Napagungar ni Jesus

Kalpasan a natay ni Jesus, maysa a nabaknang a lalaki nga agnagan Jose ti nangkiddaw iti bagi ni Jesus ken Pilato. Imbabana ti bagi ni Jesus iti kayo, binungonna iti dekalidad a puraw a lupot, sinapsapuanna iti bangbanglo, sa inkabilna iti baro a tanem. Pinaserraanna ti tanem iti dakkel a bato. Imbaga dagiti panguluen a padi ken Pilato: ‘Baka takawen ti dadduma nga adalan ni Jesus ti bagina ket ibagada a nagbiag manen.’ Isu nga imbilin ni Pilato: ‘Iserrayo a naimbag ti tanem ket pabantayanyo.’

Kalpasan ti tallo nga aldaw, adda dagiti babbai a nasapa a napan iti tanem ket nakitada a naikkat ti bato a nakaserra. Idi simrekda, imbaga kadakuada ti maysa nga anghel: ‘Dikay agbuteng. Napagungaren ni Jesus. Inkay ibaga kadagiti adalanna nga agkikitada idiay Galilea.’

Nagdardaras ni Maria Magdalena a nangbirok kada Pedro ken Juan. Imbagana: ‘Adda nangala iti bagi ni Jesus!’ Nagtartaray da Pedro ken Juan a napan iti tanem. Idi nakitada nga awan nagyan ti tanem, nagawidda.

Idi nagsubli ni Maria iti tanem, nakakita iti dua nga anghel iti uneg ket imbagana: ‘Diak ammo no nangipananda iti Apok.’ Idi kuan, adda nakitana a lalaki. Gapu ta impagarupna nga isu ti hardinero, imbagana: ‘Apo, pangngaasim, ibagam no sadino ti nangipanam kenkuana.’ Ngem idi imbaga ti lalaki, “Maria!” nabigbigna nga isu ni Jesus. Impukkaw ni Maria: “Mannursuro!” sana inarakup. Imbaga ni Jesus: ‘Inka ibaga kadagiti kakabsatko a nakitanak.’ Dagus a nagtaray ni Maria a napan kadagiti adalan ket imbagana a nakitana ni Jesus.

Iti dayta met la nga aldaw, adda dua nga adalan a magmagna nga agpa-Emmaus a naggapu idiay Jerusalem. Idi kuan, adda lalaki a nakikuyog kadakuada a nagna ket dinamagna no ania ti pagsarsaritaanda. Insungbatda: ‘Saanmo aya a nangngeg? Tallo nga aldawen ti napalabas, impapatay dagiti panguluen a padi ni Jesus. Ket ita, adda dagiti babbai a mangibagbaga a sibibiag isuna!’ Insaludsod ti lalaki: ‘Dikay kadi mamati kadagiti propeta? Imbagada a matay ti Kristo sa agbiag manen.’ Intultuloyna nga inlawlawag ti Kasuratan kadakuada. Idi nakadanondan idiay Emmaus, inawis dagiti adalan ti lalaki a makidagus kadakuada. Kalpasan nga inkararagan ti lalaki ti tinapay a pangrabiida, nabigbigda nga isu ni Jesus. Idi kuan, nagpukaw.

Nagdardaras ti dua nga adalan a napan iti balay a naguummongan dagiti apostol idiay Jerusalem ket imbagada ti napasamak. Idi addada iti uneg ti balay, nagparang ni Jesus. Idi damo, saan a mamati dagiti apostol ngem kinuna ni Jesus: ‘Kitaenyo dagiti imak. Iggamandak. Datin a naisurat a mapagungar ti Kristo.’