MUHON
Idi nasakupen dagiti Israelita ti Canaan, adda sangkadisso a daga a naited iti tunggal pamilia, ket namarkaan ti kakasta a sanikua babaen kadagiti dulon, wenno muhon. Saan a nadeskribir dagitoy iti Biblia, ngem mabalin a dagitoy ket teddek, bato, wenno uray gulis iti rabaw ti daga. Ti Hebreo a sao maipaay iti “muhon” (gevulʹ) ket isu met laeng ti sao maipaay iti “beddeng” ken “teritoria.” (Ge 10:19; 47:21) Adda kitikit ti sumagmamano a muhon idiay Palestina. Adda met dagiti nagarbo a kitikit a naikur-it kadagiti dulon, wenno muhon, idiay Egipto ken Mesopotamia. Kas pagarigan, natakuatan idiay Nippur ti maysa a nakitikitan a muhon ni Nabucodonosor I.
Muhon manipud Susa nga addaan kadagiti simbolo ti didios ti Babilonia a da Ishtar (walo ti rayana a bituen), Sin (sinan-kumpay a bulan), ken Shamash (nagtimbukel nga init)
Imparit ti linteg ni Jehova a mayalis dagiti muhon. (De 19:14; kitaenyo met ti Pr 22:28.) Kinapudnona, mailunod idi daydiay mangyalis “iti muhon ti padana a tao.” (De 27:17) Yantangay dagiti addaan iti daga kadawyan a nagpannurayda iti apit a patauden ti sangkadisso a dagada, ti panangyalis iti muhon kaipapananna ti panangikkat iti sumagmamano a daga a pangalaan ti sabali a tao iti taraonna. Ti panangaramid iti daytoy katupagna ti panagtakaw, ket namatmatan a kasta idi nagkauna a tiempo. (Job 24:2) Ngem adda dagiti garamugam a tattao a nagaramid iti kasta a panangabuso, ket dagiti prinsipe ti Juda idi tiempo ni Oseas nayaspingda kadagidiay mangyal-alis iti muhon wenno beddeng.—Os 5:10.
Nakonsiderar ni Jehova kadagiti balo ken awanan ama. Gapuna naikuna a rakrakennanto ti balay ti maysa a nangitan-ok iti bagina, “ngem ipasdeknanto ti beddeng ti balo a babai.” (Pr 15:25) Kunaen met ti Proverbio 23:10, 11: “Saanmo nga iyalis ti beddeng ti nabayagen a tiempo, ket iti talon dagiti awan amana nga ubbing dika sumrek. Ta ti Mannubbotda napigsa; isu irupirnanto kenka ti kalinteganda.”