseo ni Jesus ket agbirbirokda iti rason tapno arestuenda. Imbagada a saan a mabalin a mangpaimbag ni Jesus iti aldaw ti Sabbath. Iti maysa a Sabbath, adda nakita ni Jesus a bulsek a lalaki nga agpalpalimos iti kalsada. Imbagana kadagiti adalanna: ‘Kitaenyo no kasano a paimbagen ti pannakabalin ti Dios daytoy a tao.’ Pinaglaok ni Jesus ti katayna ken ti daga ket nagbalin a pitak sa inkabilna iti mata ti lalaki. Imbaga ni Jesus kenkuana: ‘Mapanka agdiram-os iti pagdigusan ti Siloam.’ Inaramid dayta ti lalaki, ket idi kuan, makakitan.

Nasdaaw dagiti tattao ket imbagada: ‘Daytoy kadi ti lalaki a nakatugaw laeng idi nga agpalpalimos wenno karuprupana laeng?’ Kinuna ti lalaki: ‘Siak daydiay nayanak a bulsek!’ Insaludsod dagiti tattao: ‘Apay a makakitakan?’ Idi imbagana ti napasamak, impanda isuna kadagiti Fariseo.

Imbaga ti lalaki kadagiti Fariseo: ‘Nangikabil ni Jesus iti pitak iti matak sa imbagana nga agdiram-osak. Inaramidko dayta, ket ita, makakitaakon.’ Kinuna dagiti Fariseo: ‘No mangpapaimbag ni Jesus iti Sabbath, saan a naggapu iti Dios ti pannakabalinna.’ Ngem kinuna ti dadduma: ‘No saan a naggapu iti Dios ti pannakabalinna, dina koma kabaelan ti mangpaimbag.’

Inayaban dagiti Fariseo dagiti nagannak ti lalaki ket insaludsodda: ‘Apay a makakitan ti anakyo?’ Mabuteng dagiti nagannakna ta imbaga dagiti Fariseo a maikkat iti sinagoga ti mamati ken Jesus. Isu a kinunada: ‘Saanmi nga ammo. Isu ti pagdamaganyo.’ Nagsalsaludsod pay dagiti Fariseo iti lalaki agingga nga insungbat ti lalaki: ‘Imbagak la ngaruden. Apay a damagenyo manen?’ Nakaunget dagiti Fariseo, ket pinapanawda.

Binirok ni Jesus ti lalaki ket insaludsodna: ‘Mamatika kadi iti Mesias?’ Imbaga ti lalaki: ‘Mamatiak no am-ammok isuna.’ Imbaga ni Jesus: ‘Siak ti Mesias.’ Saan kadi a nakaim-imbag ni Jesus? Saanna laeng nga inagasan ti lalaki, tinulonganna pay a maaddaan iti pammati.