KALSEDONIA

Ti moderno-aldaw a bato a napanaganan iti kastoy ket aganninaw wenno nasin-aw a napino a krimmistal a kita ti quartz a maar-aramat kadagiti arkos ken saniata. Saan unay a katangtangken ti bin-ig a quartz, ken narimmurimmuokda kadagiti ungib ti batbato ti bulkan. Ti kadawyan a kita ti kalsedonia ket di unay aganninaw ken natampokan kadagiti maragatas a puraw nga alipuno ken turik. Agparang dayta iti nadumaduma a maris, kas iti puraw, dapul, duyaw, asul, ken kayumanggi.

Ti kalsedonia ket maysa a bato a kadawyan a naus-usar kadagidi kadaanan a tiempo kas saniata a nakitikitan. Napanaganan dayta iti nagan ti maysa a daan a siudad dagiti Griego a naawagan Chalcedon (idiay Asia Menor), a pagtataudan idi daytoy a mineral. Ti kakaisuna a teksto ti Biblia a mangtuktukoy iti daytoy a bato kunaenna a ti maikatlo a pamuon ti pader ti Baro a Jerusalem ket kalsedonia (Gr., khal·ke·donʹ).​—Apo 21:2, 19; kitaenyo ti AL-ALAHAS KEN NAPATEG A BATBATO.