LEKSION 04
Asino ti Dios?
Nabayagen nga agdaydayaw dagiti tattao iti nagduduma a dios. Ngem ibaga ti Biblia nga adda Dios a ‘nadaydayag ngem iti amin a dadduma pay a dios.’ (2 Cronicas 2:5) Asino dayta? Ken apay a nadaydayag wenno nangatngato ngem iti amin a dadduma pay a dios a daydayawen dagiti tattao? Iti daytoy a leksion, kitaem no kasano nga iyam-ammo daytoy a Dios ti bagina kenka.
1. Ania ti nagan ti Dios, ken kasanotayo a masigurado a kayatna a maammuantayo ti naganna?
Iti Biblia, iyam-ammo ti Dios ti bagina kadatayo. Kunana: “Siak ni Jehova. Dayta ti naganko.” (Basaen ti Isaias 42:5, 8.) “Jehova” ti patarus ti maysa a Hebreo a nagan a ti kaipapananna ket “Pagbalinenna.” Kayat ni Jehova a maammuantayo ti naganna. (Exodo 3:15) Kasanotayo a masigurado dayta? Impaisuratna ti naganna iti Biblia iti nasurok a 7,000 a daras!a Ti nagan a Jehova ket para laeng iti “pudno a Dios iti langit ken iti daga.”—Deuteronomio 4:39.
2. Ania ti ibaga ti Biblia maipapan ken Jehova?
Ibaga ti Biblia nga iti amin a dios a daydayawen dagiti tattao, ni Jehova laeng ti pudno a Dios. Apay? Adda dagiti rason. Ni Jehova ti addaan iti kadakkelan nga autoridad ken isuna laeng ti “Kangatuan iti intero a daga.” (Basaen ti Salmo 83:18.) Isu ti “Mannakabalin-amin,” ta adda pannakabalinna a mangaramid iti aniaman a kayatna nga aramiden. ‘Pinarsuana ti amin a banag’—ti uniberso ken ti amin a biag ditoy daga. (Apocalipsis 4:8, 11) Ni laeng Jehova ti datin nga adda sipud pay idi, ken addanto iti agnanayon.—Salmo 90:2.
AMMUEM TI AD-ADU PAY
Ammuem ti nagdumaan dagiti titulo ti Dios ken ti naidumduma a naganna. Kitaem met no kasano ken apay nga inyam-ammona ti naganna kenka.
3. Adu ti titulo ti Dios, ngem maymaysa ti naganna
Tapno makitam ti nagdumaan ti titulo ti maysa a tao ken ti naganna, i-play ti VIDEO, sa pagsaritaan ti sumaruno a saludsod.
Ania ti nagdumaan ti titulo a kas iti “Apo,” ken ti maysa a nagan?
Ibaga ti Biblia nga adu a dios ken apo ti daydayawen dagiti tattao. Basaen ti Salmo 136:1-3, sa pagsaritaan daytoy a saludsod:
Asino ti “Dios dagiti dios” ken “Apo dagiti apo”?
4. Kayat ni Jehova a maammuam ken usarem ti naganna
Kasanom nga ammo a kayat ni Jehova a maammuam ti naganna? I-play ti VIDEO, sa pagsaritaan dagiti sumaruno a saludsod.
Panagkunam, kayat ngata ni Jehova a maammuan dagiti tattao ti naganna? Apay?
Kayat ni Jehova nga usaren dagiti tattao ti naganna. Basaen ti Roma 10:13, sa pagsaritaan dagitoy a saludsod:
Apay a nakaim-importante nga usaren ti nagan ti Dios a Jehova?
Ania ti mariknam no malagip ti maysa ti naganmo ken awagannaka iti naganmo?
Ania ngata met ti marikna ni Jehova no usarem ti naganna?
5. Kayat ni Jehova nga agbalinka a gayyemna
Imbaga ti maysa a babai a taga-Cambodia nga agnagan Soten nga idi naammuanna ti nagan ti Dios, nariknana ti “kasayaatan a rikna ditoy daga.” I-play ti VIDEO, sa pagsaritaan ti sumaruno a saludsod.
Iti video, ania ti epektona ken Soten idi naammuanna ti nagan ti Dios?
Tapno magayyemmo ti maysa, masapul nga ammuem nga umuna ti naganna. Basaen ti Santiago 4:8a, sa pagsaritaan dagitoy a saludsod:
Ania ti iyaw-awis ni Jehova nga aramidem?
Kasano nga agbalinka a nadekdekket iti Dios no maammuam ken usarem ti naganna?
KUNA TI DADDUMA: “Maymaysa laeng ti Dios, isu nga okey lang uray ania ti iyawagmo kenkuana.”
Patiem kadi a Jehova ti nagan ti Dios?
Kasanom nga ilawlawag a kayat ti Dios nga usarentayo ti naganna?
SUMARIO
Jehova ti nagan ti maymaysa a pudno a Dios. Kayatna a maammuantayo ken usarentayo ti naganna tapno agbalintayo a gayyemna.
Rebiu
Apay a naiduma ni Jehova iti amin a sabali a dios a daydayawen dagiti tattao?
Apay a masapul nga usarentayo ti nagan ti Dios?
Kasanom nga ammo a kayat ni Jehova ti makigayyem kenka?
AGDISKOBREKA PAY
Ammuem ti lima a makakombinsir nga ebidensia nga adda Dios.
Kitaem no apay a rasonable a patien a datin nga adda Dios.
“Asino ti Nangaramid iti Dios?” (Ti Pagwanawanan, Agosto 1, 2014)
Ammuem no apay a masapul nga usarentayo ti nagan ti Dios uray no saantayo nga ammo ti eksakto a pannakaibalikasna idi un-unana.
Napateg kadi no ania ti iyawagtayo iti Dios? Kitaem no apay a maibagatayo a maymaysa ti personal a nagan ti Dios.
a Para iti ad-adu pay nga impormasion maipapan iti kaipapanan ti nagan ti Dios ken no apay a naikkat dayta iti dadduma a patarus ti Biblia, kitaem ti Apendise A4 iti Baro a Lubong a Patarus ti Nasantuan a Kasuratan.