PIESTA TI BARO A BULAN
Imbilin ti Dios iti Israel nga iti tunggal baro a bulan, nga isu ti pagilasinan ti panangrugi dagiti lunar a bulan ti kalendario dagiti Judio, mapuyot dagiti trumpeta iti ngatuen dagiti mapuoran a datonda ken pakikaykaysa a sakripisioda. (Nu 10:10) Maidaton dagiti naisangsangayan a sakripisio kadagitoy nga al-aldaw malaksid pay iti agtultuloy nga inaldaw a sakripisio. Dagiti mangbukel iti daton iti baro a bulan ket ti mapuoran a daton a dua a toro, maysa a kalakian a karnero, ken pito a kalakian a kordero a maysa ti tawenda, agraman iti maibuyog a datdaton a bukbukel ken arak, kasta met ti maysa nga urbon dagiti kalding maipaay a daton gapu iti basol.—Nu 28:11-15.
Kasta laeng ti naibilin a pannakarambak dayta sigun iti Pentateuko, ngem idi agangay rimmang-ay ti panangrambak iti baro a bulan ta nagbalinen a nagpateg a piesta ti intero a nasion. Iti Isaias 1:13, 14 nairaman daytan kadagiti Sabbath ken pampanawen ti piesta. Idi kaaldawan dagiti naud-udi a mammadto, saan a nagnegnegosio dagiti umili uray pay iti al-aldaw ti baro a bulan, kas naipasimudaag iti Amos 8:5. Naing-inget daytoy ngem iti inkalikagum ti Kasuratan nga aramiden iti al-aldaw ti baro a bulan. Uray pay kasta, kas ipakita ti naudi a dua naisitar a kasuratan, ti panangrambak dagiti Judio iti baro a bulan nagbalin a pormalismo laeng iti daydi a tiempo, makarimon dayta kadagiti mata ni Jehova.
Ti aldaw ti baro a bulan ket naisangsangayan ti pannakaibilangna kas aldaw ti panagtataripnong ken panagdadaya. Makita daytoy iti pampanunoten ni Saul idi saan a nagparang ni David iti lamisaan ni Saul iti aldaw ti baro a bulan. Kinuna ni Saul iti bagina: “Adda napasamak iti kasta isu saan a nadalus, ta saan pay a nadalusan.” (1Sm 20:5, 18, 24, 26) Nupay adda dagiti kita ti trabaho a mabalin nga aramiden itoy nga aldaw a saan a mabalin nga aramiden iti Sabbath, naibilang daytoy kas aldaw ti panangutob iti naespirituan a bambanag. Aguummong nga agkombension dagiti umili (Isa 1:13; 66:23; Sal 81:3; Eze 46:3) wenno sumarungkarda kadagiti mammadto wenno lallaki ti Dios.—2Ar 4:23.
Ti panangrambak iti aldaw ti baro a bulan saanna a ramanen ti panagdaydayaw iti bulan, kas kaugalian ti sumagmamano a pagano a nasion, awan met ti aniaman a nakainaiganna iti astrolohia.—Uk 8:21; 2Ar 23:5; Job 31:26-28.
Nagsurat ni Isaias maipapan iti masanguanan a tiempo inton aguummong amin a lasag tapno agruknoyda iti sanguanan ni Jehova iti al-aldaw ti baro a bulan. (Isa 66:23) Iti padto ni Ezequiel, bayat ti tiempo ti pannakaidestiero idiay Babilonia, idi naipasirmata kenkuana ti maysa a templo, kinuna kenkuana ni Jehova: “No maipapan iti ruangan ti makin-uneg a paraangan a sumango iti daya, rebbeng nga agtultuloy a siririkep iti innem nga aldaw a panagtrabaho, ket iti aldaw ti sabbath rebbeng a maluktan, ket iti aldaw ti baro a bulan rebbeng a maluktan. Ket dagiti umili ti daga masapul nga agruknoyda idiay pagserkan dayta a ruangan kadagiti sabbath ken kadagiti baro a bulan, iti sanguanan ni Jehova.”—Eze 46:1, 3.
Dagiti Judio ita rambakanda ti baro a bulan babaen iti adu a detalyado a seremonia ken nakapatpateg unay dayta kadakuada. Nupay kasta, naipakita a saan nga obligado dagiti Kristiano a rambakanda ti baro a bulan wenno sabbath, a paset laeng ti anniniwan ti bambanag nga umay, a ti pudpudno a banag ket masarakan ken Jesu-Kristo. Dagiti piesta ti nainkasigudan nga Israel addaan iti simboliko a kaipapanan ken iti kaitungpalan iti adu a bendision babaen iti Anak ti Dios.—Col 2:16, 17.