CUT, CUTA
Agpada a ti “Cut” ken “Cuta” ket tumukoy iti maymaysa a lugar a sigud a nagtaengan ti maysa nga ili nga inyakar ti ari ti Asiria kadagiti siudad ti Samaria kalpasan ti pannakaidestiero ti Israel idi 740 K.K.P. (2Ar 17:23, 24, 30) Nupay kasta, dagiti destiero manipud Cuta ken dadduma pay a lugar ket nagsagaba iti panangraut dagiti pumatay a leon, ket idi nagpatulongda iti Asirio nga ari, naipaayanda iti maysa a padi a sigud nga agnanaed iti makin-amianan a pagarian ti Israel. Yantangay ti panagdaydayaw a naannurot idiay Israel nabayagen a di inanamongan ti Dios (1Ar 13:33, 34; 16:31-33), dagiti panagserbi daytoy a padi ket saan a nakapataud iti pudpudno a managdaydayaw ken Jehova, iti kasta dagiti kameng ti kolonia “nagbalinda a managdayaw iti bukodda a didios,” a dagidiay naggapu iti Cuta intultuloyda ti nagserbi iti diosda a ni Nergal. Kadawyan a naawagan “Samaritano” ti rasa a napataud babaen ti panagassawa iti nagbaetan dagiti ‘umili ti Cuta,’ agraman ti dadduma pay a nasion, ken dagiti nabatbati nga Israelita. Sigun ken Josephus, dagitoy ket “naawagan Chuthaioi (Cuthim) iti Hebreo a pagsasao, ken Samareitai (Samaritano) iti Griego.” (Jewish Antiquities, IX, 290 [xiv, 3]) Nabatad nga ad-adda a nausar ti awag a “Cuthim” gapu ta ad-adu dagiti umili manipud Cuta iti nagtetengngaan dagiti sigud nga aggigian.—2Ar 17:24-41.
Idiay Tell Ibrahim (Imam Ibrahim), agarup 50 km (30 mi) iti amianan a daya ti Babilonia, adda dagiti natakuatan a kontrata a tapi a naglaon iti nagan a Kutu [ti Akkadiano a katupag ti Cut], ket daytoy ti makagapu no apay a kunaen ti kaaduan a geograpo a ti Tell Ibrahim isu ti Cuta iti Biblia. Ipatuldo dagiti ebidensia a karaman idi ti Cuta kadagiti napapateg a siudad iti Imperio ti Babilonia ken nalabit nakalawlawa met ti saklawna, ta ti munturod ita a pagilasinan iti dayta ket agarup 18 m (60 pie) ti kangatona ken 3 km (2 mi) ti rukod ti palikmutna. Ti naipagarup nga ayan idi ti maysa a kadaanan a templo a naidedikar ken Nergal ket maipatpatuldo nga adda iti tengnga dagitoy a rebba, maitunos iti sasao ti Biblia a napeklan “dagiti lallaki ti Cut” iti dayta a dios.—2Ar 17:29, 30.