DARIK

Balitok a sinsilio ti Persia nga agdagsen iti 8.4 g (0.27 oz t) ket ngarud napattapatta nga aggatad iti $94.50 iti agdama. Ti makinsango a sikigan ti maysa a darik a napartuat iti dua a siglo manipud naud-udi a paset ti maikanem a siglo K.K.P. nga agpatpatuloy iladawanna ti maysa nga ari a nakaparintuod, addaan iti pika iti makannawan nga imana ken iti bai iti makannigidna. Ti makinlikud a sikigan ipakitana ti arinduyog a lamma ti panangmarka a naaramid idi natimbrean ti sinsilio. Iti 1 Cronicas 29:7, ti maysa kadagiti bilang maipaay kadagiti kontribusion iti templo bayat ti panagturay ni David nadakamat babaen kadagiti darik, nupay ti darik ti Persia saan a pagaammo idi tiempo ni David. Nabatad a ti mannurat iti Cronicas binaliwanna ti orihinal a bilang a pinagbalin nga agdama idi a termino ken pagaammo dagiti managbasana.​—Esd 8:27.