BALLATINAW

[Heb., hov·nimʹ].

Patien a ti termino agaplikar iti kayo manipud iti Diospyros ebenum wenno kadagiti umasping a kita iti isu met laeng a kakikita ti kaykayo. Tumayag ti kayo, nga addaan simple a bulbulong ken sukog-kampana a sabsabong. Nalukneng ken puraw ti makinruar a paset ti kayo, ngem ti makin-uneg a bugas, a dumanon iti kadakkelan a diametrona nga agarup 0.5 m (2 pie), ket nakatangtangken, agaassideg ti binggasna, nalagda, ken nangisit wenno natayengteng a kayumanggi ti marisna. Sumileng unay dayta. Dagitoy a kalidad ti mamagbalin a matarigagayan unay maipaay iti nasayaat a muebles, aruaten a pagarkos, ken maipaay a pangkalupkop a kadua ti marfil. Inaramat met dagiti pagano iti panagaramid kadagiti idolo a pagdaydayawan.

Naminsan laeng a nadakamat ti ballatinaw iti Biblia, iti Ezequiel 27:15, a nakaiparanganna kas tagilako. Maikunkuna a ti ballatinaw ken marfil a nadakamat sadiay ket naigapu iti India wenno Sri Lanka, nalabit naiballasiw iti Baybay ti Arabia ken agturong iti Nalabaga a Baybay ket kalpasanna nailasat iti takdang, wenno saan manipud Nubia iti makin-amianan a daya nga Africa. Impateg unay dagiti nagkauna nga Egipcio, ket dagiti produkto a naaramid iti dayta nasarakan kadagiti tanem dagiti Egipcio.