BERNABE
[Anak ti Liwliwa].
Daytoy nalatak a tao iti kongregasion Kristiano idi umuna a siglo ket damo a nayam-ammo kadatayo iti Kasuratan babaen ken Lucas iti Aramid 4:34-36. Maammuantayo sadiay a daytoy a napeklan a tao ket maysa a Levita ken umili iti isla ti Chipre, ngem adda idiay Jerusalem idi tiempo a madakamat iti Biblia. Nainaganan ni Bernabe kas maysa kadagiti adu a manamati a nangilako iti bukodda a taltalon ken balbalay kalpasan laeng ti Pentecostes ken nangited iti gatad kadagiti apostol agpaay iti pannakaidur-as ti Nakristianuan a trabaho. Ti naganna ket Jose, ngem pinanaganan dagiti apostol iti Bernabe, a kaipapananna ti “Anak ti Liwliwa.” Kadawyan idi daytoy a panangted kadagiti awag maitunos kadagiti kababalin ti maysa a tao.
Isu ket mannakipagrikna unay ken naparabur, situtulok ken saan a bumdeng a mangitukon agpadpada iti bagina ken iti namaterialan a sanikuana maipaay iti pannakaidur-as dagiti interes ti Pagarian. Siraragsak a ‘timmulong’ kadagiti kakabsatna (Ara 9:27), ket iti sanguanan dagiti kabbaro nga interesado a tattao “nagrag-o ket rinugianna a paregtaen ida amin nga agtalinaedda iti Apo buyogen ti naimpusuan a panggep.” Ni Bernabe ket “lalaki a naimbag ken napno iti nasantuan nga espiritu ken iti pammati” (Ara 11:23, 24), maysa a mammadto ken mannursuro idiay Antioquia. (Ara 13:1) Dagiti apostol tinukoyda ni Bernabe kas karaman ‘kadagiti ay-ayatenda’ a “nangyawat kadagiti kararuada maipaay iti nagan ni Apotayo a Jesu-Kristo.” (Ara 15:25, 26) Nupay saan a maysa kadagiti 12 nga apostol, maikanatad a naawagan iti apostol (Ara 14:14), ta iti kinapudnona, maysa nga “imbaon ti nasantuan nga espiritu.”—Ara 13:4, 43.
Ti nasinged a pannakitimpuyog ni Bernabe ken Pablo, a nagpaut iti adu a tawtawen, ket nangrugi agarup tallo a tawen kalpasan a nakomberte ni Pablo idi kayatna ti sumarungkar iti kongregasion ti Jerusalem. Saan a nadakamat no kasano a damo a nagam-ammo da Bernabe ken Pablo. Ngem ni Bernabe ti nangyam-ammo ken Pablo iti apostol a ni Pedro ken iti adalan a ni Santiago.—Ara 9:26, 27; Ga 1:18, 19.
Kabayatanna, natukay ti dakkel a panaginteres idiay Antioquia ti Siria mainaig iti Nakristianuan a pammati gapu iti sumagmamano a Judio a Griego ti pagsasaoda manipud Chipre ken Cirene. Kas nagbanaganna, ti bagi a manarawidwid idiay Jerusalem imbaonda ni Bernabe a sumalog a mapan idiay Antioquia tapno paregtaenna ken pabilgenna pay dagitoy a kabbaro a manamati. Maitutop ti pannakapili ni Bernabe maipaay itoy a trabaho, yantangay taga Chipre a Griego ti pagsasaona. Idi a “maysa a dakkel a bunggoy ti nainayon iti Apo” idiay Antioquia, nagdardaras a napan ni Bernabe idiay Tarso ket ginuyugoyna ni Pablo nga umay ken tumulong iti ministerio. Agarup nga iti dayta a tiempo, gapu iti nadibinuan a pakdaar iti dumteng a bisin nagtignay dagiti kakabsat idiay Antioquia nga agurnong iti adu nga abasto nga iti naikeddeng a tiempo naipatulod dagita iti kongregasion ti Jerusalem babaen kada Bernabe ken Pablo.—Ara 11:22-24, 27-30; 12:25.
Idi nairingpas daytoy trabaho a panangsaranay, nagsubli dagiti dua idiay Antioquia idi agarup 47 K.P. Manipud sadiay nagluasda maipaay iti annong a panagmisionero iti sidong ti panangiwanwan ti nasantuan nga espiritu. Umuna a nakagteng da Bernabe ken Pablo idiay Chipre, a sadiay inyegda ti nadiosan a kinapudno iti prokonsul a ni Sergio Paulo. Manipud sadiay nagdaliasatda a limmasat iti uneg ti Asia Menor. No dadduma nakaro ti panangidadanes kadakuada dagiti managderraaw. Iti naminsan adda inagasanda a maysa a pilay a lalaki idiay Listra, ket kalkalpas pay laeng a nagballigida a nangpawil ‘kadagiti bunggoy iti panagisakripisioda kadakuada’ (nga impagarupda a ni Bernabe isu ti dios a ni Zeus ket ni Pablo, “daydiay mangidadaulo iti panagsao,” isu ni Hermes, wenno Mercurio) idi a dagiti Judio “ginuyugoyda dagiti bunggoy, ket inuborda ni Pablo ken inulodda iti ruar ti siudad.”—Ara 13:1-12; 14:1-20.
Idi agarup 49 K.P., ti nabara nga isyu ti panangkugit kadagiti di Judio indatag da Bernabe ken Pablo iti bagi a manarawidwid idiay Jerusalem, ket kalpasan a narisut dayta, dagus a nagsublida idiay Antioquia tapno agsaganada maipaay iti sumaganad a panagdaliasatda kas misionero. (Ara 15:2-36) Nupay kasta, agsipud ta saanda a makapagtunos maipapan iti panangikuyog ken Juan Marcos, nagsinada nga agturong iti nagduma a teritoria. Inkuyog ni Bernabe idiay Chipre ti kasinsinna a ni Marcos, ket ni Pablo inkuyogna ni Silas a limmasatda kadagiti distrito ti Siria ken Cilicia. (Ara 15:37-41) Dita nga agpatingga ti rekord maipapan ken Bernabe iti Kasuratan, malaksid iti apagbiit a pannakadakamatna iti sumagmamano kadagiti surat ni Pablo.—1Co 9:6; Ga 2:1, 9, 13; Col 4:10.