BEZALEL
[Iti Sidong ti Salinong (Linong) ti Dios].
1. Panguluen a tumatrabaho ken managibangon iti tabernakulo, ti “anak ni Uri nga anak ni Hur iti tribu ti Juda.” (Ex 31:1, 2; 1Cr 2:20) Ni Jehova a mismo ti nangdutok ken Bezalel ken nangikari nga isu ‘punnuenna iti espiritu ti Dios iti kinasirib ken iti pannakaawat ken iti pannakaammo ken iti tunggal kita ti kinasigo iti panagtrabaho, maipaay iti panagdisenio kadagiti alikamen, maipaay iti panagtrabaho iti balitok ken pirak ken gambang, ken iti panagtrabaho iti batbato tapno itampok ida ken iti panagtrabaho iti kayo tapno mangaramid iti tunggal kita ti nasigo a gapuanan.’ (Ex 31:3-5; 35:30-33) Dagitoy a nangina a material a trinabaho ni Bezalel ket naipaay babaen kadagiti naparabur a kontribusion dagiti tattao a “situtulok ti pusona,” ket “aglaplapusanan” idi dagitoy.—Ex 35:4-9, 20-29; 36:3-7.
Ni Oholiab ti kangrunaan a katulongan ni Bezalel (Ex 31:6), ket adu idi dagidiay “nasirib-panagpuspusona” a nakipagtrabaho kadakuada, nupay nagtalinaed ken Bezalel ti rebbengen a panangiwanwan iti komplikado a trabaho. (Ex 35:10-19, 25, 26, 34; 36:1, 2) Nalawag daytoy iti agsinsinnublat a pannakaaramat ti pronombre a “na” ken “isu,” a tumukoy ken Bezalel, ken “da,” a tumukoy kadagiti katulonganna. (Ex 36-39) Ti kasta unay a panagduduma dagiti paglaingan ni Bezalel ken ti pannakapunnona “iti espiritu ti Dios” (Ex 35:31) ti nangted kenkuana iti pannakabael nga agakem kas manangaywan iti panagaramid kadagiti lupot ti tolda ken ti borda dagita, kawkawit a balitok ken gambang, dagiti makinruar nga abbong a lalat, kayo a baskag ti diding a nakalupkopan iti balitok, ti makin-uneg a tabing (Ex 36), ti nakalupkopan a lakasa ti tulag ken dagiti kerubinna, ti lamisaan ken dagiti aruatenna, ti nabalitokan a pagsaadan ti silaw ken altar ti insienso, ti naibilin a pangpulot a lana ken insienso (Ex 37), ti altar ti daton a mapuoran, ti gambang a palanggana ken pagsaadanna, ti paraangan (Ex 38), ti efod ken ti pektoralna a natampokan iti napapateg a batbato, ken dagiti nagayad a pagan-anay ti padi (Ex 39). Idi nagtugaw ni Solomon iti trono 475 a tawen kalpasanna, maus-usar pay laeng ti tolda ti tabernakulo, ti lakasa ti tulag, ken ti altar a gambang.—2Cr 1:1-6.
2. Maysa kadagiti annak ni Pahat-moab a nangpapanaw iti ganggannaet nga assawada a babbai ken annakda, kas indagadag ni Esdras.—Esd 10:30, 44.