ANDRES

[nagtaud iti Griego a sao a kaipapananna ti “lalaki; lalaki a tao”; nalabit, Malalaki].

Kabsat ni Simon Pedro ken anak ni Jonas (Juan). (Mt 4:18; 16:17) Nupay Betsaida ti siudad a nakayanakan ni Andres, agnanaedda a dua ken Simon idiay Capernaum idi tiempo nga inayaban ida ni Jesus nga agbalin a “dumadaklis iti tattao.” (Mr 1:16, 17, 21, 29; Jn 1:44) Dagitoy dua a siudad ket adda iti makin-amianan nga igid ti Baybay ti Galilea, a pagkalkalapan dagitoy dua nga agkabsat a kasugpon da Santiago ken Juan.​—Mt 4:18; Mr 1:16; Lu 5:10.

Maysa idin ni Andres nga adalan ni Juan a Manangbautisar. (Jn 1:35, 40) Idi otonio ti 29 K.P., adda idiay Betania iti makindaya a deppaar ti Karayan Jordan ket nangngegna ni Juan a Manangbautisar a nangyam-ammo ken Jesus kas “ti Kordero ti Dios.” (Jn 1:29) Kaduana ti sabali pay nga adalan (nalabit ni Juan), simmurot ken Jesus iti pagtaenganna ket di nagbayag nakombinsir a nasarakanna ti Mesias. Kalpasanna, nasarakanna ti kabsatna a ni Simon ket pinakaammuanna ken inturongna ken Jesus. (Jn 1:36-41) Nagsubli ti dua nga agkabsat iti trabahoda a panagkalap, ngem iti nagbaetan ti innem a bulan ken makatawen, kalpasan ti pannakaaresto ni Juan a Manangbautisar, inawis ida ni Jesus, agraman da Santiago ken Juan, tapno agbalinda a “dumadaklis iti tattao.” Pinanawanda a dagus dagiti iketda ket kimmuyogdan ken Jesus. (Mt 4:18-20; Mr 1:14, 16-20) Idi agangay, nagbalin nga apostol dagitoy nga uppat, ket makapainteres ta ni Andres ket kanayon a karaman kadagiti umuna nga uppat kadagiti amin a listaan dagiti apostol.​—Mt 10:2; Mr 3:18; Lu 6:14.

Kalpasan dayta, manmano laengen ti pannakadakamat ni Andres. Duada ken Felipe a nakisarita ken Jesus maipapan iti parikut a panangpakan iti maysa a bunggoy ti agarup 5,000 a tattao, ket nangisingasing ni Andres iti mapagtaraon ngem isu a mismo pagarupenna a saan nga umanay dayta. (Jn 6:8, 9) Iti maudi a piesta ti Paskua a rinambakanda, napan ni Felipe ken Andres tapno ipakaammona ti kiddaw ti sumagmamano a Griego a makitada koma ni Jesus, ket kalpasanna immasidegda a dua ken Jesus maipapan iti dayta a banag. (Jn 12:20-22) Maysa kadagiti uppat nga adda idiay Bantay dagiti Olibo a nagkiddaw ken Jesus iti pagilasinan a panangrugi ti panagpatingga ti agdama a sistema ti bambanag. (Mr 13:3) Ti kaudian a pannakadakamat ti nagan ni Andres ket kalpasan unay ti iyuuli ni Jesus.​—Ara 1:13.