ABEDNEGO

[nalabit, Adipen ni Nebo [maysa a dios ti Babilonia]].

Naipanagan ken Azarias, maysa kadagiti agtutubo a nagtaud iti Judio a pamilia ti ar-ari wenno natatan-ok. Kinautibo ni Nabucodonosor idi 617 K.K.P.​—Da 1:3, 4, 7.

Patien ti sumagmamano nga eskolar a ti “Nego” ket inggagara a pannakabalbaliw ti nagan a Nebo, maysa a dios ti Babilonia, tapno ni Azarias saan a mapagrurod. (Kitaenyo ti NEBO Num. 4.) Ti nagan nga Azarias kaipapananna ti “Timmulong ni Jehova,” ken agparang a dagitoy a Hebreo, no kadakuada a mismo, intultuloyda nga usaren dagiti orihinal a naganda. (Da 2:17) Buyogen kadagiti nangato a dayaw, nalasatanna, agraman da Daniel, Hananias, ken Misael, ti tallo-tawen a kurso ti panagsanay ken ti naarian a pannakasukimat nga inaramid a mismo ni Nabucodonosor idiay Babilonia. Naaramid daytoy kalpasan nga imparangarangna nga umuna ti narelihiosuan a kinatarnaw maipapan iti taraon ken inumen. (Da 1:4, 5, 8-20) Idi agangay, babaen iti panagkiddaw ni Daniel, ti ari pinagbalinna ni Azarias ken ti dua a kakaduana kas administrador iti masaksakupan a distrito ti Babilonia.​—Da 2:49.

Idi agangay, ni Abednego (Azarias), agraman ti dua a Hebreo a kakaduana, ket kinondenar ti sumagmamano a Caldeo iti saklang ti ari gapu iti panagkitakitna nga agruknoy iti nabalitokan a ladawan a kukua ti ari idi mapatokar ti maysa a kita ti musika. (Da 3:5, 8, 12) Idi pinagsaludsodan ida ti nakapungtot nga ari, ti natibker a panagkitakitda a mangsalungasing iti konsiensiada ken ti panangyebkasda iti pammatida ken Jehova nagbanag iti panangpaipalladaw kadakuada ti ari iti napapudot unay nga urno, a sadiay namilagruan a sinalakniban ida ti angheliko a pannakabagi ti Dios. Kalpasan ti panangluk-at kadakuada ti napagkintayeg nga ari, ken kalpasan ti pannakakita dagiti kameng ti naarian a palasio a ti tallo a lallaki nakalasatda a di naan-ano, napasublida ti anamong ti ari.​—Da 3:15-30; kitaenyo ti MESAC; SIDRAC.