PUNNUEN TI IMA ITI PANNAKABALIN

Ti Hebreo a sasao a mil·leʼʹ yadh, naipatarus a “konsagraren” iti adu a bersion, literal a kaipapananna ti “punnuen ti ima” ken naaramat mainaig iti panangikabil iti naan-anay a pannakabalin iti im-ima dagidiay agserbi iti napadian nga akem. Idi maisasaadda kas papadi ni Jehova, napunno ti im-ima ni Aaron ken ti annakna iti pannakabalin nga agserbi iti dayta nga akem. (Ex 28:41; 29:9, 29, 33, 35; Le 8:33; 16:32; 21:10; Nu 3:3) Kas mangisimbolo iti daytoy, ti kalakian a karnero ti pannakaisaad napapatay ken narangrangkay, ket ti paspaset dayta agraman ti sumagmamano a nayurno a bambanag manipud iti labba ti di pinaalsa a tinapay ket inkabil ni Moises kadagiti dakulap ni Aaron ken ti annakna, a kalpasanna inlilida ti daton iti sanguanan ni Jehova. Kamaudiananna, ti nailili a bambanag napagasuk iti altar iti rabaw ti daton a mapuoran.​—Ex 29:19-25; Le 8:22-28; kitaenyo ti NAPULOTAN, PANANGPULOT; PADI; PANNAKAISAAD.

Adda met dadduma a tattao a nangpunno iti pannakabalin ti im-ima ti papadida. Ti idolatroso a ni Mikias immuna nga impaayanna iti pannakabalin ti maysa nga anak ket kalpasanna ti maysa a di matalek a Levita tapno agbalinda a papadi maipaay iti bukodna a “balay ti didios.” (Uk 17:5, 12) Idi agangay, iti panangyussuat ni Ari Jeroboam iti panagdaydayaw iti urbon a baka iti Israel, nangisaad iti bukodna a papadi manipud iti kaaduan kadagiti umili; ti Aaroniko a papadi ken dagiti Levita nagtalinaedda a nasungdo iti panagdaydayaw ken Jehova a naisentro idiay Jerusalem ket nabatad a daytoy ti makagapu a napagtalawda manipud iti sangapulo-tribu a pagarian.​—1Ar 12:31; 13:33; 2Cr 13:9.