ABIHU
[Isu Ama].
Maysa kadagiti uppat nga annak ni Aaron babaen iti asawana a ni Eliseba; ti kabsat da Nadab, Eleazar, ken Itamar. (Ex 6:23; 1Cr 6:3; 24:1) Yantangay nayanak ni Abihu idiay Egipto, kas maikadua nga anak ni Aaron isu ket nataenganen idi tiempo ti Ipapanaw, ta agtawen idin ni amana iti 83.—Nu 33:39.
Kas in-inauna nga annak, pinalubosan ni Jehova da Nadab ken Abihu a kumuyog iti amada ken iti 70 a lallakay iti Israel nga umuli iti paset ti Bantay Sinai ket sadiay makitada iti pangadaywen ti maysa a nadaeg a sirmata ti dayag ti Dios. (Ex 24:1, 9-11) Pinadayawan ni Jehova ti annak ni Aaron, a dinutokanna ida nga agserbi kas papadi a kadua ti amada, ti nangato a padi, ken intudingna nga isuda ti pagtaudan ti mangsunonto ken Aaron. Agkawesda kadagiti nagayad a pagan-anay ti padi ken kadagiti uklop “a maipaay a dayag ken kinapintas.” ‘Pulotan ida ni Moises ken punnuenna ti imada iti pannakabalin ken santipikarenna ida’ maipaay iti panagserbida iti Dios. (Ex 28:1, 40-43) Agbalin a kukuada ti kinapadi “kas paglintegan agingga iti tiempo a di nakedngan.”—Ex 29:8, 9.
Kalpasan dayta, kanayonda a madakdakamat no mangipaay ti Dios kadagiti pammilin maipapan iti kinapadi ken dagiti annongen dayta. (Ex 29:10-46; 30:26-38) Kasta met, ti Dios inggunamgunamna unay kadakuada ken iti intero a nasion, ti kinapateg unay ti panangraem iti kinasagrado ti bambanag a nainaig iti panagdaydayaw kenkuana, agraman ti altar ti insienso ken ti kanayonan laeng nga alikamen. Ti panagtultuloyda nga agbiag ket agpannuray iti panangraemda kadagiti alagaden ti Dios.
Ita, makatawenen ti napalabas nanipud nangrugi ti Ipapanaw, panawenen tapno ibangon ti tabernakulo ken isaad ti kinapadi (1512 K.K.P.). Nagtataripnong ti intero a nasion iti sango ti pagserkan ti tolda ti gimong tapno masaksianda dagiti seremonia ti pannakaisaad ket nakitada ti pannakapulot da Aaron ken Abihu ken ti kakabsatna, a nadalusan ken addaan iti turbante, kas papadi ti Dios a mangibagi iti nasion iti sanguananna. Kalpasan dayta, ti kaisasaad a papadi nagtalinaedda iti pagserkan ti tolda ti gimong iti pito nga aldaw tapno makompleto ti pannakaisaadda ken, kas kinuna ni Moises, maipaay iti “‘panangpunno iti imayo iti pannakabalin.’ . . . Ket ni Aaron ken ti annakna inaramidda ti amin a bambanag nga imbilin ni Jehova babaen ken Moises.”—Le 8:1-3, 13-36.
Iti maikawalo nga aldaw nangrugin ni Aaron nga agannong, a kaduana ni Abihu ken ti kakabsatna kas katulonganna. (Le 9:1-24) Nasaksianda ti nadayag a parangarang ti kaadda ti Dios. Ngem, nalawag a sakbay a nagngudo ti aldaw, kuna ti salaysay a “da Nadab ken Abihu innalada ken inyegda tunggal maysa ti pagikkanna iti apuy ket inikkanda ida iti apuy ket nangikabilda iti insienso iti dayta, ket rinugianda ti nagidaton iti sanguanan ni Jehova iti di mayalubog nga apuy, a saanna nga imbilin kadakuada. Gapu itoy rimmuar ti apuy manipud sanguanan ni Jehova ket inibusna ida, iti kasta natayda iti sanguanan ni Jehova.” (Le 10:1, 2) Imbilin ni Moises a bagkaten dagiti kasinsin ni Aaron dagiti bangkay dagitoy ket iruarda iti pakarso. Ti amada ken ti nabatbati a kakabsatda ket binilin ti Dios nga awan ti aramidenda a pakakitaan nga agladladingitda iti pannakagessat dagitoy iti kongregasion.—Le 10:4-7.
Madagdagus kalpasan dayta, ti Dios pinakdaaranna ni Aaron nga isu ken dagiti annakna ket saanda nga agusar iti makabartek nga inumen no agserbida iti tabernakulo, “tapno saankayo a matay.” Kas komento iti bersikulo 9, kuna ti The Pentateuch and Haftorahs: “Ti napasamak kada Nadab ken Abihu ket innaig dagiti Rabbi iti daytoy pammilin a saan nga iyiinum iti makabartek nga inumen sakbay nga agannong iti Santuario.” (Inurnos ni J. H. Hertz, London, 1972, p. 446) Gapuna, mabalin a nakaaramidda iti nakaro a basol gapu ta nabartekda, ngem ti pudpudno a makagapu ti pannakatayda isu ti panangsalungasingda iti kalkalikaguman ti Dios iti nasin-aw a panagdaydayaw gapu ta nagidatonda iti “di mayalubog nga apuy, a saanna nga imbilin kadakuada.”
Naaddaan ni Abihu ti dakkel a dayaw manipud iti Dios ken naisangsangayan a kinatan-ok iti sanguanan ti intero a nasion iti bassit a kanito; ngem apagbiit laeng dagiti pribilehiona ken natay nga awanan anak, mabalin a maigapu dayta iti ambision, napalalo a panangipasindayaw iti bagi, wenno maigapu iti panangtagtagilag-an kadagiti pammilin ti Dios.—Nu 3:2-4; 26:60, 61; 1Cr 24:1, 2.