ABIHAIL
[Ni Ama(k) ket Kired].
Nagan a naaramat iti Biblia agpaay iti tallo a lallaki ken dua a babbai.
1. Lalaki iti tribu ni Levi ken iti pamilia (wenno puli) ni Merari. Isu ti ama ni Zuriel, panguluen iti balay ti amma dayta a puli idi tiempo ti Ipapanaw.—Nu 3:35.
2. Ti asawa a babai ni Abisur, a kameng iti tribu ni Juda. (1Cr 2:29) Naaddaan iti dua nga annak, da Aban ken Molid.
3. Lalaki iti tribu ni Gad a nagyan idiay Basan ken Galaad. Isu ti anak ni Huri ken maysa a panguluen wenno ulo ti pamilia.—1Cr 5:14-17.
4. Ti anak a babai ni Eliab, kalakayan a kabsat ni David. (Nupay ti Hebreo a sao a bath [anak a babai] iti 2 Cronicas 11:18 mabalin met a kaipapananna ti “apoko a babai.”)
Kuna ti King James Version iti 2 Cronicas 11:18: “Ket ni Rehoboam innalana ni Mahalat nga anak a babai ni Jerimot nga anak ni David tapno asawaenna, ken ni Abihail nga anak a babai ni Eliab nga anak ni Jesse.” Pagparangen daytoy a ni Abihail ket maikadua nga asawa ni Rehoboam. Nupay kasta, mabalin nga ipatarus ti orihinal a Hebreo iti naiduma a wagas, isu a kastoy ti mabasa iti adu a moderno a patarus: “Ni Mahalat nga anak a babai ni Jerimot nga anak ni David, ken anak a babai ni Abihail nga anak a babai ni Eliab nga anak ni Jesse.” (Kitaenyo ti RS, AT, JP, NW, JB.) Maipapan iti daytoy, kuna ti Soncino Books of the Bible iti maysa a footnote iti 2 Cronicas 11:18: “Nabatad ditoyen ti maitutop a mamagsilpo a sao. Ni Mahalat ket anak a babai da Jerimot ken Abihail. Ti Abihail ket ibilang ti dadduma a komentarista kas nagan ti sabali pay nga asawa ni Rehoboam.” (Inurnos ni A. Cohen, London, 1952) Dagiti pangmaymaysa a pronombre a nausar kadagiti sumaganad a bersikulo (19, 20) patalgedanda ti panangmatmat a maysa laeng nga asawa ni Rehoboam ti tuktukoyen ti bersikulo 18. Kasla dakdakkel ngarud ti posibilidadna a ni Abihail isu ti ina ti asawa ni Rehoboam a ni Mahalat.
5. Ti ama ni Reyna Ester ken kaputotan ni Benjamin. Isu ti uliteg ti kasinsin ni Ester, ni Mardokeo. (Es 2:5, 15; 9:29) Ipasimudaag ti Ester 2:7 a nataydan nga agassawa idi ubing pay ti anakda a ni Ester, ket napasamak dayta kadagidi panawen sakbay a nakiasawa ken Ari Asuero.