BAT-SEBA

[Anak a Babai ti Kinaruay; mabalin nga, Anak a Babai a [Nayanak iti] Maikapito [nga Aldaw]].

Anak ni Eliam (Amiel, 1Cr 3:5); nalabit apoko ni Ahitofel. (2Sm 11:3; 23:34) Idi damo, asawa ni Urias a Heteo, maysa kadagiti nabileg a lallaki ni David; idi agangay, nayasawa ken David kalpasan ti pannakairamanna iti maysa kadagiti kalilideman a pakasaritaan iti biag ni David.​—2Sm 23:39.

Iti naladaw a paset ti maysa nga aldaw iti primavera, agdigdigus ni Bat-seba, idi a ti maysa a kaarruba, ni Ari David, nga adda iti pangatepan ti palasiona, naimatanganna daytoy napintas a babai, nailadawan kas “nasayaat unay ti langana.” Apaman a naammuanna a ti asawa ni Bat-seba adda iti paggugubatan, ti ari, a tinukay ti derrep, pinaiyegna ni Bat-seba iti palasio, ket nakidenna kenkuana. “Idi agangay nagsubli ti babai iti balayna,” ket kalpasan ti sumagmamano a tiempo, pinakaammuanna ni David nga isu masikog. Idin ni David inggakatna a kaiddaen ni Urias ti asawana tapno makaluban ti pannakikamalala, ngem idi saan a nagballigi daytoy a gandat, ti ari pinapapatayna ni Urias iti pagbabakalan. Apaman a nalpas ti periodo ti panagleddaangna, ni Bat-seba nagbalin nga asawa ni David ket impasngayna ti ubing.​—2Sm 11:1-27.

“Ngem ti banag . . . nagparang a dakes kadagiti mata ni Jehova.” Ni mammadtona a Natan tinubngarna ti ari babaen iti maysa a pangngarig nga iti dayta inladawanna ni Bat-seba kas ti “maymaysa a kabaian a kordero” ti napanglaw a lalaki, ni Urias, ken innala ti nabaknang a lalaki, ni David, tapno maiserbina iti maysa a sangaili. Iti napalalo a kinaliday, nagbabawi ni David (Sal 51), ngem natay ti di nainaganan nga ubing a bunga ti pannakikamalala. (Kitaenyo ti DAVID.) Tawtawen kalpasanna, ad-adu pay a riribuk ti dimteng ken David gapu iti basolna, a dagiti bukodna a kamalala ket minulitan ti anakna a ni Absalom.​—2Sm 11:27–12:23; 16:21, 22.

Ni Bat-seba naliwliwa iti nagbabawi nga asawana, a maulit-ulit nga inawaganna iti “apok,” kas iti inaramid ni Sara iti asawana (1Ar 1:15-21; 1Pe 3:6), ket idi agangay nangipasngay kenkuana iti anak a lalaki nga agnagan Solomon, nga inayat ken binendisionan ni Jehova. (2Sm 12:24, 25) Naaddaan met iti tallo a sabsabali pay nga annak, da Simea, Sobab, ken Natan, a ti naud-udi a nadakamat ket maysa nga inapo ti ina ni Jesus a ni Maria. Yantangay ni Jose ket nagtaud ken Solomon, agpadpada dagiti naindagaan a nagannak ni Jesus a matunton ti kapuonanda ken Bat-seba kasta met ken David.​—1Cr 3:5; Mt 1:6, 16; Lu 3:23, 31.

Agparang manen ni Bat-seba iti salaysay idi arinunos ti 40-tawen a panagturay ni David. Insapata kenkuana ni David: “Ni Solomon nga anakmo isu ti agbalinto nga ari a sumaruno kaniak.” Isu nga idi a ni Adonias, ti laklakay a kabsat ni Solomon iti ama, ginandatna nga agawen ti trono sakbay unay ti ipapatay ni David, ni Bat-seba, iti singasing ni mammadto Natan, impalagipna ken David ti sapatana. Dagus a ni David insaadna ni Solomon iti trono, ket ngarud ni Bat-seba nagbalin nga ina a reyna.​—1Ar 1:5-37.

Kalpasan ti sititibker a pannakaipasdek ti trono ni Solomon, dimmatag ni Bat-seba iti sanguananna kas maysa a naimpluensia a manangibabaet nga addaan iti kiddaw maigapu ken Adonias. Ni Solomon dagus a ‘timmakder tapno sumabet kenkuana ket nagruknoy kenkuana,’ ket imbilinna nga adda maikabil a trono a maipaay iti inana, “tapno makapagtugaw iti makannawanna.” Nupay kasta, ti kiddawna imbutaktakna laeng ti kinamanangallilaw ni Adonias, gapuna pinapapatay ni Solomon.​—1Ar 2:13-25.