ABARIM
[Dagiti Pagballasiwan; Pagbeddengan (Dagiti Rehion iti Ballasiw)].
Awan duadua a daytoy a nagan agaplikar iti maysa a rehion iti daya ti Karayan Jordan ken, nangnangruna pay, iti daya ti Natay a Baybay. Iti Jeremias 22:20 nadakamat dayta agraman dagiti rehion ti Libano ken Basan.
Iti dadduma pay a panagparangna iti rekord ti Biblia, nainaig dayta iti maysa a kabambantayan wenno intar ti bambantay. Ti termino nga “Abarim,” kas tumukoy kadagiti “rehion iti ballasiw,” mabalin nga ipasimudaagna a dagidiay nagtaudan ti termino ket adda iti makinlaud a deppaar ti Jordan; ket posible a daytoy a termino damo nga inusar ni Abraham ken inusar met dagiti Israelita idi pimmanawda iti Egipto.
Asidegen nga agngudo ti 40-tawen a panagdaliasatda iti let-ang idi nakagteng dagiti Israelita iti daytoy a teritoria ken nagpakarsoda “iti bambantay ti Abarim.” (Nu 33:47, 48) Kalpasan dayta, simmalogda iti Tantanap ti Moab, nga adda iti daya ti Jordan iti makin-amianan nga ungto ti Natay a Baybay. Ditoy ti naudi a nagpakarsuanda sakbay a bimmallasiwda iti Karayan Jordan. Ditoy met a kinuna ni Jehova ken Moises: “Sumang-atka itoy a bantay ti Abarim, Bantay Nebo, nga adda iti daga ti Moab, a sumango iti Jerico, ket kitaem ti daga ti Canaan, nga itedko iti annak ti Israel kas sanikua.”—De 32:49; Nu 27:12.
Gapu itoy, agparang a ti rehion ti Abarim, agraman ti kabambantayanna, ket adda iti amianan a laud a paset ti teritoria ti Moab. Nupay kasta, mabalin a sinaklawna ti intero nga intar ti rangrangkis ti bambantay nga adda iti igid ti intero a makindaya a deppaar ti Natay a Baybay manipud amianan nga agpaabagatan. Iti Numeros 21:11 ken 33:44, natukoy ti maysa a disso a pagsardengan iti ruta dagiti Israelita a naawagan “Iye-abarim,” ket sigun iti konteksto adda daytoy iti abagatan ti Moab ken iti makin-abagatan nga ungto ti Natay a Baybay. Mabalin a dayta ti nagpaay a pagilasinan ti kaabagatanan a paset ti rehion a naawagan Abarim.—Kitaenyo ti IYE-ABARIM.
Nabatad a ti Bantay Nebo ti maysa kadagiti kangangatuan a bantay ti Abarim.—Kitaenyo ti NEBO Num. 3.