BERIAS

[Buyogen ti Didigra].

1. Ti maikapat a nailista nga anak ni Aser, a nalabit agraman ti bukodna a dua nga annak a da Heber ken Malkiel, dimteng iti Egipto a kadua ti sangakabbalayan ni Jacob. (Ge 46:8, 17) Isu ken ti dua nga annakna nailistada kas ulo ti pamilia dagiti inapo, a dagiti kaputotanna isu dagiti Beriaita.​—Nu 26:44, 45; 1Cr 7:30, 31.

2. Anak ni Efraim, nayanak kalpasan a dagiti lallaki ti Gat pinapatayda ti in-inauna a kakabsatna. Ni Efraim pinanagananna daytoy nga anak iti “Berias, agsipud ta buyogen ti didigra [Heb., vera·ʽahʹ] ti kaaddana [ti ina ni Berias] idi iti balayna.”​—1Cr 7:20-23.

3. Maysa kadagiti lima nga annak ni Elpaal ken maysa kadagiti pannakaulo dagiti Benjamita a pamilia a namagtalaw kadagiti agnanaed iti Gat.​—1Cr 8:12, 13.

4. Ti kaudian a nainaganan nga anak ni Simei, Levita a kaputotan ni Gerson. Ni Berias ken ti kabsatna a ni Jeus “saanda a naaddaan iti adu nga annak; gapuna nagbalinda a balay ti amma maipaay iti maysa a bunggoy dagiti opisial.”​—1Cr 23:6-11.