NAIPASNGAT A SIUDAD

Siudad a kukua ti maysa a nasion wenno tribu nga adda iti uneg ti teritoria ti sabali a tribu. Karaman kadagiti agdama-aldaw a pagarigan ti naipasngat a lugar ket ti Makinlaud a Berlin, a napalikmutan iti teritoria ti Makindaya nga Alemania, ken kasta met ti disso a naited iti United Nations, a naiballaet a mismo iti uneg ti New York City. Iti las-ud ti uppat a siglo agingga idi kautibuenen dayta ni David, nagtalinaed ti maysa a paset ti kadaanan a Jerusalem kas naipasngat a siudad dagiti Jebuseo iti uneg ti teritoria ti Israel.​—Jos 15:63; Uk 1:21; 19:11, 12; 2Sm 5:6-9.

Idi mabingbingay ti Naikari a Daga iti 12 a tribu, adda dagiti siudad iti uneg ti intero a teritoria ti maysa a tribu ngem kukua ti sabali a tribu. Sigun iti Josue 16:9, “ti annak ni Efraim addaanda kadagiti naipasngat [wenno, “naisina; naiputong”] a siudad iti tengnga ti tawid ti annak ni Manases” (NW, Rbi8 ftn), kayatna a sawen, “il-ili a nailasin agpaay kadagiti Efraimita iti las-ud ti tawid ti annak ni Manases.” (JB; kitaenyo met ti Jos 17:8, 9.) Ti il-ili a nagnaedan ti dadduma kadagiti annak ni Manases ket adda iti uneg dagiti beddeng ti Isacar ken Aser.​—Jos 17:11; 1Cr 7:29.

Ti tawid ti Simeon ket buklen dagiti siudad a masarakan iti uneg ti teritoria ti Juda, agsipud ta ti bingay ti Juda ket “dakkel unay idi maipaay kadakuada.” (Jos 19:1-9; MAPMAPA, Tomo 1 p. 744, 947) Ti 48 a siudad nga inaywanan dagiti Levita, a pakairamanan ti 6 a siudad a pagkamangan, ket naipasngatda amin iti teritoria ti dadduma a tribu. (Jos 21:3-41) Iti kastoy a pamay-an, ti padto ni Jacob sakbay unay a natay ket natungpal maipapan kada Simeon ken Levi, nga ‘addaandanto iti bingay iti Jacob, ngem maiwarawaradanto iti Israel.’​—Ge 49:7.