NABASSAWANG A PANAGSAO

Ti orihinal a Griego a sao a bla·sphe·miʹa ken ti berbo a bla·sphe·meʹo ket kangrunaanna a tumukoy iti sasao a mamadpadakes, mamarpardaya, ken nagubsang.​—Kitaenyo ti TABBAAW.

Kas ipakita dagiti sumaganad a teksto ken ti kontekstoda, nangisawang dagiti lumablabas iti nabassawang a sasao maibusor iti nailansa a ni Kristo, a kinunada, “Bah! Sika a mangrebba kampay idi iti templo ken mangibangon iti dayta iti las-ud ti tallo nga aldaw, isalakanmo ta bagim babaen ti iyuulogmo manipud iti kayo a pagtutuokan.” Umasping kadagita a sasao ti insawang met ti maysa kadagiti managdakdakes nga adda iti sibayna. (Mr 15:29, 30; Mt 27:39, 40; Lu 23:39) Kasta a sasao ti naisawang maibusor ken Pablo ken kadagiti padana a Kristiano manipud kadagidiay di nakatarus iti panggep, mensahe, ken konsiensiada kas Kristiano (Ara 18:6; Ro 3:8; 14:16; 1Co 10:30; 1Pe 4:4), nupay kasta ‘saanda a nagsao iti makadangran iti asinoman,’ ket gapu iti nasayaat a kababalinda awan ti rason tapno mapagbassawangan ti trabaho wenno mensaheda. (Efe 4:31; Col 3:8; 1Ti 6:1; Tit 2:5; 3:2; idiligyo ti 2Pe 2:2.) Uray dagiti anghel “saanda a mangyeg iti pammabasol . . . iti nabassawang a sasao, saanda nga ar-aramiden ti kasta gapu iti panagraem[da] ken Jehova.” (2Pe 2:11) Ngem kasta a sasao ti mabalin nga inanamaen kadagidiay naigamer iti nalulok a kababalin, kadagidiay napannakkel ken addaan sakit iti isip gapu kadagiti panagus-usisa ken panagdedebate, ken kadagidiay di mangikabilangan wenno di mangraem kadagiti dinutokan ti Dios.​—1Ti 6:4; 2Pe 2:10-12; Jud 8-10.

Iti Hebreo a Kasuratan, umas-asping ti pannakaaramat ti sao a ga·dhaphʹ. Nupay nabatad a ti orihinal a kaipapananna ket pisikal a panangdangran, naaramat dayta iti piguratibo a pamay-an a kaipapananna ti ‘agsao a sibabassawang,’ kayatna a sawen, panangdangran babaen iti mangumsi a sasao. (Nu 15:30; 2Ar 19:6; Eze 20:27) Ti Hebreo a sao a na·qavʹ, a kangrunaan a kaipapananna ti “butbotan; salputen” (2Ar 12:9; 18:21), ket addaan iti anag a panangtabbaaw, a kasta ti pannakaaramatna iti salaysay mainaig iti maysa a babai nga Israelita a ti anakna ‘nagbassawang’ maibusor iti nagan ni Jehova. (Le 24:11, 16) Kadagitoy a kaso, ti matuktukoy ket nagubsang wenno nasabrak a panagsao a naiturong a mismo ken Jehova a Dios wenno iti ilina. No usigen ti konteksto, agbalin a nalawag no ania a kita ti “nabassawang a panagsao” ti madakdakamat.​—Kitaenyo ti LUNOD; PANANGRABNGIS.