CORNELIO
Maysa nga opisial ti buyot (senturion, KJ) a mangidadaulo iti 100 a soldado iti bunggoy nga Italiano. (Kitaenyo ti OPISIAL TI BUYOT.) Adda bukodna a balay idiay Cesarea ta naidestino sadiay. Ipasimudaag ti Romano a naganna a mabalin nga isu ket kameng ti natan-ok a pamilia iti siudad ti imperio. Isu ket “napeklan a tao” a “nangipaay iti adu a sagut ti asi kadagiti umili ket nagtultuloy nga immararaw iti Dios,” “lalaki a nalinteg ken managbuteng iti Dios ken naimbag ti damagna iti intero a nasion dagiti Judio.” Idi otonio ti 36 K.P, nagparang iti daytoy a tao ti maysa nga anghel babaen ti sirmata, a kunkunana: “Dagiti kararagmo ken dagiti sagutmo ti asi nagpangatoda a kas pakalaglagipan iti sanguanan ti Dios.” Ti anghel imbagana pay ken Cornelio a paayabanna ni Pedro idiay Joppe.—Ara 10:1-22.
Idi simmangpeten ni Pedro, nagsao ni Cornelio iti apostol iti imatang “dagiti kabagianna ken nasinged a gagayyemna,” a kinunana: “Addakami amin iti sanguanan ti Dios tapno denggenmi ti amin a bambanag nga imbilin kenka ni Jehova a sawem.” (Ara 10:24, 33) “Bayat nga agsasao pay laeng ni Pedro . . . bimmaba ti nasantuan nga espiritu kadagidiay amin a dumdumngeg iti sao.” Gapuna, daytoy a grupo a ti nadakamat a kalatakan kadakuada isu ni Cornelio ti nagbalin a kaunaan a di nakugit a Gentil wenno di Judio nga immawat iti “awan bayadna a sagut ti nasantuan nga espiritu.” (Ara 10:44, 45) Kalpasanna, nabautisaranda a dagus iti danum. Awanen ti ammon maipapan iti biag ken aramid ni Cornelio kalpasan daytoy.
Apay a ti pannakakomberte ni Cornelio ket maysa a naisangsangayan a pasamak?
Nupay ni Cornelio ket saan a proselita a kameng ti Judio a komunidad kas iruprupir ti dadduma, pagaammona idi ti sursurat dagiti mammadto, nangipaay kadagiti sagut ti asi kadagiti Judio, nagbuteng iti Dios, nagtultuloy a nagkarkararag, ken inusarna ti nagan a Jehova. Sibibileg a paneknekan ti Kasuratan a daytoy nga opisial ti buyot ket di nakugit a Gentil iti amin a kaipapanan. No proselita koma idi ni Cornelio, saan koman a kinuna ni Pedro a maysa a Judio, a di nainkalintegan nga isu makitimpuyog iti daytoy “tao a sabali ti pulina,” maibatay iti naisurat iti Linteg maipapan iti maysa a ganggannaet nga agnanaed. (Le 19:33, 34; Ara 10:28) No maysa koma idi a proselita, saan koman a “nagsiddaaw” ti innem a sabsabali pay a Judio a kadua ni Pedro idi nakitada ti nasantuan nga espiritu a naiparukpok “kadagiti tattao iti nasnasion.” (Ara 10:45; 11:12) No maysa idi a proselita, apay a nakisupiat ken Pedro “dagiti manangitandudo iti pannakakugit” maipapan itoy a banag?—Ara 11:2.
Iti kinaagpaysuanna, ni Cornelio ti umuna a bungbunga kadagiti di nakugit a di Judio a nagbalin a Kristiano, a mangipakita a saan idin a nasken a agbalin a proselita a Judio dagiti Gentil a kas iti Etiope a eunuko sakbay a maawatda iti kongregasion Kristiano. “Iti kinapudnona,” inyebkas ni Pedro iti dayta napateg a pasamak, “makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Ara 10:34, 35) Yantangay ni Pedro ti kaunaan a nangilukat Ti Dalan kadagiti Judio idi Pentecostes, ngarud iti daytoy a gundaway isu ti kaunaan a mangidanon iti naimbag a damag ti pannakaisalakan kadagiti di nakugit a Gentil. Immanamong met ni Santiago a dayta ti “umuna a gundaway” nga inturong ti Dios ti asikasona “kadagiti nasion.”—Ara 15:7, 14.