DUKE

Lalaki a nadutokan, naisaad, ken naikkan iti autoridad kas maysa a prinsipe wenno kangrunaan a tao. Idi bimmales ti Israel kadagiti Midianita gapu iti pasamak iti Baal ti Peor (Jos 13:21), napapatay ti lima a Midianita a panguluen, ‘dagiti duke ni Sihon,’ a naawagan iti “ar-ari ti Midian” iti Numeros 31:8. Dagiti panguluen ti kabkabusor ti ili ti Dios naawaganda iti ‘duke’ (“piprinsipe,” AT; KJ; RS) iti Salmo 83:11. Ti Hebreo a termino a na·sikhʹ (duke) agparang met iti Ezequiel 32:30.

Kunaen ti maysa a Mesianiko a padto nga, inton dagiti kabusor ti ili ti Dios umayda maibusor kadakuada, addanto maibangon a “pito a pastor, wen, walo a duke kadagiti tattao [“piprinsipe kadagiti tattao,” KJ, marhin; RS].” Yantangay ti pito irepresentarna ti kinanaan-anay, ti “walo a duke” nabatad a kaipapananna a dakkel a bilang dagiti makabael a lallaki a nadutokan iti sidong ti Mesias ti mangidaulo iti ili ni Jehova.​—Mik 5:5.