CAIFAS
Ni Jose Caifas ti nangato a padi bayat ti ministerio ni Jesus ditoy daga. (Lu 3:2) Isu ti manugang ti nangato a padi a ni Anas (Jn 18:13; kitaenyo ti ANAS) ken dinutokan ti sinukatan ni Poncio Pilato a ni Valerius Gratus, idi agarup tawen 18 K.P., nupay kunaen ti dadduma nga iti naud-udi pay a tiempo kas ti tawen 26 K.P. Nagakem agingga idi agarup tawen 36 K.P., a napapaut ngem iti asinoman kadagiti naudi a sinarunona, daytoy ket gapu ta nasigo iti diplomasia ken mannakitinnulong iti turay ti Roma. Naipadamag nga aggayyemda unay ken Pilato. Ni Caifas ket maysa a Saduceo.—Ara 5:17.
Kas dadaulo iti plano a panangpapatay ken Jesus, impadto ni Caifas, nupay saanna a kapanunotan dayta, a dandanin matay ni Jesus maipaay iti nasion, ket iti dayta a panggep intedna ti naimpusuan a suportana. (Jn 11:49-53; 18:12-14) Idi maus-usig ni Jesus iti sanguanan ti Sanhedrin, rinay-ab ni Caifas dagiti kawesna ket kinunana: “Isu nagtabbaaw!” (Mt 26:65) Idi adda ni Jesus iti saklang ni Pilato, awan duadua nga adda sadiay ni Caifas a mangyik-ikkis: “Isu ilansam! Isu ilansam!” (Jn 19:6, 11); adda sadiay tapno kiddawenna a maluk-atan ni Barabas imbes a ni Jesus (Mt 27:20, 21; Mr 15:11); adda sadiay a mangipukpukkaw: “Awan ti arimi no di ni Cesar” (Jn 19:15); adda met sadiay a mangkonkontra iti karatula iti ngatuen ti ulo ni Jesus: “Ti Ari dagiti Judio” (Jn 19:21).
Saan a nagpatingga ti akem ni Caifas kas kangrunaan a manangidadanes iti kabubuangay a kongregasion Kristiano uray pay kalpasan ti ipapatay ni Jesus. Simmaruno met a naisaklang dagiti apostol iti sanguanan daytoy a panguluen ti relihion; siiinget a nabilinda nga isardengda ti mangasaba, naipangta ti biagda, ken nasapsaplitda pay, ngem saan a nagballigi dagita a mangpasardeng kadakuada. “Iti tunggal aldaw idiay templo ken iti binalaybalay nagtultuloyda nga awan sarday,” iti laksid ti ibubusor ni Caifas. (Ara 4:5-7; 5:17, 18, 21, 27, 28, 40, 42) Di nagbayag, ti dara ti nalinteg a ni Esteban ket nainayon kadagiti mansa ti dara ni Jesus kadagiti kawes ni Caifas. Ni Caifas met ti nangted ken Saulo a taga Tarso iti sursurat tapno maidanon idiay Damasco daytoy mangpapatay a gannuat. (Ara 7:1, 54-60; 9:1, 2) Ngem di nagbayag kalpasan dayta, ni Vitellius a maysa a Romano nga opisial, inikkatna ni Caifas iti saadna.