OCOZIAS
[Tinengngel ni Jehova].
Nagan ti dua nga ar-ari, maysa iti Israel ken maysa iti Juda.
1. Anak da Acab ken Jezebel, ken ari ti Israel iti dua a tawen nanipud idi agarup 919 K.K.P. Nagdaydayaw met ken Baal a kas kadagiti idolatroso a nagannakna. (1Ar 22:51-53) Idi natayen ti ama ni Ocozias, immalsan ti Moab iti kasta saanen a nagbayad iti nadagsen nga impuesto a 100,000 a kordero ken kasta met laeng kaadu a kalakian a karnero agraman ti delana a dutdot dagita. (2Ar 1:1; 3:4, 5) Daytoy nga iyaalsa ket dineskribir ni Ari Mesa ti Moab iti kitikit ti Bato a Moabita. Nalabit gapu iti pannakaaksidente ni Ocozias kalpasan dayta ken iti nasapa nga ipapatayna, saannan a naikagumaan a parukmaen dagiti Moabita.
Nagsugpon da Ocozias ken Jehosafat ti Juda iti negosio a panagaramid iti barko idiay Ezion-geber iti Gulpo ti ʽAqaba. Saan nga inanamongan ti Dios daytoy a proyekto gapu iti kinadakes ni Ocozias, isu a narba dagiti barko. (2Cr 20:35-37) Ipakita ti salaysay iti 1 Ar-ari 22:48, 49 a kayat ni Ocozias nga autorisaran ni Jehosafat ti panagkadua dagiti marino ti Israel ken Juda a mangasikaso kadagiti barko, ngem saan nga inanamongan ni Jehosafat ti kiddawna. No daytoy a panagkiddawna ket sakbay ti pannakarba dagiti barko, kayatna laeng a sawen a ni Jehosafat ket saan nga agtalek ken Ocozias ken agan-annad tapno saan nga iturayan ti makin-amianan a pagarian. No ti panagkiddaw ket kalpasan a narban dagiti barko, mabalin nga iparparipirip ni Ocozias a nakapuy dagiti lallaki ni Jehosafat ken isuda ti makimbasol iti pannakarba dagiti barko ket ngarud isingsingasingna a matarimaan koma dagiti barko ken agbiahe manen dagita a nakalugan dagiti lumalayag nga Israelita. No kasta, nagkedked ni Jehosafat gapu ta nalabit nabigbigna ti nakabatbatad a di iyaanamong ti Dios iti dayta a proyekto.
Naidalit ni Ocozias iti pagiddaan ken nagsakit iti nakaro gapu ta naaksidente iti balayna ta natnag a limsot iti maysa a rehas iti siledna iti pangatepan (nalabit ti rehas a pangserra iti usok a sumrekan ti lawag ti aldaw). (2Ar 1:2) Kasla ket tay awanen ti pudno a Dios ta nangibaon kadagiti mensahero tapno agimtuodda iti dios dagiti Filisteo a ni Baal-zebub (kaipapananna ti “Makinkukua Kadagiti Ngilaw”) no adda pay namnamana nga umimbag. Yantangay linapdan ida ni mammadto Elias, nagsublida ket impadamagda iti ari a ti idda a nakaidalitanna agbalin nga idda a pakatayanna. Imbes nga agpakumbaba ni Ocozias, nangibaon iti puersa a buklen ti 50 a lallaki nga indauluan ti kapitanda tapno alaenda ni Elias ket iyegda kenkuana. Dayta a puersa ken ti maikadua a sabali pay ket agpadpada a dinadael ti apuy, kalpasan nga imbagada ken Elias ti bilin ti ari a ‘sumalog’ manipud iti bantay a sadiay ti pagtugtugawanna. Nadadael met koma ti maikatlo a puersa nga imbaon ti nasubeg nga ari no saan a gapu iti nabuyogan iti panagraem a pakaasi ti kapitan a ti biagna ken ti biag dagiti lallakina ‘napateg koma kadagiti mata ni Elias.’ Kalpasan dayta, simmalog ni Elias ket imbagana iti sanguanan ni Ocozias ti mensahe nga isu ket matay. Idi agangay, natay ni Ocozias ket sinunuan ti kabsatna a ni Jehoram, yantangay awan ti anakna a lalaki.—2Ar 1:2-17.
2. Anak da Jehoram ken Athalia ken nailanad kas ari ti Juda iti makatawen (a. 906 K.K.P.). Bayat ti panagturay ni amana, dagiti Filisteo ken dagiti Arabo rimmautda iti Juda ket kinautiboda ti amin nga annak ni Jehoram malaksid ken Jehoacaz (Ocozias), ti inaudian. (2Cr 21:16, 17; 22:1) Idi nagtugaw ni Ocozias iti trono, isu ket agtutubo nga agtawen iti 22, ket nagbalin a dakes gapu iti impluensia ti naturay nga inana a ni Athalia, anak da Acab ken Jezebel. (2Ar 8:25-27; 2Cr 22:2-4) Kimmuyog ken Ari Jehoram ti Israel (ulitegna iti ina) iti maysa a pannakirupak iti Siria idiay Ramot-galaad, nga isu dayta ti nakasugatan ni Jehoram. Idi agangay, sinarungkaran ni Ocozias ti agpapaungar a ni Jehoram idiay Jezrael.—2Ar 8:28, 29; 9:15; 2Cr 22:5, 6.
No pagtunosen dagiti dua a salaysay (2Ar 9:21-28; 2Cr 22:7-9), nabatad a kastoy ti napasamak: idi asidegen ni Jehu iti Jezrael, nasabetna da Jehoram ken Ocozias, ket pinatayna ni Jehoram, ngem nakatalaw ni Ocozias. Iti daytoy a gundaway, saanna a kinamat ni Ocozias no di ket nagtultuloy ni Jehu a nagpa-Jezrael tapno leppasenna sadiay ti annongenna a panangpapatay. Kabayatanna, ti agtaltalaw a ni Ocozias pinadasna ti agsubli idiay Jerusalem; ngem nakadanonan laeng idiay Samaria, a sadiay koma ti paglemmenganna. Dagiti kumamkamat a buyot ni Jehu nasarakanda ni Ocozias idiay Samaria ket kinautiboda, sada inyeg ken Jehu nga adda idi iti asideg ti ili ti Ibleam, saan nga adayo manipud Jezrael. Idi nakitana ni Ocozias, imbilin ni Jehu kadagiti soldadona a papatayenda iti karuahena. Kinabilda ken sinugatanda ni Ocozias idi sumangsang-at idiay Gur, iti asideg ti Ibleam; ngem binay-anda a makatalaw, ket nagkamang idiay Megiddo, a sadiay a natay gapu kadagiti sugatna. Kalpasanna, naipan idiay Jerusalem ket sadiay a naitabon. Saan nga agsupadi dagiti salaysay maipapan iti ipapatayna no di ket aglinnitupda.
Kunaen ti 2 Cronicas 22:7 a ti ipapatay ni Ocozias ket “manipud iti Dios,” no kasta ngarud nagtignay ni Jehu kas manangdusa ti Dios idi pinatayna daytoy a tao a kimmadua iti nakondenar a balay ni Acab. Natukoy met ni Ocozias kas “Azarias” iti 2 Cronicas 22:6 (nupay “Ocozias” ti nailanad iti 15 a Hebreo a manuskrito), ken kas “Jehoacaz” iti 2 Cronicas 21:17; 25:23 (maysa a pagarigan ti pannakaaramat ti nadibinuan a nagan kas pangrugian ti sao imbes a kas pagnguduan ti sao).