BIRZAIT

Nagan iti listaan ti kaputotan ni Aser iti pamilia ni Malkiel. (1Cr 7:30, 31) Kadagiti nagan a nailanad iti 1 Cronicas 7:30, 31 ti laeng Birzait ti saan a masarakan iti pumadpada a rekord ti kapuonan iti Genesis 46:17. Gapuna, ibilang ti dadduma a ti Birzait ket tumukoy iti lugar a nagyanan dagiti kaputotan ni Malkiel, wenno pagarupenda a maysa dayta a disso a ni Malkiel ti kangrunaan nga agnanaed, no kasano a nadakamat ni Sobal kas “ama ni Kiriat-jearim” ken ni Salma kas “ama ni Betlehem.” (1Cr 2:51, 52) Yantangay ipapan ti dadduma a ti Birzait ket nagan ti maysa a lugar, kunaenda nga isu dayta ti Birzeit, agarup 21 km (13 mi) iti amianan nga amianan-a-laud ti Jerusalem; ngem, nupay agkaarngi ti naganda, ti ayan ti Birzeit nga adda iti asideg ti makin-abagatan a ketegan ti Efraim (imbes nga iti teritoria ti Aser) saanna a suportaran ti kasta nga ibagbagada.